Անգլիական բանասիրության ամբիոնը Երևանի պետական համալսարանում դեռևս 30-ական թվականներին հիմնադրված և հանրապետությունում տարածում գտած երեք օտար լեզուները (անգլերեն, գերմաներեն, ֆրանսերեն) միավորող ռոմանագերմանական բանասիրության ամբիոնի արժանի ժառանգորդն է:

1991 թվականին, հայկական բանասիրության ֆակուլտետի կազմում գործող օտար լեզուների մասնագիտական բաժինների հիմքի վրա ստեղծված ռոմանագերմանական բանասիրության ֆակուլտետով ձևավորվեց անգլիական բանասիրության ամբիոնի գործունեությունը որպես այդպիսին: Ժառանգելով իր վաստակաշատ ու բազմահմուտ նախորդների` բ.գ.դ., ակադեմիկոս Գ. Ջահուկյանի, փ.գ.դ., ակադեմիկոս Է. Աթայանի, բ.գ.թ., պրոֆեսոր Հ. Թոքմաջյանի, բ.գ.թ., պրոֆեսոր Ե. Մխիթարյանի գիտամանկավարժական հարուստ փորձը` նորաստեղծ ամբիոնի վարիչի պարտականությունները ստանձնեց բ.գ.թ., (բ.գ.դ. 1994 թվականից) դոցենտ Ս. Գասպարյանը (բ.գ.դ., պրոֆեսոր 2000 թվականից):

Վաթսունից ավելի մասնագետներ ընդգրկող անգլիական բանասիրության ամբիոնը, որն այսօր իրականացնում է բազմաբնույթ ուսումնամեթոդական և գիտական գործունեություն, ապահովում է գործնական անգլերենի ուսուցում որպես հիմնական և երկրորդ մասնագիտական լեզու, ինչպես նաև տեսական գիտելիքներ հաղորդում անգլիական բանասիրության տարբեր գիտակարգերի ոլորտում, ծանոթացնում երկրագիտական և լեզվամշակութային արժեք ունեցող փաստերի:

Ստանձնելով հանրապետության առաջատար մասնագիտական ամբիոնի պատասխանատու դերը` անգլիական բանասիրության ամբիոնն այսօր լծվել է բարձրորակ մասնագետների պատրաստման ու որակավորման ծանր, բայց և արժանապատիվ գործին`ամբիոնի գիտական աշխատանքը զարգացնելով տարբեր ուղղություններով:

Գիտական և ուսումնամեթոդական աշխատանքների ոլորտում ուշադրության է արժանի այն փաստը, որ ամբիոնում մշտապես լույս են տեսնում մենագրություններ, բուհական դասագրքեր, ուսումնա-մեթոդական ձեռնարկներ և բառարաններ, գիտական հոդվածներ, որոնք նվիրված են ժամանակակից լեզվաբանության տարաբնույթ արդիական խնդիրների քննությանն ու լուսաբանմանը: Ամբիոնում իրականացվում են նաև թարգմանական աշխատանքներ, մեծ ծավալի խմբագրական և գրախոսական աշխատանք: Ամբիոնում բարի ավանդույթ է դարձել ամբիոնի անդամների ակտիվ մասնակցությունը գիտաժողովների, նաև դրանց գումարումը (ինչպես հանրապետական, այնպես էլ միջազգային), որը լավ հնարավորություն է ոչ միայն կատարված աշխատանքն ամփոփելու, այլև ամբիոնի միջազգային կապերն ընդլայնելու առումով:

2006 - 2007 ուստարում ամբիոնիում բացվել է «Լեզվաբանություն և միջմշակութային հաղորդակցություն» բաժինը, որը նպատակադրված է պատրաստելու միջմշակութային հաղորդակցության ոլորտի մասնագետներ: Նրանք հնարավորություն կունենան աշխատելու տարբեր հանրապետական և միջազգային կազմակերպություններում, գովազդային գործակալություններում, բանկային և տուրիզմի ոլորտներում:

Անգլիական բանասիրության ամբիոնը արդյունավետ համագործակցություն է իրականացնում նաև Անգլերենի ուսումնասիրության հայկական ասոցիացիայի հետ, որի կազմում կարևորվում է անգլիական բանասիրության ամբիոնի անդամակցությունը: Ամբիոնն իր գործուն մասնակցությունն է բերում Հայաստանի Հանրապետությունում կրթության և գիտության զարգացման գործին, մասնավորապես օտար լեզուների (անգլերեն) ոլորտում: Մեծ է նաև ամբիոնի մասնակցությունը ասոցիացիայի ակադեմիական պարբերականի` Armenian Folia Anglistika միջազգային հանդեսի և “News Letter” տեղեկատվական լրագրի հրատարակման գործում:

Վերջին մի քանի տարիների ընթացքում ամբիոնի մասնագետները, նաև ուսանողները հնարավորություն են ունեցել լսելու արտասահմանյան տարբեր երկրներից հրավիրված մասնագետների դասախոսություններ, մասնակցելու նրանց կողմից անցկացվող սեմինարների ու քննարկումների:

Ուսուցման եռաստիճան համակարգի անցնելու կապակցությամբ ամբիոնը վերամշակել և ստեղծել է նոր ուսումնական ծրագրեր, որոնք նպատակաուղղված են համակողմանի մասնագիտական կրթություն ապահովելու բակալավրիատի և մագիստրատուրայի փուլերում` համապատասխանաբար: Այժմ արդեն ինչպես բակալավրական, այնպես էլ մագիստրոսական ուսուցման ծրագրերն ամբիոնում իրականացվում են կրեդիտային համակարգի պահանջներին համապատասխան:

Անգլիական բանասիրության ամբիոնում մասնագիտացած շատ շրջանավարտներ այսօր բազմաբեղուն գործունեություն են իրականացնում հանրապետության տարբեր ձեռնարկություններում, նախարարություններում, հանրակրթական և բարձրագույն դպրոցներում, արտերկրի տարբեր համալսարաններում և այլուր:

Հակահայկական քարոզչական դիսկուրսի հետազոտությունների լաբորատորիա

«Անգլալեզու հակահայկական քարոզչական դիսկուրսի հետազոտությունների լաբորատորիա» ծրագիրը (գիտական ղեկավար՝ պրոֆ. Ս.Ք.Գասպարյան ) սկզբնավորվել է 2015 թվականից ԵՊՀ ռոմանագերմանական բանասիրության ֆակուլտետի անգլիական բանասիրության ամբիոնի բազայի վրա ՀՀ պետական բյուջեի ֆինանսավորմամբ:

Ծրագիրը նպատակ ունի ուսումնասիրելու հակահայկական քարոզչական դիսկուրսը և ընդհանրապես Հայոց ցեղասպանությանն ու Հայկական հարցին առնչվող տարաբնույթ անգլալեզու նյութեր, լայն առումով, լեզվաճանաչողաբանության դիրքերից, բացահայտելու տարբեր լեզվական հնարների գործածությունը որպես քաղաքական քարոզչամիջոց հասարակական կարծիք ձևավորելու և ընթերցողի վերաբերմունքը ուղղորդելու մեխանիզմ:

2014 թ. գիտական թեմայի շրջանակներում հրատարակված “The Armenian Genocide: A Linguocognitive Perspective” մենագրության մեջ հեղինակը՝ ՀՀ ԳԱԱ թղթակից անդամ, պրոֆեսոր Ս.Ք.Գասպարյանը առաջին անգամ ուսումնասիրեց Հայոց ցեղասպանության խնդիրն արծարծող աշխատություններ և, ելնելով լեզվաբանության մեջ վաղուց արդեն հաստատված լեզու-մտածողություն փոխադարձ կապի դրույթից, վեր հանելով ընթերցողի գիտակցության վրա որոշակի դիտավորությամբ ներազդելու լեզվական միջոցները, բացահայտեց մի շարք օտարերկրյա հեղինակների՝ պատմությունը աղավաղելու և Հայոց ցեղասպանության անհերքելի փաստը հերքելու թուրքամետ մտադրությունները: Այս աշխատանքը, միանգամայն նոր հուն բացելով ցեղասպանագիտական ուսումնասիրությունների բնագավառում, ճանապարհ հարթեց ցեղասպանության խնդիրների հետագա լեզվաճանաչողական ուսումնասիրությունների համար:

2016 թ. լաբորատորիայի հետազոտական խմբի ջանքերով լույս տեսավ “Raphael Lemkin’s Draft Convention on Genocide and the 1948 UN Convention” մենագրական ուսումնասիրությունը (հեղինակներ՝ Ս. Գասպարյան, Շ.Պարոնյան, Ա. Չուբարյան, Գ.Մուրադյան), որտեղ ցեղասպանության կոնվենցիայի լեմկինյան նախագծի և ՄԱԿ-ի 1948 թ. ընդունած կոնվենցիայի զուգադիր տեքստաբանական քննությամբ հեղինակները վեր են հանում այդ երկու փաստաթղթերի տարբերությունները պատասխանատվության և ցեղասպանությունները կանխարգելելու համար կոնկրետ քայլեր ձեռնարկելու քաղաքական, սոցիալական, մշակութային և իրավական խնդիրների մեկնաբանման առումով: Ուսումնասիրությունը ցույց է տալիս, որ ՄԱԿ-ի Կոնվենցիայի տեքստում կատարված բառային, ձևաբանական, շարահյուսական փոփոխությունների արդյունքում նվազել են ցեղասպանության հանդեպ անհանդուրժող վերաբերմունքի դրսևորումները և մարդկության դեմ իրականացվող այդ զազսրելի ոճիրն իրականացնողներին խստագույնս պատժելու վճռականությունը:

Լաբորատորիայի հետազոտական աշխատանքի ներկա փուլում գիտական խումբը նպատակ ունի հավաքագրել Հոլոքոստի հատուցման հրեական փորձն արտացոլող համապատասխան իրավաբանական փաստաթղթեր և այլ բնույթի նյութեր, դասակարգել, համակարգել, վերլուծել լեզվաոճական, լեզվագործաբանական և լեզվաճանաչողական մեթոդների կիրառմամբ և պատմական հայեցակերպի հաշվառումով բացահայտել լեզվական այն բոլոր միջոցները, որոնք նպաստել են հրեաների հատուցման խնդրի հաջող հանգուցալուծմանը: Ծրագրվում է նաև իրականացնել Հոլոքոստի հատուցման հրեական փորձի քննարկմանն ու հանրայնացմանն ուղղված գործողություններ (ելույթներ գիտաժողովներում, գիտական սեմինարների և քննարկումների կազմակերպում):

1957 թ.բանասիրության ֆակուլտետում գործող օտար լեզուների ամբիոնը բաժանվում է երկու ամբիոնների՝ ռոմանագերմանական բանասիրության և օտար լեզուների: Վերջինս համարվում էր համահամալսարանական, քանի որ այն օտար լեզուների ուսուցում էր իրականացնում տարբեր ֆակուլտետներում:

Օտար լեզուների ամբիոնը ղեկավարել են վաստակաշատ գիտնականներ պրոֆեսոր Ս. Մանուկյանը, բ.գ.թ., դոցենտ Դ.Սաքանյանը, մ.գ.թ., դոցենտ Մ. Հարությունյանը, մ.գ.թ., դոցենտ Կ.Կարապետյանը, որոնց ջանքերի շնորհիվ ամբիոնում ձևավորվել են լավագույն ավանդույթներ:

1991թ. բանասիրության ֆակուլտետից առանձնացան օտար լեզուների բաժինները, որոնց հիման վրա էլ ձևավորվեց ռոմանագերմանական բանասիրության ֆակուլտետը որպես համալսարանի ուսումնագիտական ինքնուրույն ստորաբաժանում: Օտար լեզուների ամբիոնն ընդգրկվեց այդ ֆակուլտետի մեջ, վերանվանվեց անգլերեն լեզվի թիվ 1 ամբիոն և 2001-ից ամբիոնի վարիչ դարձավ երիտասարդ մասնագետ բ.գ.թ., դոցենտ Մ.Ապրեսյանը:

Ամբիոնի կատարած աշխատանքը լի է նորամուծություններով և հաջողություններով: Այսօր ամբիոնն ակտիվորեն իրականացնում է լայնածավալ ու բազմամակարդակ կրթական ծրագրեր տարբեր ֆակուլտետներում (ինֆորմատիկայի և կիրառական մաթեմատիկայի, ֆիզիկայի, ռադիոֆիզիկայի, քիմիայի, կենսաբանության, երկրաբանության և աշխարհագրության, փիլիսոփայության և հոգեբանության, սոցիոլոգիայի, պատմության, աստվածաբանության և իրավագիտության):Դրանք ուղղորդված են անգլերենի ուսուցումը ծառայեցնելու մասնագիտական նպատակներին: Ամբիոնի աշխատանքային և կրթական գործունեության կարևոր մասն է կազ-մում գիտամեթոդական աշխատանքը՝ պայմանավորված գիտատեխնիկական առաջընթացի, միջազգային և շուկայական հարաբերությունների զարգացման և գլոբալացման մարտահրավերներով: Այս առումով գրագետ, մասնագիտական անգլերենին տիրապետող մասնագետների պատրաստումն անգլերեն լեզվի թիվ 1 ամբիոնի կրթական կարևորագույն նպատակներից մեկն է:

Ամբիոնն իր կրթական լայնածավալ գործունեությունն իրականացնում է՝ ապավինելով իր որակյալ դասախոսական աշխատակազմին (ավելի քան 50 դասախոս) և ամբիոնի վարիչ բ.գ.թ., դոցենտ Մ.Ապրեսյանի ղեկավարությանը, կազմակերպվա-ծությանն ու նվիրվածությանը նորացող կրթական գործընթացին: Ամբիոնն իր առջև նպատակ է դրել հետևողականորեն արդիականացնել անգլերենի դասավանդման մեթոդները (անգլերենը մասնագիտական նպատակների համար ESP - English for Special Purposes), զարգացնել կիրառական լեզվաբանությունը՝ ելնելով ժամանակի պահանջներից:

Ամբիոնի կարևոր ձեռքբերումներից է «FLSP (օտար լեզուն հատուկ նպատակների համար)» միջազգային գիտական ամսագրի հիմնադրումը (գլխավոր խմբագիր` Մ. Ապրեսյան), որտեղ հրատարակվող հոդվածները լուսաբանում են անգլերեն լեզվով մասնագիտության ուսուցման միջազգային փորձն ու ձեռքբերումները, դասավանդման մեթոդիկան՝ ըստ սովորողների փոփոխվող կարիքների ու պահանջների:

Անգլերեն լեզվի թիվ 1 ամբիոնն արտերկրի համալսարանների մասնագետների մասնակցությամբ (Կլակամասի համալսարան, ԱՄՆ) մշակել է անգլերենի ուսուցման հիմնադրույթներն ըստ նոր եռաստիճան կրթական համակարգի առնձնահատկությունների: Ոչ լեզվական ֆակուլտետներում մագիստրոսական ուսուցումն անհրաժեշտ մակարդակով իրականացնելու համար ամբիոնը մշակել է անգլերենի դասավանդման արդիական ծրագիր:

Ամբիոնը համագործակցում է արտերկրի համալսարանների հետ (ԱՄՆ, Մեծ Բրիտանիա)՝ նպատակադրվելով ուսումնասիրել և օգտագործել նրանց փորձն ու գիտամեթոդական ռեսուրսները: Հրավիրված մասնագետները հանդես են գալիս դասախոսություններով, անցկացնում սեմինարներ, որոնք ուղեկցվում են բուռն քննարկումներով: Այս ամենի արդյունքում հնարավոր է դառնում նորացնել ուսումնական պրոցեսը, մշակել անգլերենի դասավանդման նոր միջազգային չափանիշներին համապատասխան մեթոդներ՝ պահպանելով դասավանդման ավանդույթները:

Ամբիոնի դասախոսները հեղինակ են մի շարք դասագրքերի, ուսումնական ձեռնարկների և տեխնիկական բառարանների, որոնք նախատեսված են բնագիտական ու ճշգրիտ, նաև հումանիտար ոլորտների համար:

Ամբիոնի կրթական քաղաքականությունը բխում է միջազգային և շուկայական հարաբերությունների զարգացման ներկա պայմաններում մասնագիտական տարբեր բնագավառների կողմից սովորողներին առաջադրվող պահանջներից:

Այսօր անգլերեն լեզվի թիվ 1 ամբիոնը Մ. Ապրեսյանի ջանքերի շնորհիվ դարձել է միջազգային թեստավորման կենտրոն, որը հաջողությամբ է անցկացնում TOEFL-ի (անգլերենի որպես օտար լեզվի թեստ) և ITEP (անգլերենի իմացության միջազգային թեստ) դասընթացներ և քննություններ անգլերեն լեզվի իմացության միջազգային վկայագրի տրամադրմամբ:

Այսօր ամբիոնը նաև կազմակերպում է մասնագիտական անգլերենի (Professional English) ուսուցումը ԵՊՀ-ի վարչական և տարբեր մասնագիտություններ ներկայացնող պրոֆեսորադասախոսական կազմի համար:

Ամբիոնի նպատակն է տարբեր բնագավառներում մասնագիտացող ապագա գիտնականներին տալ մասնագիտական անգլերենի հուսալի գիտելիքներ ու հմտություններ, որոնք կօգնեն նրանց ներկայացնելու ՀՀ գիտական պոտենցիալը միջազգային ասպարեզում:

Անգլերեն լեզվի թիվ 2 ամբիոնը հիմնադրվել է 1993 թվականին: Ամբիոնի ստեղծման օրից այն ղեկավարում է բանասիրական գիտությունների դոկտոր, պրոֆեսոր Ե. Երզնկյանը: Ամբիոնը Երևանի պետական համալսարանի համակարգում իր դեմքն ունեցող, հստակ կազմակերպված, կուռ օղակ է, որն իր գործունեությունը ծավալում է մի քանի ուղղություններով` ուսումնական, ուսումնամեթոդական, գիտական, հրատարակչական և դաստիարակչական:

Ամբիոնը ներկայացնում են ավելի քան քառասուն դասախոսներ, այդ թվում բանասիրական գիտությունների 1 դոկտոր, 13 թեկնածուներ, 1 պրոֆեսոր, 7 դոցենտներ, 6 ասիստենտներ, թարգմանիչներ, հմուտ դասախոսներ:

Ամբիոնն ապահովում է անգլերեն լեզվի դասավանդումը ԵՊՀ հետևյալ ֆակուլտետներում` հայ բանասիրության, ժուռնալիստիկայի, ռուս բանասիրության, արևելագիտության, միջազգային հարաբերությունների, տնտեսագիտության, ինչպես նաև մաթեմատիկայի և մեխանիկայի ֆակուլտետի ակտուարական և ֆինանսական մաթեմատիկայի բաժնում:

Դասավանդման հիմքում ընկած են անգլերենը որպես օտար/երկրորդ լեզու` (EFL/ESL) և անգլերենը մասնագիտական/ակադեմիական նպատակներով (ESP/EAP) դասընթացները, որոնք միանգամայն արդյունավետ և օտար լեզուների դասավանդման առավել նոր մոտեցումներ են ու լայն տարածում են գտել ողջ աշխարհում:

Ուսուցման եռաստիճան համակարգի անցնելու կապակցությամբ ամբիոնը վերամշակել և ստեղծել է բակալավրիատի և մագիստրատուրայի փուլերում անգլերենի համակողմանի ուսումնասիրությանը նպատակաուղղված նոր ուսումնական ծրագրեր, որոնք հիմք են ծառայել դասագրքերի, մեթոդական ձեռնարկների, քրեստոմատիաների, ուսումնական բառարանների, տեղեկատուների, մեթոդական ուղեցույցների և այլ օժանդակ նյութերի համար:

Օտար լեզվի ուսուցման գործնական նպատակը ծրագրի սահմաններում հաղորդակցական հիմք ստեղծելն է, այսինքն` ըստ իրադրությունների կարողանալ օտար լեզվով արտահայտվել (թե´ բանավոր և թե´ գրավոր) նախատեսված թեմաների շուրջ և լեզվական նյութի սահմաններում հասկանալ ընթերցած կամ ունկնդրած տեքստերը: Անգլերենի, ինչպես նաև մյուս օտար լեզուների դասավանդման գործընթացը նպատակաուղղված է սովորողների մոտ հաղորդակցական կարողություններ զարգացնելուն տարբեր բաղադրիչներով` ընդգրկելով խոսքային գործունեության բոլոր 4 հմտությունները` լսել/ունկնդրել, խոսել, կարդալ/ընթերցել, գրել:

Ուսումնական գործընթացում իրականացվում է անհատական մոտեցում, որը թույլ է տալիս բացահայտել յուրաքանչյուր ուսանողի գիտելիքների մակարդակը և օգնում է համեմատաբար թույլ ուսանողներին հաղթահարել դժվարությունները և լիարժեք ընդգրկվել ուսումնական գործընթացի մեջ: Դրան նպաստում է ամբիոնի դասախոսների կողմից շուրջ 10 տարի կիրառվող համակարգչային Edusoft - English Discoveries ծրագիրը, որն առավել արդյունավետ է դարձնում ուսուցման/ուսումնառության գործընթացը: Ծրագիրն ընդգրկում է 12 մակարդակներ` սկսնակից մինչև բարձր (basic-executive), ներառյալ գործարար անգլերենը (Business English):

Ամբիոնը, մշակելով Edusoft - English Discoveries համակարգչային ծրագրի հիման վրա մեթոդական և ուսումնական նյութեր, աշխատում է համակարգչային ծրագրի միջոցով անգլերենի ուսուցման հարցերի տեսական հիմնավորման ուղղությամբ:

Ամբիոնում գիտական աշխատանքներ են կատարվում իմաստաբանության և բառարանագրության, գործաբանության և տեքստի լեզվաբանության, ինչպես նաև լեզուների զուգադրական ուսումնասիրության և թարգմանության տեսության ոլորտներում: Լեզվի իմաստաբանական կարգերի ուսումնասիրության ոլորտում դիտարկվում են բառիմաստի և համատեքստի փոխազդեցության խնդիրներն ու առանձնահատկությունները, վերլուծվում է երկխոսությունը կառուցվածքային, իմաստային և գործաբանական տեսանկյուններից: Ուսումնասիրվում է լեզվի և մշակույթի փոխհարաբերությունը բառի իմաստային կառուցվածքի վերլուծության միջոցով, որի նպատակն է վեր հանել անգլերենի և հայերենի, անգլերենի և այլ օտար լեզուների անհամարժեք բառապաշարները:

Գիտական աշխատանքների ոլորտում ուշադրության է արժանի այն փաստը, որ ամբիոնում պարբերաբար իրականացվում են տարբեր գիտահետազոտական թեմաների ուսումնասիրություն, այդ թվում պետական ֆինանսավորմամբ: Ամբիոնի դասախոսները ամբիոնի վարիչ Ե. Երզնկյանի ղեկավարությամբ կատարել են հետևյալ ուսումնասիրությունները` «Հայերենից լեզվական տրանսֆերի (փոխանցման) առանձնահատկությունները անգլերեն լեզվի լսարանում» (2005 - 2007 թթ.), «Երկխոսությունը միջմշակութային համատեքստում» (2008 - 2010 թթ.):

Վերոհիշյալ աշխատանքների արդյունքները ամփոփված են ամբիոնի դասախոսների կողմից հեղինակած մի շարք մենագրություններում, ինչպես նաև պարբերաբար ներկայացվում են թե´ տեղական և թե´ միջազգային նշանակության տարբեր հրապարակումներում:

Ամբիոնը հրատարակում է գիտական աշխատանքների ժողովածու` «Օտար լեզուները բարձրագույն դպրոցում»: Գիտական աշխատությունների միջբուհական այս տարեգիրքն ընդգրկում է լեզվաբանության տարբեր խնդիրներին, ինչպես նաև օտար լեզվի դասավանդման մեթոդիկային և արտասահմանյան գրականությանը վերաբերող հոդվածներ:

Ամբիոնը շարունակում է աշխատել թեստային համակարգի հիմնադրույթների մշակման և կատարելագործման խնդիրների ուղղությամբ` նպատակ ունենալով մշակել լեզվի տիրապետման տարբեր մակարդակների պահանջներ:

Ամբիոնի դասախոսները մեծ աշխատանք են տանում ուսանողների դաստիարակության ուղղությամբ: Ամբիոնին կից գործում է English Club ակումբը, որը հնարավորություն է տալիս ուսանողներին հանդես գալ իրենց հուզող հարցերով, մասնակցել տարբեր հարցերի շուրջ քննարկումներին, հանդես գալ զեկուցումներով: Այս ամենը նպաստում է ուսանող-դասախոս հարաբերությունների ջերմացմանը և օգնում է արժեքային համակարգի ձևավորմանը:

Ամբիոնի դասախոսների աջակցությամբ ուսանողները մասնակցում են տարբեր ուսանողական գիտաժողովների և մրցույթների: Մասնավորապես նշենք, որ շուրջ տասը տարի շարունակ ԵՊՀ միջազգային հարաբերությունների, տնտեսագիտության և ժուռնալիստիկայի ֆակուլտետների ուսանողները գրավում են առաջին տեղը Անգլախոսների միության (ESU - English Speaking Union) մրցույթներում և արժանանում պատվոգրերի ու մրցանակների ՄԱԿ-ի հայաստանյան գրասենյակի կողմից կազմակերպված միջոցառումներում:

Ֆրանսիական բանասիրության ամբիոնը անցել է զարգացման կարճ, բայց արգասավոր ուղի` բանասիրության ֆակուլտետի ենթաբաժնից վերածվելով ԵՊՀ կարևորագույն ամբիոններից մեկը: Այն ստեղծվել է 2009-2010 ուսումնական տարում` անջատվելով ռոմանական բանասիրության ամբիոնից: Լինելով նորաստեղծ ամբիոն, բայց անցյալում ունենալով մեծ նվաճումներ, ֆրանսիական բանասիրության ամբիոնը շարունակում է իր ավանդական գործունեությունը` պատրաստելով որակյալ մասնագետներ, որոնք այսօր աշխատում են ՀՀ կառավարությունում, նախարարություններում, պետական և մասնավոր ձեռնարկություններում, կրթօջախներում:

Նորաստեղծ ֆրանսիական բանասիրության ամբիոնը ներկայումս գլխավորում է մանկավարժական գիտությունների թեկնածու, դոցենտ Զավեն Հարությունյանը:

Ամբիոնն ապահովված է կաբինետներով, գեղարվեստական և մասնագիտական հարուստ գրադարանով, որը մշտապես համալրվում է նորագույն մասնագիտական գրականությամբ և դասագրքերով Ֆրանսիայի դեսպանատան, ինչպես նաև այլ կազմակերպությունների հետ համագործակցության շնորհիվ:

Ֆրանսիական բանասիրության ամբիոնն ունի գիտական մեծ ներուժ, որի վկայությունն են մեր դասախոսների հեղինակած մենագրությունները, դասագրքերը, մեթոդական ձեռնարկներն ու բառարանները:

Հիշատակելի են Զ. Հարությունյանի «Լեզվի խոսքայնացումը և հոլովական իմաստները», Ս. Խաչատրյանի «Մարդու իրավունքները միջազգային փաստաթղթերում», Ա. Ղարիբյանի և Մ. Ջուլհակյանի կազմած «Ֆրանսերենի ընթերցանության ձեռնարկը» և «Ֆրանսիայի պատմության և երկրագիտության ձեռնարկը», Թ. Բլբուլյանի «Ֆրանսերեն լեզվի արտասանական-ուղղախոսական ուղեցույցը», Գ. Սարգսյանի «Թարգմանություն և թարգմանաբանություն ձեռնարկը», «Ֆրանսերենի դասագիրք»-ը և այլ աշխատություններ:
2009 թ. լույս է տեսել նախադեպը չունեցող «Ֆրանսերեն-հայերեն» մեծ բառարանը` Ա. Մուրադյանի ընդհանուր խմբագրությամբ:

Ֆրանսիական բանասիրության ամբիոնի գործունեության կարևորագույն ոլորտներից են նաև թարգմանությունն ու թարգմանագիտությունը: Ամբիոնի դասախոսների ուժերով հայերեն են թարգմանվել ֆրանսիական գեղարվեստական, ինչպես նաև լեզվաբանական գրականության բազմաթիվ դասական և ժամանակակից երկեր:

Ամբիոնն առաջնահերթ կերպով զբաղվում է մայր բուհում ֆրանսերենի դասավանդման մեթոդական և կազմակերպական խնդիրներով` առարկայական ուսումնական ծրագրերի վերանայում և վերախմբագրում, երիտասարդ դասախոսների մասնագիտական որակի բարձրացում: Ուսումնամեթոդական աշխատանքներ են ծավալվել նաև ԵՊՀ Իջևանի մասնաճյուղում:

Ներկայումս ամբիոնի 7 դասախոսներ և 5 հայցորդներ (Գյումրիից և Երևանից) աշխատում են ատենախոսական թեզերի վրա:

ԵՊՀ Ֆրանսիական բանասիրության ամբիոնը սերտ համագործակցում է Ֆրանսիայի Մոնպելիեի Պոլ Վալերիի անվան և Էքս-ան-Պրովանսի համալսարանների հետ:

Ամբիոնի նախաձեռնությամբ ԵՊՀ-ն անդամակցել է ֆրանկոֆոնիայի համալսարանկան միջազգային կազմակերպությանը, որը եվրոպական մակարդակի ուսումնամեթոդական և գիտահետազոտական լայն գործունեություն ծավալելու հնարավորություն է ընձեռում:

Ռոմանական բանասիրության ամբիոնը ստեղծվել է 1991 թվականին: Ի սկզբանե ամբիոնը ապահովում էր երեք օտար լեզուների դասավանդում` ֆրանսերեն, իսպաներեն և իտալերեն, իսկ ավելի ուշ` 2007 թվականից, մագիստրատուրայում դասավանդվում է նաև պորտուգալերեն: 2009 թվականից ի վեր ամբիոնն ապահովում է միայն ռոմանական երեք լեզուների (իսպաներեն, իտալերեն, պորտուգալերեն) դասավանդումը, ընդ որում իսպաներենն ու իտալերենը դասավանդվում են և' որպես հիմնական լեզու, և' որպես երկրորդ մասնագիտական լեզու:

Ամբիոնում դասավանդում են ինչպես երկարամյա մանկավարժական փորձ ունեցող մասնագետներ, այնպես էլ երիտասարդ հմուտ դասախոսներ: Օտար լեզուների դասավանդման մեջ ակնհայտ են լեզուների ուսուցման արդի մոտեցումները, հաջողությամբ զուգակցվում են դասավանդման հաղորդակցական և ավանդական մեթոդները: Ամբիոնն իր գործունեությունը ծավալում է մի քանի հիմնական ուղղություններով` ուսումնական, ուսումնամեթոդական, գիտական և թարգմանական: Ամբիոնում իրականացվում են մի շարք հետազոտական աշխատանքներ, որոնք ներառում են գիտական հետաքրքրությունների լայն շրջանակ և առնչվում են ռոմանական բանասիրության տարբեր հիմնահարցերի` իմաստաբանություն, դարձվածաբանություն, գործաբանություն, թարգմանաբանություն և այլն:

Ամբիոնի դասախոսները հրատարակել են մի շարք ուսումնական ձեռնարկներ, դասագրքեր, բառարաններ և ուսումնաօժանդակ նյութեր: Ամբիոնի աշխատանքներին ակտիվորեն մասնակցում են նաև Իսպանիայից, Իտալիայից և Բրազիլիայից հրավիրված մասնագետներ, որոնք իրականացնում են գիտամանկավարժական լուրջ աշխատանք: Սերվանտեսի ինստիտուտի և Իսպանիայից ժամանած դասախոսների հետ համագործակցությամբ ամբիոնում կազմակերպվում են «Իսպաներենը որպես օտար լեզու» դիպլոմի որակավորման միջազգային քննություններ, իսկ Սիենայի համալսարանի հետ համագործակցությամբ` իտալերեն լեզվի որակավորման քննություն` ըստ լեզուների իմացության եվրոպական չափանիշների:

Ամբիոնի գործունեության կարևոր օղակներից է թարգմանության տեսական և գործնական խնդիրների քննությունը, ինչպես նաև իսպաներենից հայերեն և հայերենից իսպաներեն կատարած մի շարք թարգմանությունները: 2010 թվականից ի վեր ամբիոնը հրատարակում է «Ծաղիկ թարգմանչաց» մատենաշարը , որն ամփոփում է իսպաներենի և իտալերենի բաժինների ուսանողների թարգմանությունները՝ իսպաներենից, իտալերենից հայերեն և հակառակը: Ամբիոնը հրատարակում է նաև գիտական աշխատանքների ամենամյա ժողովածու` «Ռոմանական բանասիրության արդի խնդիրներ», որն ընդգրկում է արդի լեզվաբանության և օտար լեզուների դասավանդման մեթոդիկայի վերաբերյալ գիտական բազմաբնույթ հոդվածներ:

ԵՊՀ գերմանական բանասիրության ամբիոնը կազմակերպում է գերմաներեն լեզվի ուսուցումը համալսարանի բոլոր հումանիտար և բնագիտական ֆակուլտետներում, ինչպես նաև պատրաստում է գերմանագետ մասնագետներ (բանասեր, մանկավարժ) ռոմանագերմանական բանասիրության ֆակուլտետում: Ուսուցումը կազմակերպվում է ինչպես բակալավրատում, այնպես էլ մագիստրատուրայում: Ամբիոնում աշխատում են թ՞ե երկարամյա փորձ ունեցող և թ՞ե սկսնակ դասախոսներ, որոնք համարյա բոլորը ստացել են բարձր որակավորում Գերմանիայի և Ավստրիայի տարբեր համալսարաններում: Ուսման ընթացքում գործադրվում են միջազգային ճանաչում գտած լեզուների ուսուցման առաջավոր մեթոդներ, իսկ տեսական գիտելիքները մատուցվում են ժամանակակից լեզվաբանական գիտության նվաճումների հաշվառումով: Առանձին ուշադրության է արժանանում «Գերմաներենը որպես 2-րդ մասնագիտական օտար լեզու» ուսուցումը ԵՊՀ ռոմանագերմանական բանասիրության ֆակուլտետում, որտեղ կիրառվում է դասավանդման յուրահատուկ մեթոդաբանություն:

Բնագիտական և հումանիտար ֆակուլտետներում գերմաներեն լեզվի ուսուցումը կազմակերպվում է այն նպատակադրմամբ, որ համապատասխան որակավորում ստացող ուսանողները կարողանան ազատ հաղորդակցվել և օգտվել գերմաներեն լեզվով գրականությունից:

Թ՞ե բակալավրատում և թ՞ե մագիստրատուրայում բարձր առաջադիմությամբ ուսանողները հնարավորություն են ստանում կատարելագործել իրենց լեզվական գիտելիքները Գերմանիայի և Ավստրիայի առաջավոր համալսարաններում, իսկ մագիստրատուրայի առանձին ուսանողներ` այնտեղ անցկացնելու իրենց նախադիպլոմային պրակտիկան:

Ամբիոնի դասախոսների ուժերով հրատարակվել և հրատարակվում են տարբեր բնույթի դասագրքեր, բառարաններ և ուսումնաօժանդակ նյութեր: Ամեն տարի Գերմանիայից և Ավստրիայից հրավիրվում են բարձրակարգ մասնագետներ, որոնք իրականացնում են ինչպես մանկավարժական, այնպես էլ գիտական աշխատանք:

Ամբիոնի դասախոսներն ակտիվորեն մասնակցում են տարբեր միջազգային և տեղական նշանակության գիտաժողովների ու սեմինարների և ունեն նկատելի ձեռքբերումներ:

Բարի գալուստ ԹԱՐԳՄԱՆԻՉՆԵՐԻ աշխարհ…

«Թարգմանչական գործ» մասնագիտացումը ձեռնարկվեց 1992թ. ռոմանագերմանական բանասիրության ֆակուլտետի հիմնադրումից մեկ տարի անց:

Ֆակուլտետի անգլիական բանասիրության ամբիոնում, որը ղեկավարում է բ.գ.դ., պրոֆեսոր Ս. Գասպարյանը, ձևավորվեց թարգմանչական բաժին, որտեղ հատուկ առանձնացված թարգմանելու ձիրք ունեցող ուսանողները սկսեցին ուսումնասիրել գրավոր և բանավոր թարգմանության հիմունքները, նրանց համար մշակվեցին մի շարք հատուկ տեսական և գործնական դասընթացներ: Թարգմանչական բաժնի ղեկավար նշանակվեց բ.գ.դ., պրոֆեսոր Ս. Սեֆերյանը:

Արդեն իսկ 1999թ. ռոմանագերմանական բանասիրության ֆակուլտետում ներմուծվեց «Թարգմանչական գործ» առանձին մասնագիտությունը, որտեղ 1-ին կուրսից սկսած ապագա թարգմանիչներ են պատրաստվում` խորությամբ ուսումնասիրելով թարգմանչի մասնագիտական առարկաներ և մասնագիտական տեսանկյունից մոտենալով օտար լեզվի կիրառմանը:

Ելնելով որակյալ թարգմանիչների ժամանակակից մեծ պահանջարկից` 2009թ.-ին ստեծվեց թարգմանության տեսության և պրակտիկայի ամբիոնը, և ամբիոնի վարիչ ընտրվեց մ.գ.թ., դոցենտ Կ. Կարապետյանը:

Ամբիոնի կազմում ընդգրկված են բարձրակարգ դասախոսներ, որոնք ունեն թարգմանչական, գիտական և մանկավարժական մեծ փորձ և հանրապետական ճանաչում, ինչպիսիք են բ.գ.դ., պրոֆեսոր Ս.Սեֆերյանը, բ.գ.թ., դոցենտ Լ.Հովհաննիսյանը, բ.գ.թ. դոցենտ Գ.Գևորգյանը, դոցենտ Ն.Վարդանյանը, բ.գ.թ., դոցենտ Ա.Հակոբյանը և ուրիշներ:

Իր հիմնադրումից ի վեր` ավելի քան տաս տարի թարգմանչական բաժինը բեղուն ուսումնական և գիտական գործունեություն է ծավալում ֆակուլտետում` ոչ միայն որակյալ թարգմանիչներ պատրաստելով, այլ նաև դասագրքեր, ուսումնական ձեռնարկներ և հոդվածների ժողովածուներ հրատարակելով: Թարգմանչաց դպրոցի մի շարք սաներ պաշտպանեցին ատենախոսություններ` 1 դոկտորական և 10 թեկնածուական:

Թարգմանության տեսության և պրակտիկայի ամբիոնի նպատակն է պատրաստել որակյալ թարգմանիչներ` հանրապետության տարբեր ոլորտներում աշխատելու համար: Այսօր թարգմանչական բաժնի շատ շրջանավարտներ թարգմանական գործունեություն են իրականացնում մասնագիտական տարբեր բնագավառներում` աշխատելով պետական տարբեր կառույցներում, միջազգային կազմակերպություններում, առևտրային ձեռնարկություններում և այլն:

Իր ստեղծման օրից ի վեր` ամբիոնը բազմաբնույթ բեղմնավոր գործունեություն է ծավալում` շարունակելով դեռևս 70-ական թթ. հիմնադրված ԵՊՀ թարգմանչական դպրոցի ավանդույթները. կազմվում և հրատարակվում են դասագրքեր, մենագրություններ, բառարաններ, ինչպես նաև բազմաթիվ գիտական հոդվածներ` նվիրված գրավոր և բանավոր թարգմանության տեսական և գործնական հարցերին: Քննության է առնվել «Թարգմանչական գործ» մասնագիտության ուսումնական պլանը` համալրվելով մի շարք արդիական ուղղվածություն ունեցող տեսական և գործնական մասնագիտական դասընթացներով:

Ամբիոնում լեզվի իմացության հիմքի վրա պատրաստվում են թարգմանիչներ երեք լեզուներով` անգլերեն, ֆրանսերեն և գերմաներեն: Ուսուցումը տարվում է հետևյալ գործնական ուղղություններով` գեղարվեստական թարգմանություն, մասնագիտական թարգմանություն և բանավոր թարգմանություն /հաջորդական և համաժամանակյա ուղղություններով/:

Դասընթացները տեղի են ունենում տեխնիկապես հագեցած լսարաններում /համակարգիչներ, հեռուստացույցներ, DVD-ներ, ձայնագիչներ, համացանցից օգտվելու հնարավորություն/: Անգլիական բաժնի բակալավրիատի շրջանավարտները հնարավորություն ունեն իրենց ուսումը շարունակել մագիստրատուրայում: Նախատեսված է մագիստրոսական ծրագիր ներմուծել նաև ֆրանսիական և գերմանական բաժինների համար: Ուսանողներն իրենց թարգմանչական պրակտիկան անցկացնում են մայրաքաղաքի տարբեր կազմակերպություններում, որտեղ շատ է կարևորվում թարգմանչի աշխատանքը:

Ամբիոնի գիտական աշխատանքը զարգանում է հետևյալ հիմնական ուղղություններով.
ա/ թարգմանության պատմության և տեսության հիմնախնդիրներ, թարգմանությունը որպես առանձին գիտակարգ և որպես բանասիրական և գրականագիտական քննության առարկա;
բ/ գեղարվեստական թարգմանության տեսական և գործնական հարցեր;
գ/ մասնագիտական տեքստերի թարգմանության առանձնահատկությունները;
դ/ բանավոր թարգմանության առանձնահատկությունները;
ե/ թարգմանության դասավանդման մեթոդները;
զ/ թարգմանության ոճագիտական, բառագիտական և քերականական խնդիրները /զուգադրական ոճագիտություն, զուգադրական բառագիտություն, զուգադրական քերականություն/;
է/ շեքսպիրագիտություն և բայրոնագիտություն;
ը/ տարբեր արտասահմանյան հեղինակների հայերեն թարգմանված գեղարվեստական գործերի ուսումնասիրություն` վեր հանելով տարբեր թարգմանական հարցեր բնագրի և թարգմանության համեմատության և զուգադրման միջոցով:

Ամբիոնում իրականացվող գիտահետազոտական աշխատանքի շրջանակներում ղեկավարվում են ասպիրանտների և հայցորդների թեկնածուական ատենախոսություններ (այդ թվում օտարերկրյա հայցորդներ և ասպիրանտներ)` նվիրված թարգմանության տեսական և գործնական տարբեր հարցերի ուսումնասիրությանը:

2011թ. ապրիլի 14-15, 22-ին ամբիոնը կազմակերպեց հանրապետական գիտաժողով «Թարգմանության տեսական և գործնական հարցեր» խորագրով` առանձին հոդվածաշարով հրատարակելով գիտաժողովի նյութերը:

Այսօր կարող ենք վստահ ասել, որ հարուստ պատմություն ունեցող թարգմանչական ավանդույթները մեր հանրապետությունում շարունակվում են: ԵՊՀ թարգմանչական բաժինը և թարգմանության տեսության և պրակտիկայի ամբիոնը ներկայացնում են հայկական ժամանակակից թարգմանչաց դպրոցը: Այն իր մեջ ներառում է նաև ԵՊՀ Շեքսպիրագիտության կենտրոնը, որտեղ բեղուն գործունեություն են ծավալում թարգմանության տեսության և պրակտիկայի ամբիոնի դասախոսները /հրատարակվում են Շեքսպիրին նվիրված տարբեր ուսումնասիրություններ, անցկացվում թարգմանական մրցույթներ, կազմակերպվում գիտաժողովներ/:

Արտասահմանյան գրականության պատմությունը Երևանի համալսարանի հիմնադրման օրից մտել է պատմալեզվագրական ֆակուլտետի ուսանողների համար հատկացվող դասընթացների շարքը: 20-ական թվականներից այդ դասընթացները կարդացել են այնպիսի ականավոր գրականագետ-բանասերներ, ինչպես Սիմեոն Հակոբյանը, Սարգիս Մանուկյանը, նշանավոր գրող, եվրոպական լեզուների և մշակույթի հիանալի գիտակ Զապել Եսայանը: Մի փոքր ավելի ուշ սկսվում է գրականագիտության տեսական հիմունքների դասավանդումը, որը վարում էր հայտնի գրականագետ-քննադատ Ցոլակ Խանզադյանը:

1929 թվականին Հայաստանում համալսարանական ուսուցման զարգացման պահանջներին համապատասխան ստեղծվում են գրականության առանձին ամբիոններ, այդ թվում և արտասահմանյան գրականության ամբիոն: Տասը տարի ամբիոնը ղեկավարում էր պրոֆ. Սիմոն Հակոբյանը: Այդ տարիներին լույս ընծայվեցին մի շարք դասագրքեր` «Եվրոպական գրականության գլխավոր էջերը», Ա. Լունաչարսկու, Պ. Կազանի, Ֆ. Շիլլերի հայտնի ձեռնարկները, որոնք թարգմանվել և հրատարակվել են հայերեն: 30-ական թվականներից ամբիոնում դասավանդում էին Լենինգրադի արվեստագիտական ակադեմիայի ասպիրանտուրան ավարտած երիտասարդ գիտնականներ Հովհ. Մամիկոնյանը և Ս. Սողոմոնյանը, որոնք հետագայում գլխավորում են արտասահմանյան գրականության ամբիոնը (Հ. Մամիկոնյանը` 1957 - 1970, Ս. Սողոմոնյանը` 1970 - 1978 թթ.): Պետք է հիշատակել Հ. Մամիկոնյանի «Արտասահմանյան գրականության պատմություն. Վերածնության շրջան» դասագիրքը, Ս. Սողոմոնյանի «Եվրոպական գրականության ուրվագծեր», «Եվրոպական ռեալիզմի պատմությունից» ուսումնասիրությունները:

1956 թ. գրականության տեսության առարկաները անջատվում են արտասահմանյան գրականության ամբիոնից և տրվում այլ ամբիոնների:

1982 թ. արտասահմանյան գրականության և գրականության տեսության ամբիոնները համախմբվում են մեկ միասնական ամբիոնի մեջ, որը ղեկավարում էր ակադ. Էդ. Ջրբաշյանը, իսկ 1986 թ. հունվարից մինչև 2007 թ. մայիսը` բանասիրական գիտությունների դոկտոր, պրոֆեսոր Հ. Էդոյանը:

2007 թ. արտասահմանյան գրականության և գրականության տեսության ամբիոնը բաժանվում է երկու առանձին ամբիոնների` գրականության տեսության (վարիչ` բ. գ. դ., պրոֆ. Ժ. Քալանթարյան) և արտասահմանյան գրականության, որի աշխատանքները շարունակում է ղեկավարել Հ. Էդոյանը: 2007 թ. սեպտեմբերին նա վերընտրվում է արտասահմանյան գրականության ամբիոնի վարիչ: 2009 թ.-ին ամբիոնի վարիչ է ընտրվում բ. գ. թ., դոցենտ Արա Առաքելյանը:

Միացյալ ամբիոնն ուներ բավական ուժեղ դասախոսական կազմ` բանասիրական գիտությունների դոկտոր, պրոֆ. Ա. Հարությունյան, դոկտոր Կ. Մատինյան, դոցենտներ Ն. Սանթրոսյան (որը եվրոպական գրականություններին զուգահեռ դասավանդում էր նաև լատիներեն), Վ. Նավասարդյան, Ա. Բեքմեզյան, Ա. Ջրբաշյան, Ս. Հարությունյան, Յու. Խաչատրյան, բ. գ. թ., ասիստենտներ Ա. Սեդրակյան և Ն. Գոնչար-Խանջյան, ասիստենտ Ա. Մարտիրոսյան: 2007 թ. համալսարանից ազատվում են պրոֆ. Ա. Հարությունյանը, դոց. Ն. Սանթրոսյանը:

Ամբիոնը քայլեր է ձեռնարկել ուսումնական և օժանդակ գրականությունների հրատարակության ուղղությամբ: Տպագրվել է «Գրականագիտության ներածության քրեստոմատիա» (կազմողներ` Ա. Բեքմեզյան, Վ. Նավասարդյան), թարգմանվել և հրատարակվել են Ս. Արտամոնովի «17-18-րդ դարերի արտասահմանյան գրականության պատմությունը», «20-րդ դարի արտասահմանյան գրականության պատմությունը» կոլեկտիվ աշխատանքը, «Ուսանողի գրադարան» մատենաշարով հայերեն հրատարակվել են Համաշխարհային գրականության մի շարք նշանավոր գրական հուշարձաններ /Գյոթե` «Բանաստեղծություն և ճշմարտություն», «Հին արևելքի պոեզիա», «Գերմանական նորավեպ», «Ֆրանսիական կլասիցիզմ», «Ֆրանսիական պոեզիա», «Ամերիկյան պատմվածքներ», «Ժամանակակից արտասահմանյան դրամատուրգիա»-ի երկու հատորները և այլն: Ամբիոնի գիտական կարևոր հրատարակություններից են պրոֆ. Հ. Էդոյանի «Եղիշե Չարենցի պոետիկան», պրոֆ. Ա. Հարությունյանի «Ետպատերազմյան ամերիկյան պոեզիան», դոկտոր Կ. Մատինյանի «Ավստրիական դրամատուրգիան 20-րդ դարի երկրորդ կեսին», դոց. Ա. Սեդրակյանի «Էզ. Փաունդի էսթետիկական հայացքները», դոց. Ա. Բեքմեզյանի «Վիպակի ժանրը 20-րդ դարասկզբի հայ գրականության մեջ» աշխատությունները:

Շուրջ 3 տարի է, ինչ ամբիոնի պրոֆեսորադասախոսական կազմի ջանքերով շարունակվում է հրատարակվել «Համատեքստ» տարեգիրքը, որտեղ տպագրվում են ինչպես ամբիոնի, այնպես էլ հանրապետության այլ մասնագետների գիտական աշխատանքները: Ամբիոնում վերջին տարիների ընթացքում պաշտպանվել է արտասահմանյան գրականության մասնագիտությամբ ավելի քան 6 թեկնածուական ատենախոսություն:

Միջմշակութային հաղորդակցության ոլորտի բարձրակարգ մասնագետներ պատրաստելու նպատակով 2006-2007 ուստարում անգլիական բանասիրության ամբիոնում բացվեց նոր մասնագիտություն` «Լեզվաբանություն և միջմշակութային հաղորդակցություն` անգլերեն»: Հայաստանի և աշխարհի տարբեր երկրների միջև մշտապես զարգացող տնտեսական, միջազգային, կրթական, մշակութային կապերի շնորհիվ այսօր միջմշակութային հաղորդակցության ոլորտի լեզվաբանությունը լայն պահանջարկ ունեցող մասնագիտություն է: Աշխարհում տեղի ունեցող համընդհանուր գործընթացների` գլոբալիզացիայի շնորհիվ այսօր առավել քան երբևէ կարևորվում է անգլերենը` որպես տարբեր լեզվամշակույթներ կամրջող հաղորդակցման միջոց:

Այս նկատառումներով 2012թ. սեպտեմբերին անգլիական բանասիրության ամբիոնի հիման վրա բացվեց նոր` «Միջմշակութային հաղորդակցության անգլերենի» ամբիոնը: Նորաստեղծ ամբիոնի վարիչի պարտականությունները ստանձնեց բ.գ.դ., դոցենտ Շ. Պարոնյանը:

Միջմշակութային հաղորդակցության անգլերենի ամբիոնի նպատակն է պատրաստել անգլերենի բարձրակարգ մասնագետներ, որոնք կկարողանան արդյունավետ հաղորդակցվել տարբեր լեզվամշակույթների ներկայացուցիչների հետ` կիրառելով լեզուների հարմարակման մեխանիզմը:

Ներկայումս միջմշակութային հաղորդակցության անգլերենի ամբիոնում կատարվում է լայնածավալ ուսումնամեթոդական և գիտահետազոտական աշխատանք` ուղղված լեզվի և մշակույթի, ճանաչողական լեզվաբանության, միջմշակութային գործաբանության տարբեր բնագավառներին առնչվող խնդիրների լուծմանը:

Միջմշակութային հաղորդակցության անգլերենի ամբիոնն ունի 14 առաջատար մասնագետ, այդ թվում` բանասիրական գիտությունների երկու դոկտոր, դոցենտ (Շ. Պարոնյան, Ն. Հարությունյան), հինգ բանասիրական գիտությունների թեկնածու, ասիստենտ (Մ. Յաղուբյան, Ա. Այունց, Ա. Խաչատրյան, Մ. Օհանյան, Ա. Ռոստոմյան), երիտասարդ դասախոսներ, որոնցից շատերը զբաղվում են գիտական աշխատանքով և պաշտպանության են պատրաստում թեկնածուական ատենախոսություններ բանասիրական տարբեր գիտակարգերի ոլորտում:
2012-2013 ուստարում ամբիոնը տվել է իր առաջին մագիստրոս շրջանավարտները, ովքեր հնարավորություն կունենան աշխատելու տարբեր միջազգային կազմակերպություններում, գովազդային գործակալություններում, տուրիզմի և բանկային ոլորտներում:

Ուսուցման եռաստիճան համակարգը թույլ է տալիս նաև ուսումը շարունակել ասպիրանտուրայում` կատարելով միջմշակութային հաղորդակցության խնդիրներին առնչվող լեզվաբանական հետազոտություն:

«Բրիտանական գրականության և լեզվամշակույթի ուսումնասիրության լաբորատորիա (Մաս առաջին` Շոտլանդական գրականության և լեզվամշակույթի ուսումնասիրություն)» ծրագիրը (գիտական ղեկավար՝ բ.գ.դ. Մ.Սարգսյան) մեկնարկել է 2017 թվականին, ԵՊՀ ռ/գ բանասիրության ֆակուլտետի անգլիական բանասիրության ամբիոնի բազայի վրա:

Ծրագրի շրջանակներում նպատակ է դրված մեկնարկելու բրիտանական գրականության և լեզվամշակույթի համալիր ուսումնասիրությունների շարք` մասնավորապես ուշադրության կենտրոնում պահելով բրիտանական ուսումնասիրությունների «չորս ազգ» մոդելը: Այս մոտեցումը մեծապես կնպաստի ինչպես բուն անգլիական գրականության և լեզվամշակույթի առավել լայն ըմբռնմանը, այնպես էլ թույլ կտա ուսումնասիրելու բրիտանական լեզվամշակույթն ու գրականությունը իր ողջ բազմազանությամբ: Ծրագրի առաջին փուլը (Scottish Studies) ուղղված է շոտլանդական լեզվամշակույթի` որպես բրիտանական մշակույթի թերևս առավել ընդգրկուն և ժամանակակից Եվրոպայի ամենադինամիկ մշակույթներից մեկի և գրականության` որպես մարդու բարոյահոգեբանական դրսևորումների և ժամանակակից մարդուն հուզող խնդիրների վերարտադրման միջոցի ուսումնասիրություններին: Ծրագրի շրջանակներում նախատեսվում է համագործակցային կապերի հաստատում Շոտլանդիայի առաջատար բուհերի համապատասխան ամբիոնների և կենտրոնների հետ և համատեղ միջոցառումների իրականացում: