01.07.2021 | 
Հասարակություն
ԵՊՀ ԻՐԱՎԱԲԱՆԱԿԱՆ ԿԼԻՆԻԿԱՅՈՒՄ ԵՎՍ ՄԵԿ ՍԵՐՈՒՆԴ ՍՏԱՑԱՎ ԳՈՐԾՆԱԿԱՆ ԳԻՏԵԼԻՔՆԵՐ. ՏԵՂԻ Է ՈՒՆԵՑԵԼ ՎԿԱՅԱԳՐԵՐԻ ՀԱՆՁՆՈՒՄ
ԵՊՀ ԻՐԱՎԱԲԱՆԱԿԱՆ ԿԼԻՆԻԿԱՅՈՒՄ ԵՎՍ ՄԵԿ ՍԵՐՈՒՆԴ ՍՏԱՑԱՎ ԳՈՐԾՆԱԿԱՆ ԳԻՏԵԼԻՔՆԵՐ. ՏԵՂԻ Է ՈՒՆԵՑԵԼ ՎԿԱՅԱԳՐԵՐԻ ՀԱՆՁՆՈՒՄ
ԵՊՀ իրավագիտության ֆակուլտետի դատական նիստերի դահլիճում տեղի է ունեցել 2020-2021 ուսումնական տարում Իրավաբանական կլինիկայի դասընթացներն ավարտած ուսանողների վկայագրերի հանձնման արարողությունը:

Իրավաբանական կլինիկան՝ որպես Իրավագիտության ֆակուլտետի կառուցվածքային ստորաբաժանում, անվճար իրավաբանական ծառայություններ է մատուցում հասարակության սոցիալապես անապահով խմբերին։

 

Մեզ հետ զրույցում Իրավաբանական կլինիկայի տնօրեն Քնարիկ Վարդանյանն ասաց, որ կլինիկան ձեռնարկում է հնարավոր բոլոր միջոցներն իրավաբանական օգնություն ստանալու նպատակով դիմող անձանց իրավունքների և օրինական շահերի համապարփակ պաշտպանությունն ապահովելու համար՝ մատուցելով տարատեսակ իրավաբանական ծառայություններ՝ դիմումների, հայցադիմումների, վերաքննիչ և վճռաբեկ բողոքների կազմում, Մարդու իրավունքների եվրոպական դատարանի գանգատի նախապատրաստում, բանավոր պարզաբանումների ու խորհրդատվության տրամադրում և այլն. «Չնայած օրենքով ամրագրված սահմանափակումներին՝ որոշ գործերով ուսանողներն իրականացնում են նաև դատական ներկայացուցչություն»։

 

Կլինիկայում իրավաբանական ծառայություններ մատուցած ուսանողների վկայագրերի հանձնման արարողության բացման խոսքում կլինիկայի տնօրեն Քնարիկ Վարդանյանը, ամփոփելով անցնող տարին, նշեց, որ չնայած բոլոր դժվարություններին՝ այն բուռն և հագեցած էր. «Այս տարի Իրավաբանական կլինիկան ավարտում է 24 ուսանող, որոնք կազմավորել էին 11 հոգուց բաղկացած քրեաիրավական/ՄԻԵԴ և 13 հոգուց բաղկացած քաղաքացիական/վարչական խմբեր: Ուսանողներից 7-ն այս տարի ներգրավված է եղել «Իրավունք բոլորի համար» ծրագրի իրականացման աշխատանքներում: Տարվա ընթացքում ունեցել ենք շուրջ 58 գործ, որոնք այս պահին գրեթե ամբողջությամբ ավարտված են։ Այն գործերը, որոնք դեռևս ընթացքի մեջ են և ամառվա ընթացքում չեն լուծվի, կշարունակվեն արդեն հաջորդ տարի կլինիկա ընդգրկված ուսանողների կողմից»:

 

 

Կլինիկայի տնօրենն ասաց, որ «Իրավունք բոլորի համար» ծրագրի շրջանակում կլինիկայի 7 ուսանող ԵՊՀ իրավաբանական կլինիկայի գործընկերներ կազմակերպությունների հետ համագործակցության տարբեր ծրագրերով, ինտերակտիվ մեթոդների կիրառմամբ, իրավունքի տարբեր թեմաներով անցկացրել է դասընթացներ հանրակրթական դպրոցներում կամ ընդունել աշակերտներին ԵՊՀ-ում։

 

ԵՊՀ իրավագիտության ֆակուլտետի դեկան Գագիկ Ղազինյանը, շնորհավորելով ուսանողներին, փաստեց, որ ֆակուլտետի որդեգրած քաղաքականության համաձայն՝ տեսական լավ հիմքի վրա ուսանողներին գործնական հմտությունների փոխանցումն առաջնահերթություն է ֆակուլտետի համար։

 

«Այդ հարցում Իրավաբանական կլինիկայի գործունեությունն անմրցելի է: Այս տարի հիմք դրվեց մեր ամենամեծ ցանկություններից մեկի իրականացմանը, այն է՝  մեր բոլոր ուսանողները, առանց բացառության, ստանան կլինիկական կրթություն: Դա իրագործելու համար մենք կփորձենք ապահովել անհրաժեշտ բոլոր պայմանները։ Մասնավորապես այս տարի կլինիկան ունեցավ միջազգային չափանիշներով կահավորված և վերանորոգված նոր սենյակ, որտեղ հաճախորդները հնարավորություն ունեն գաղտնիության պայմանների պահպանմամբ ներկայացնելու իրենց խնդիրները։ Հաջորդ տարի նախատեսվում է, որ բակալավրիատի երրորդ կուրսի բոլոր ուսանողները երկրորդ կիսամյակի իրենց պրակտիկան անցկացնելու են կլինիկայում, ինչ նպատակով էլ այսօր կլինիկայում վերանորոգվում են ևս երկու նոր սենյակներ, որոնք հնարավորություն կտան ուսանողներին նորագույն ինտերակտիվ մեթոդներով և գործիքներով իրականացնելու կլինիկական կրթությունը և ավելի արդյունավետ  դարձնել այն»,- ասաց ֆակուլտետի դեկանը:

 

 

Նա իր խոսքում նշեց նաև, որ Իրավաբանական կլինիկան հաճախորդների կողմից ստացել է ԵՊՀ ռեկտորին ուղղված մի քանի շնորհակալական նամակներ, որոնցում քաղաքացիներն իրենց խորին շնորհակալությունն են հայտնել կլինիկայի ողջ աշխատակազմին և իրենց իրավախորհրդատվություն տրամադրած ուսանողներին՝ գրագետ կազմակերպված և որակյալ իրավաբանական ծառայություններ մատուցելու համար:

 

Գագիկ Ղազինյանը փաստեց, որ կլինիկայի հաջողության գրավականներից մեկն այնտեղ ձևավորված առողջ մթնոլորտն է, որն արտացոլված է մարդկային բոլոր հարաբերություններում, ինչը նպաստում է կլինիկական գործունեության արդյունավետությանը:

 

Ուսանողներին շնորհավորեց նաև կլինիկայի դասախոս-համակարգող, ՀՀ փաստաբանների պալատի փաստաբան Հայկ Ալումյանը: Նա ապագա իրավապաշտպաններին խորհուրդ տվեց այնպես գործել, որ օրենքը ոչ թե սահմանափակի իրենց գործունեությունը, այլ լինի գործիք՝ պաշտպանելու մարդու իրավունքները։

 

«Մարդու իրավունքների ինստիտուտն իրավաբանի գործունեության մեջ կարող է հանդիսանալ շատ հզոր գործիք, սակայն լավ իրավապաշտպանը նա է, որի համար մարդու իրավունքները գերագույն նպատակ են»,- ասաց Հայկ Ալումյանը և նշեց, որ այս տարի ՄԻԵԴ գրված գանգատներից մեկը յուրահատուկ էր և գուցե առաջինն իր տեսակով. այն վերաբերում է 2020 թվականի Արցախյան պատերազմի արդյունքում Շուշիում իր բնակարանը կորցրած անձի իրավունքների պաշտպանությանը:

 

 

Կլինիկայի դասախոս-համակարգող, ՀՀ տնտեսական մրցակցության պաշտպանության պետական հանձնաժողովի անդամ Տիգրան Մարկոսյանը նույնպես շնորհավորեց ուսանողներին և փաստեց, որ Իրավաբանական կլինիկայի դասընթացներին մասնակցած ուսանողները հնարավորություն են ստանում ոչ միայն զարգացնելու իրենց գործնական հմտությունները, այլև կանոնակարգված միջավայրում աշխատելու և թիմային  ջանքերով արդյունքի հասնելու փորձառություն են ձեռք բերում, ինչը շատ կարևոր է հետագա գործունեության համար: Նա նաև նշեց, որ այս տարի ուսանողների հետ իրականացվել են գիտահետազոտական մի քանի աշխատանքներ, որոնք մոտ ապագայում կհանրայնացվեն:

 

Դասախոսներն իրենց խոսքում ևս նշեցին, որ միջազգային չափանիշներին համապատասխան ձևավորած նոր աշխատասենյակը մի շարք նոր հնարավորություններ է ստեղծում Կլինիկայի աշխատանքն էլ ավելի արդյունավետ դարձնելու համար:

 

 

Կլինիկայի տնօրենի օգնական Սեդա Ստեփանյանը ևս շնորհավորեց ուսանողներին և նշեց, որ բացի տեսական և պրակտիկ գիտելիքներից՝ կլինիկայի ուսանողները ձեռք են բերում նաև բարձր մարդկային արժեքներ. «Հետագա աշխատանքի ընթացքում կլինիկայի շրջանավարտները մշտապես առավել պարզ և իրական են պատկերացնում քաղաքացիների խնդիրները»:

 

Քրեաիրավական մասնագիտացման խմբի ուսանողների անունից Արման Նիկողոսյանն իր շնորհակալությունը հայտնեց կլինիկայի աշխատակազմին և նշեց, որ կլինիկական ուսուցումը սովորեցրեց իրենց գտնել ելքեր ամենաանելանելի իրավիճակներից և հավելեց, որ առանց կլինիկայի դասընթացների իրենց առօրյան շատ ավելի անհետաքրքիր կլինի:

 

 

Կլինիկայի մեկ այլ շրջանավարտ Եղեգնի Բաբայանը քաղաքացիաիրավական մասնագիտացման խմբի անունից իր խորին շնորհազրկությունը հայտնեց ֆակուլտետի դեկանին իրենց նման հնարավորություն ընձեռելու համար, կլինիկայի աշխատակազմին՝ աշխատանքները բարձր մակարդակով կազմակերպելու և դասախոսներին իրենց տեսական ու պրակտիկ գիտելիքներ փոխանցելու համար:

 

Կլինիկայի շրջանավարտ Հարություն Եսոյանը ևս երախտագիտության խոսքեր հայտնեց Իրավաբանական կլինիկային և նշեց, որ կլինիկայում ձեռք բերված հմտություններն արդեն իսկ կիրառում են իրենց աշխատանքի ընթացքում և ցանկացած իրավական խնդիր լուծելիս հիշում իրենց դասախոսների տված խորհուրդները:

 

 

Վկայագրերի հանձնման ավարտին ուսանողներն իրենց հերթին փոխանցեցին շնորհակալագրեր ֆակուլտետի դեկան Գագիկ Ղազինյանին, դասախոսներ Հայկ Ալումյանին և Տիգրան Մարկոսյանին, կլինիկայի տնօրեն Քնարիկ Վարդանյանին, տնօրենի օգնական Սեդա Ստեփանյանին:

 

Պատրաստեց Քնար Միսակյանը

Այլ նորություններ
ՄԱԿ-Ի ՀԱՅԱՍՏԱՆՅԱՆ ԳՐԱՍԵՆՅԱԿԻ ՆԵՐԿԱՅԱՑՈՒՑԻՉՆԵՐԸ ՀԱՆԴԻՊԵԼ ԵՆ ՀԱՄԱԼՍԱՐԱՆԱԿԱՆՆԵՐԻ ՀԵՏ
«Միջազգային ժուռնալիստիկա և միջազգային կազմակերպություններ» դասընթացի շրջանակում Ժուռնալիստիկայի ֆակուլտետի ուսանողներն այսօր հանդիպել են ՄԱԿ-ի մշտական համակարգող Շոմբի Շարփին:
«ՀԱՅՐԵՆԻՔԸ ՍԿՍՈՒՄ Է ՄԵԶՆԻՑ, ՄԵՐ ԱՇԽԱՏԱՆՔԻՑ, ՄԵՐ ԱՆՀԱՏԱԿԱՆ ՄՈՏԵՑՈՒՄՆԵՐԻՑ ՈՒ ՊԱՏԿԵՐԱՑՈՒՄՆԵՐԻՑ». ԽԶՎԱԾ ՁԱՅՆՈՎ ՀՐԱՄԱՆԱՏԱՐԸ ՀԱՆԴԻՊԵԼ Է ՈՒՍԱՆՈՂՆԵՐԻ ՀԵՏ
ԵՊՀ գիտական խորհրդի նիստերի դահլիճում այսօր համալսարանականների հյուրն էր Արցախյան երկրորդ պատերազմի մասնակից, ՀՀ ԶՈՒ սպա, ավագ լեյտենանտ Մնացական Ավետիսյանը: