Կարեն Սարգսյան
ԵՊՀ Շառլ Ազնավուրի անվան մշակույթի կենտրոնի երգչախմբի և կամերային նվագախմբի գեղ. ղեկավար
Կարեն Սարգսյանը ծնվել է 1952թ.-ի սեպտեմբերի 12-ին Հայաստանում, երաժշտական կրթությունը սկսել է որպես թավջութակահար, այնուհետև ավարտելով Երևանի Խ.Աբովյանի անվան մանկավարժական համալսարանի երաժշտական ֆակուլտետը և Կոմիտասի անվան պետական կոնսերվատորիայի օպերային և սիմֆոնիկ դիրիժորության բաժինը` երկար տարիներ ղեկավարել է բազմաթիվ երգչախմբեր Հայաստանում և արտասահմանում:
1989թ. հիմնադրել է տղամարդկանց երգչախումբ, որն իր բարձրակարգ կատարումներով հիացրել է մի շարք երկրների ունկնդիրներին:
1991-93թթ. Կ.Սարգսյանն աշխատել է գերմանական «Վիսբադեն-Զոնենբերգ» երգչախմբի հետ` որպես հրավիրյալ խմբավար: Հանդես գալով բազմաթիվ երկրներում` պրոֆեսիոնալ բարձր մակարդակով ներկայացրել է հայկական խմբերգային արվեստը: Աշխատել է նաև Սփյուռքում` իր փորձն ու գիտելիքները հաղորդելով Ավստրալիայի, Գերմանիայի, Սիրիայի հայկական համայնքների արվեստասեր հասարակայնությանը:
1993թ.-ից ղեկավարում է Երևանի օպերային թատրոնի երգչախումբը: Կարեն Սարգսյանը մեծապես նպաստել է օպերային ներկայացումների բազմաթիվ բեմադրությունների հաջողությանը:
2006թ.-ին ՀՀ նախագահի հրամանագրով արժանացել է ՀՀ վաստակավոր արտիստի պատվավոր կոչման:
2006թ-ից Երևանի պետական համալսարանի Շառլ Ազնավուրի անվան մշակույթի կենտրոնի երգչախմբի գեղարվեստական ղեկավարն է:
2012թ.-ին արժանացել է ՀՀ Մշակույթի Նախարարության ոսկե մեդալի:
2014թ.-ից Ամենայն Հայոց Գարեգին Բ կաթողիկոսի հրամանով ղեկավարել է Երևանի Գրիգոր Լուսավորիչ մայր եկեղեցու և հոգևոր ճեմարանի երգչախումբը:
2016թ.-ին Նյու Յորքում ձայնագրել է Խ. Մեյխանեջյանի Սբ. Պատարագը` հեղինակի հետ։
2017 թ.-ից ղեկավարել է Ա․ Սպենդիարյանի անվան օպերայի և բալետի ազգային ակադեմիական թատրոնի երգչախումբը:
2018թ.-ին արժանացել է պատվավոր Սուրբ Սահակ - Սուրբ Մեսրոպ շքանշանի: