Դիսկրետ մաթեմատիկայի և տեսական ինֆորմատիկայի ամբիոնը ստեղծվել է 2006 թ. Դիսկրետ մաթեմատիկայի և Ինֆորմատիկայի հանրահաշվատրամաբանական մեթոդների ամբիոնների միաձուլման հիման վրա:

Բակալավրիատում ամբիոնը սպասարկում է դիսկրետ մաթեմատիկայի, հանրահաշվի, կոմբինատոր օպտիմիզացիայի, կոմպյուտերային հանրահաշվի, մաթեմատիկական տրամաբանության, ալգորիթմների տեսության, գործողությունների հետազոտման, կոդավորման տեսության, ինֆորմացիայի անվտանգության, գրաֆների տեսության, մաթեմատիկական կիբեռնետիկայի, պատկերների ճանաչման, կոմբինատոր ալգորիթմների և վերլուծության դասընթացները:

Ամբիոնում գործում է «Դիսկրետ մաթեմատիկա և տեսական ինֆորմատիկա» մասնագիտացմամբ մագիստրոսական ծրագիր:

Ամբիոնի հիմնական գիտական ուղղություններն են դիսկրետ մաթեմատիկա, դիսկրետ էքստրեմալ խնդիրներ, կիրառական հանրահաշիվ, գրաֆների տեսություն, գերմեծ ինտեգրալ սխեմաների նախագծում, բուլյան ֆունկցիաների տեսություն, կոդավորում, ալգորիթմների տեսություն, մաթեմատիկական տրամաբանություն, բարդության տեսություն, գործողությունների հետազոտում, կրիպտոգրաֆիա և այլն:

Ամբիոնում կատարվում են գիտական հետազոտություններ հաշվողական մաթեմատիկայի, մոտարկման տեսության, մաթեմատիկական մոդելավորման, դիֆերենցիալ հավասարումների տեսության և ֆունկցիաների տեսության բնագավառում:

Ամբիոնում կատարվում են ՀՀ պետական բյուջեից ֆինանսավորվող երկու գիտահետազոտական թեմաներ`
1. «Արագ հաշվողական ալգորիթմների մշակում մեծ չափողականության հանրահաշվական խնդիրների լուծման համար» (2008 - 2010 թթ., ղեկավար` ֆ. մ. գ. դ., պրոֆեսոր Յու. Ռ. Հակոբյան),
2. «Բազմաչափ բազմանդամային միջարկում» (2008 - 2010 թթ., ղեկավար` ֆ. մ. գ. դ., Հ. Ա. Հակոբյան):

«Ծրագրավորման և ինֆորմացիոն տեխնոլոգիաների» ամբիոնը ԵՊՀ Ինֆորմատիկայի և կիրառական մաթեմատիկայի ֆակուլտետում բացվել է 2007 թ. սկզբին` ֆակուլտետի վերակազմավորումից հետո, որի նպատակն էր ֆակուլտետի ամբիոնների խոշորացումը: Սակայն իրականում ամբիոնն ունի կեսդարյա պատմություն:

1957 թ. աշնանը ԵՊՀ Ֆիզիկա-մաթեմատիկական ֆակուլտետում բացվեց Հաշվողական մաթեմատիկայի ամբիոնը: 1958 թ. հունվարին ամբիոնի վարիչ դարձավ Ա. Ա. Լյապունովի աշակերտուհին Մոսկվայից` Ռ. Ի. Պոդլովչենկոն, որը մեծ ավանդ ներդրեց ամբիոնի կայացման և հետագա զարգացման գործում: 1971 թ. ամբիոնը վերաճեց Կիրառական մաթեմատիկայի ֆակուլտետի, այժմ` Ինֆորմատիկայի և կիրառական մաթեմատիկայի ֆակուլտետ: 1972 թ. Հաշվողական մաթեմատիկայի ամբիոնը բաժանվեց երկու ամբիոնների` Մաթեմատիկական կիբեռնետիկայի ամբիոն և ԷՀՄ մաթեմատիկական ապահովման ամբիոն: Հետագայում ԷՀՄ մաթեմատիկական ապահովման ամբիոնից առանձնացան երկու նոր ամբիոններ` ԷՀՄ և ծրագրավորման ամբիոնը (1975 թ.) և Ալգորիթմական լեզուների ամբիոնը (1991 թ.):

1996 թ. ԷՀՄ մաթեմատիկական ապահովման ամբիոնն ու ԷՀՄ և ծրագրավորման ամբիոնը միավորվեցին` կազմելով Համակարգային ծրագրավորման ամբիոնը, իսկ 2007 թ. միավորվեցին Համակարգային ծրագրավորման ամբիոնն ու Ալգորիթմական լեզուների ամբիոնը` կազմելով Ծրագրավորման և ինֆորմացիոն տեխնոլոգիաների ամբիոնը, որն այսօր հանդիսանում է ԵՊՀ ինֆորմատիկայի և կիրառական մաթեմատիկայի ֆակուլտետի ծրագրավորման միակ ամբիոնը: Ամբիոնը սպասարկում է ֆակուլտետի բակալավրիատի` իր պրոֆիլին հարող բոլոր դասընթացները: Ամբիոնում գործում է ուսանողների մոտ բարձր վարկանիշ ունեցող «Հաշվողական մեքենաների, համալիրների, համակարգերի և ցանցերի մաթեմատիկական և ծրագրային ապահովում» մագիստրոսական ծրագիրը: Ամբիոնի ասպիրանտները մասնակցում են ամբիոնի գիտական աշխատանքներին, որոնք տարվում են հետևյալ հիմնական ուղղություններով.

1. Ծրագրավորման լեզուներ և համակարգեր,
2. Ֆունկցիոնալ ծրագրավորում և լյամբդա հաշիվ,
3. Տրամաբանական ծրագրավորում,
4. Հաշվողական համակարգերի և ցանցերի ճարտարապետություն:

Ամբիոնում մշակվում է 1027 ծածկագրով «Ֆունկցիոնալ և տրամաբանական ծրագրերի ձևափոխություններ և իրականացում» գիտական ֆինանսավորվող թեման:

Իր մեջ ունենալով կեսդարյա ավանդույթներ` Ծրագրավորման և ինֆորմացիոն տեխնոլոգիաների ամբիոնն այսօր էլ բարձրակարգ ծրագրավորող կադրերի հիմնական ապահովողն է Հայաստանի այն բոլոր կազմակերպությունների, որոնք ունեն նրանց անհրաժեշտությունը: