27.10.2022 | 
Կրթություն
ՄԵԾԱՆՈՒՆ ԳԻՏՆԱԿԱՆ ԷԴՈՒԱՐԴ ՍԵԿՈՅԱՆԻ ՀԻՇԱՏԱԿԻՆ ՆՎԻՐՎԱԾ ՀՈՒՇ-ՑԵՐԵԿՈՒՅԹ ԵՊՀ-ՈՒՄ
ՄԵԾԱՆՈՒՆ ԳԻՏՆԱԿԱՆ ԷԴՈՒԱՐԴ ՍԵԿՈՅԱՆԻ ՀԻՇԱՏԱԿԻՆ ՆՎԻՐՎԱԾ ՀՈՒՇ-ՑԵՐԵԿՈՒՅԹ ԵՊՀ-ՈՒՄ
ԵՊՀ ֆարմացիայի ինստիտուտում տեղի ունեցավ բժշկագիտության նշանավոր ներկայացուցիչ, հայրենական ֆարմակոլոգիայի դպրոցի հզոր և առանցքային հիմնասյուն, ականավոր գիտնական, պրոֆեսոր Էդուարդ Սեկոյանի 80-ամյակին նվիրված հուշ-ցերեկույթ:

Էդ. Սեկոյանի երկարամյա ու բեղմնավոր գիտական գործունեությունը նյարդաբանության ոլորտում նշանակալի ներդրում է ուղեղի արյան շրջանառության նեյրոգեն և նյութափոխանակային կարգավորման ժամանակակից հայեցակարգերի զարգացման գործում։ Նրա գիտական կարևորագույն նվաճումներից է ուղեղի գլիկոսֆինգոլիպիդների դերի մասին համոզիչ ապացույցների ձեռքբերումը, որոնց նախկինում վերագրվում էին միայն պլաստիկ գործառույթներ ուղեղի անոթային պաթոլոգիայի զարգացման կասկադային մեխանիզմներում։

 

Հատկանշական է պրոֆեսորի դերը Երևանի պետական համալսարանի ֆարմացիայի ինստիտուտի ձևավորման և կայացման գործում: Ավելի քան 200 գիտական աշխատությունների, բազմաթիվ գյուտերի, ուսումնամեթոդական ձեռնարկների հեղինակի ղեկավարությամբ կատարվել և հաջողությամբ պաշտպանվել են ատենախոսական և դոկտորական  մի շարք աշխատանքներ:

 

ԵՊՀ պրոֆեսորադասախոսական կազմը, գործընկերները և ուսանողները ներկայացրին մեծանուն գիտնականի մասին իրենց հիշողությունները, որոնց ամբողջությունը խտացված գույներով խճանկար էր հիշեցնում:

 

Պրոֆեսորի մասին խոսելիս ԵՊՀ ֆարմացիայի ինստիտուտի տնօրեն Սամվել Վարդապետյանը կարոտով հիշեց ավագ գործընկերոջը:

 

«Սեկոյանն այն գիտնականներից էր, որի դասախոսությունները լսելու համար շատերը դիմում էին ԵՊՀ: Չեմ վարանի ասել, որ ԵՊՀ-ի հանդեպ ունեցած սերն էր, որ չնայած զբաղվածությանը՝ նա դասախոսություններ էր կարդում ֆարմացիայի ինստիտուտում՝ կիսելով իր փորձն ուսանողների հետ»,- ժպիտով ասաց Ս. Վարդապետյանն ու ներկայացրեց լուսանկար, որտեղ միասին էին, ու բնութագրեց վերջինիս՝ որպես սկզբունքային, ազատամիտ և անսահման բարի գիտնականի:

 

Էդ. Սեկոյանը բազմաթիվ սերունդների է կրթել: Նրա վերջին շրջանի ուսանողներից է ինստիտուտում սովորող Սոնա Եգորյանը, որը նպատակ էր դրել հետագայում գիտնականի հետ համագործակցելու: Պրոֆեսորի մասին խոսելիս Ս․ Եգորյանը միանգամից սկսեց նկարագրել հագուստը, կեցվածքն ու քայլվածքը:

 

 

«Դանդաղ ու մտազբաղ էր քայլում Էդուարդ Սեկոյանը` պատասխան ողջույններ փոխանցելով ֆարմացիայի ինստիտուտի ուսանողներին: Նա ժպտում էր՝ աչքերում ամբարելով մի ողջ բարություն, ապա՝ մինչև լսարան հասնելը, պատասխանում ուսանողներին հետաքրքրող հարցերին, իսկ վերջում փորձում էր հասկանալ՝ ստացա՞ն հետաքրքրող պատասխանը, թե՞ ոչ: Սեկոյանն այն սակավաթիվ դասախոսներից էր, որի դասավանդած առարկայի քննություններին բոլոր ուսանողները մեծ ոգևորությամբ էին ներկայնում․ նրանց համար դա ևս մեկ հնարավորություն էր շփվելու Սեկոյան անհատի հետ»,- ընդգծեց սիրելի պրոֆեսորի երբեմնի ուսանողը:

 

Սոնան, անդրադառնալով Էդ․ Սեկոյանի բնավորության հետաքրքիր գծերից մեկին, պատմեց․ «Երբ տեղեկանում էր, որ կան ուսանողներ, որոնք ինչ-ինչ պատճառներով չեն կարողանալու մինչև դասի ավարտը ներկա լինել, փորձում էր սեղմ ժամանակահատվածում փոխանցել այն, ինչ նախատեսել էր տվյալ թեմայի շրջանակում»:

 

Պրոֆեսորի նախկին ուսանող, ֆարմացիայի ինստիտուտի ասպիրանտ Էմմա Մարկոսյանը նույնպես գիտնականի մասին խոսելիս հատուկ շեշտադրեց նրա՝ միանգամից աչքի զարնող արտաքինը:

 

«Չնայած պատկառելի տարիքին՝ մշտապես կոկիկ ու ժամանակակից պրոֆեսորն ուներ գիտելիքի մատուցման յուրօրինակ ձև. ողջ լսարանը համակ ուշադրությամբ էր նրան լսում: Էդ. Սեկոյանի ներկայությամբ լսարանը նոր շունչ էր ստանում»,- ասաց Էմման:

 

Մեծանուն գիտնականի մասին խոսելիս ԵՊՀ դեղագործական գիտությունների թեկնածու Լուսինե Սահակյանը շարունակեց բնութագրել պրոֆեսորին՝ որպես մարդկային բարձր որակներ ունեցող անհատի: Լուսինեն, որի թեկնածուական ատենախոսության խորհրդատուն եղել է Էդ. Սեկոյանը, որպես բնութագրող հատկանիշ առանձնացրեց պրոֆեսորի համեստությունը:

 

Լուսինեն նշեց. «Նա ձգտում էր փոխանցել այն գիտելիքները, որոնք տարիների ընթացքում ձեռք էր բերել, բայց միևնույն ժամանակ հպարտանում և ուրախանում էր այն հաջողություններով, որոնք գրանցում էին իր ուսանողները: Ատենախոսությունը գրելիս ինձ տալիս էր այնպիսի խորհուրդներ, որոնք նպաստեցին իմ հետազոստությունը լավագույնս ներկայացնելուն: Կարելի է ասել՝ մեր փոքր ձեռքբերումներով նա ավելի էր հպարտանում, քան իր սեփական հաջողություններով…»:

 

Մարինե Մկրտչյան

Այլ նորություններ
«ՄՐՑՈՒՅԹՆԵՐՆ ՈՒՍԱՆՈՂԻ ՀԱՄԱՐ ՀԻԱՆԱԼԻ ԱՌԻԹ ԵՆ ՎԵՐԱՐԺԵՎՈՐԵԼՈՒ ՍԵՓԱԿԱՆ ԿԱՐՈՂՈՒԹՅՈՒՆՆԵՐԸ». ԱՇՈՏ ՄԿՐՅԱՆ
ԵՊՀ հայ բանասիրության ֆակուլտետի ուսանող Աշոտ Մկրյանը մագիստրոսի կրթական ծրագրով «Լավագույն ուսանող» հանրապետական մրցույթի հայագիտական ոլորտում 2-րդ տեղի մրցանակակիր է: Աշոտի հետ զրույցը ուղենշում է, թե ինչ ճանապարհ է անհրաժեշտ անցնել լավագույն ուսանող ճանաչվելու համար:
ԻՆՉՊԵ՞Ս ԴԻՄԵԼ «ԷՐԱԶՄՈՒՍ+» ՓՈԽԱՆԱԿՄԱՆ ԾՐԱԳՐԻՆ. ՈՒՂԵՑՈՒՅՑ
ԵՊՀ ուսանողներն ու ասպիրանտները յուրաքանչյուր կրթական աստիճանում հնարավորություն ունեն մեկ անգամ մասնակցելու «Էրազմուս+» փոխանակման ծրագրին և կրթություն ստանալու եվրոպական մի շարք բուհերում։ Ընդհանուր ուսումնառության ժամկետը չի կարող լինել 3 ամսից պակաս և 12 ամսից ավելի: