Միջազգային հարաբերությունների ֆակուլտետի «Դիվանագիտական ծառայության և մասնագիտական հաղորդակցման ամբիոնը» ստեղծվել է 2010 թ. մայիսին:

Այս բաժնում ուսանողները ուսումնասիրում են դիվանագիտական և հյուպատոսական ծառայության ինչպես տեսական, այնպես էլ գործնական հարցերը: Բաժնի ուսումնական պլանում կարևոր տեղ է հատկացված դիվանագիտական և հյուպատոսական ծառայության առանձնահատկություններին, դիվանագետի պատասխանատու առաքելությանը և հիմնական պարտականություններին:

Բաժնում դասավանդվում են դիվանագիտական ծառայության անբաժան մասը հանդիսացող դիվանագիտական բանակցությունների վարում , դիվանագիտական վարվեցողություն, դիվանագիտական արարողակարգ և վարվելակերպ, երկրագիտություն առարկաները:

Դիվանագիտական ծառայության և մասնագիտական հաղորդակցման ամբիոնում մեծ կարևորություն է տրվում հատկապես օտար լեզուների (եվրոպական և արևելյան) կատարյալ իմացությունը: Համաձայն ՀՀ Դիվանագիտական ծառայության մասին օրենքի 24-րդ հոդվածի պարտադիր է համարվում առնվազն երկու օտար լեզուների տիրապետելը:

Այդ անհրաժեշտությունից ելնելով՝ առաջին և երկրորդ լեզուների դասավանդումը կատարվում է դիվանագիտական խոսքի և մշակույթի և դիվանագիտական ծառայության հմտություններին տիրապետելու համապատասխան:

Բարձր առաջադիմությամբ բակալավրիատի շրջանավարտները իրենց ուսուցումը կարող են շարունակել մագիստրատուրայում: Լավագույն շրջանավարտները հնարավորություն են ունենում հաջող քննություններ հանձնելուց հետո անցնել աշխատանքի արտաքին գործերի նախարարությունում, միջազգային կազմակերպություններում և տարբեր նախարարությունների միջազգային կապերի վարչություններում:

ԵՊՀ Հանրային կառավարման կրթական ծրագիրը սկիզբ է առել 2005թ.՝ առաջարկելով «Հանրային կառավարում» մասնագիտացմամբ մագիստրոսների պատրաստման դասընթացներ: Ծրագիրը նախաձեռնվել և մշակվել է Արիզոնայի պետական համալսարանի համագործակցության արդյունքում (ծրագրի մեկնարկը՝ 2003թ.): 2007թ.-ից ԵՊՀ Միջազգային հարաբերությունների ֆակուլտետի շրջանակներում գործում է «Հանրային կառավարում» մասնագիտությամբ բակալավրիատի կրթական ծրագիրը: ԵՊՀ Հանրային կառավարման ամբիոնը հիմնադրվել է 2008 թ-ին:

Ամբիոնի հետազոտական աշխատանքների հիմնական ուղղություններն են՝ պետական կառավարման, ինչպես նաև տեղական ինքնակառավարման վարչա-քաղաքական ոլորտների տեսական և կիրառական ասպեկտները, հանրային կառավարման համակարգերի բարեփոխման գործնական և հայեցակարգային հետագծերի ուսումնասիրումը:

Ամբիոնում դասավանդում են 11 դասախոսներ, որոնցից 5-ը գիտությունների թեկնածուներ են:

Ամբիոնը ձևավորվել է 1993 թ-ին: 1993 - 2000 թթ. ամբիոնի առաջին վարիչն էր պատմական գիտությունների դոկտոր, պրոֆ. Է. Ա. Զոհրաբյանը, իսկ 2001 թ. փետրվարից մինչև 2008 թ. ապրիլը` պատմական գիտությունների դոկտոր, պրոֆ. Վ. Ա. Բայբուրդյանը: 2008 - 2013 թթ. ամբիոնը կրկին ղեկավարել է պրոֆ. Է. Ա. Զոհրաբյանը: 2013 թ-ի սեպտեմբերից ամբիոնի վարիչն է պատմական գիտությունների թեկնածու, դոցենտ Մ. Վարդազարյանը:

Մինչև 1998թ. սեպտեմբերին Միջազգային հարաբերությունների ֆակուլտետի կազմավորումը «Միջազգային հարաբերությունների պատմության և տեսության» ամբիոնը գործում էր Պատմության ֆակուլտետի կազմում:

Սկզբնական շրջանում 4 հիմնական անդամներից բաղկացած ամբիոնը 2014թ. դրությամբ իր կազմում արդեն ուներ 23 հաստիք, որոնցից 11-ը լրիվ հաստիքով, մյուսները կես կամ քառորդ: Ներկայումս ամբիոնում դասավանդում են 4 գիտության դոկտորներ, այդ թվում մեկ ԳԱԱ թղթակից անդամ և 14 գիտության թեկնածուներ: Ամբիոնի դասախոսներից 8-ը դիվանագիտական աշխատանքի փորձ ունեն:

Ամբիոնի անդամները ակտիվ կերպով զբաղվում են գիտական հետազոտություններով, որոնք ընթանում են հիմնականում հետևյալ ուղղություններով.

1. Հայ դիվանագիտության և ՀՀ արտաքին քաղաքականության հիմնահարցեր,
2. Միջազգային հարաբերությունների ժամանակակից գործընթացներ,
3. Համաշխարհային և տարածաշրջանային ինտեգրացիոն զարգացումներ:

Ամբիոնի նախաձեռնությամբ անցկացվում են տարեկան գիտական նստաշրջաններ և գիտաժողովներ: Պարբերաբար կազմակերպվում են հանդիպումներ ՀՀ-ում հավատարմագրված օտարերկրյա դիվանագիտական ներկայացուցիչների և արտասահմանից հրավիրված առաջնակարգ դասախոսների հետ:

Քաղագիտության ամբիոնը գործում է ԵՊՀ-ում 1991 թ. հունիսից: 2010 թ. ապրիլին այն վերանվանվել է Քաղաքական գիտության պատմության և տեսության ամբիոն: Ամբիոնի գործունեությանը այդպիսի ուղղածություն հաղորդելը կապված էր ժամանակակից քաղաքական գործընթացներում ֆունդամենտալ հետազոտությունների անհրաժեշտության, ժողովրդավարության անցման պայմաններում քաղաքական սուբյեկտների վարքագծի հիմնական ձևերի բացահայտման հետ: Հենց ժամանակակից գործընթացների տեսական ընկալումն է, որ թույլ կտա գտնել հայ հասարակության առջև ծառացած հրատապ խնդիրների ամբողջական և համակարգված լուծումները:

Հետազոտությունների հիմնական ուղղություններն են` ժամանակակից սոցիալ-քաղաքական փոխակերպումների գաղափարա-քաղաքական հիմքերը, քաղաքական կոնֆլիկտաբանությունը, քաղաքական տեսությունը, հայ քաղաքական մտքի պատմությունը և այլն: Հատուկ ուշադրություն է դարձվում ազգային անվտանգության հիմնահարցին, որն իր մեջ ընդգրկում է սոցիալ-քաղաքական, ժողովրդագրական, բնապահպանական, տնտեսական, սոցիոմշակութային, քաղաքական և իրավական հարցերի լայն շրջանակ:

Ամբիոնում դասավանդում են 23 դասախոսներ, որոնցից 2 դոկտորներ են, 17 գիտության թեկնածուներ, 1 պրոֆեսոր, 7 դոցենտներ:

Քաղաքական ինստիտուտների և գործընթացների ամբիոնը հիմնվել է ԵՊՀ գիտական խորհրդի որոշմամբ 2010 թ. ապրիլին: Ամբիոնը կազմավորվել է 1991թ-ից գործող Քաղաքագիտության ամբիոնի հիմքի վրա: Այստեղ դասավանդում են 15 դասախոսներ, որոնցից երեքը գիտության դոկտորներ են, 10-ը թեկնածուներ: Քաղաքական գիտությունների դոկտորի և թեկնածուի աստիճան ունեն ինը:

Կարճ ժամանակում ամբիոնը կայացել է որպես ուսումնագիտական կենտրոն և համակարգում է Միջազգային հարաբերությունների ֆակուլտետի երեք բաժինների բակալավրիատում և մագիստրատուրայում դասավանդվող կիրառական քաղաքագիտության առարկաները:

Ամբիոնն ունի 15-ից ավելի ասպիրանտներ և հայցորդներ Իգ. 00.02.- Քաղաքական ինստիտուտներ և գործընթացներ մասնագիտացմամբ: Դասախոսների և ասպիրանտների գիտահետազոտական աշխատանքները ընթանում են երեք ուղղությամբ.
• քաղաքական ինստիտուտներ,
• քաղաքական գործընթացներ,
• համաշխարհային քաղաքականություն և տարածաշրջանային գործընթացներ:

Միջազգային հարաբերությունների ֆակուլտետի «Չինարեն լեզվի և մշակույթի կենտրոնը» հիմնադրվել է ԵՊՀ հոգաբարձուների խորհրդի 2015 թվականի հունիսի 19-ի N 9 նիստի որոշմամբ: Կենտրոնը ղեկավարում է միջազգային հարաբերությունների ֆակուլտետի դեկանի տեղակալ, պ.գ.թ., դոցենտ Արթուր Իսրայելյանը:

Կենտրոնի հիմնական խնդիրներն ու գործառույթներն են՝

Խթանել ԵՊՀ-ում չինարենի ուսուցումը:

Ուսանողների կրթական հետաքրքրությունն ուղղել դեպի Չինաստանի մշակութային արժեքները:

Աջակցել ԵՊՀ-ում չինարենի ուսումնական գործընթացի ներդրմանը, կազմակերպել համապատասխան մասնագիտական դասընթացներ ԵՊՀ ուսանողների համար:

Աջակցել ԵՊՀ համագործակցությանը Հայաստանի Հանրապետությունում հավատարմագրված Չինաստանի Ժողովրդական Հանրապետության դեսպանատան և ԵՊԼՀ Կոնֆուցիոսի ինստիտուտի հետ։

Համագործակցել ԵՊՀ և այլ գիտական կենտրոնների և համալսարանների հետ՝ կենտրոնի աշխատանքների արդյունավետ կատարման, ինչպես նաև փորձի փոխանակման նպատակով։

Կազմակերպել չինարենի անհատական և խմբակային դասընթացներ ինչպես ԵՊՀ, այնպես էլ արտաքին դիմորդների համար՝ համաձայն ներքին չափորոշիչների:

Պլանավորել և իրականացնել թեմատիկ դասընթացներ, կինոդիտումներ, ցուցահանդեսներ, օլիմպիադաներ չինարենի, չինական մշակույթի, կրոնի և պատմության ոլորտներում, ինչպես նաև նշել ազգային տոները և այլ միջոցառումներ։

(+ 374 60) 71-00-82, ներքին 10-82
chinacenter@ysu.am