12.08.2006 | 
Կրթություն
ԾԱՂԿԱՁՈՐՈՒՄ ՄԵԿՆԱՐԿԵՑ ՈՒՍԱՆՈՂԱԿԱՆ ԾՐԱԳՐԱՎՈՐՄԱՆ ԱՄԱՌԱՅԻՆ ԴՊՐՈՑԸ
Երեւանի պետական համալսարանի ծրագրավորողների ուսանողական երկու թիմ օգոստոսի 6-12-ը Ծաղկաձորում մասնակցեց ուսանողական ծրագրավորման ամառային դպրոցին:

Ռուս-հայկական (Սլավոնական) պետական համալսարանի եւ «Ձեռնարկությունների ինկուբատոր» հիմնադրամի կազմակերպած ամառային դպրոցի հիմնական նպատակը Հայաստանի բուհերի օլիմպիական թիմերի ծրագրավորողներին միջազգային օլիմպիադաներին պատրաստելն է:

«Այս ծրագիրը թույլ կտա հայկական բուհերի ուսանողական թիմերին միասին սովորել եւ կատարել խմբային աշխատանք` ունեցած գիտելիքներն ու փորձը փոխանցելով միմյանց»,- ասում է ամառային դպրոցի կազմակերպիչ Վլադիմիր Եղիազարյանը:

Փորձնական օլիմպիադաներից ու մրցույթներից բացի ծրագրի մասնակիցներին դասախոսություններ կարդաց Մոսկվայի պետական համալսարանի ֆիզիկամաթեմատիկական գիտությունների դոկտոր, պրոֆեսոր Սերգեյ Կուզնեցովը: «ԳԱՖ տեսություն» թեմայով եւս երկու դասախոսություն ներկայացրեց ԵՊՀ ինֆորմատիկայի եւ կիրառական մաթեմատիկայի ֆակուլտետի դասախոս, ֆիզիկամաթեմատիկական գիտությունների թեկնածու, դոցենտ Ռաֆիկ Տոնոյանը:

Թեպետ ընթացիկ մրցույթները անցկացվում էին ուսումնական ու ուսուցողական նպատակով, ԵՊՀ ծրագրավորողների առաջին թիմն ընդհանուր միավորներով գրավեց առաջին տեղը:

Այլ նորություններ
ՎԻՐՏՈՒԱԼ ՇՐՋԱՅՑ ՀԱՅԱՍՏԱՆԻ ՊԱՏՄՈՒԹՅԱՆ ԹԱՆԳԱՐԱՆՈՒՄ
ԵՊՀ պատմության ֆակուլտետի ուսանողական գիտական ընկերության և Հայաստանի պատմության թանգարանի համատեղ նախաձեռնությամբ օգոստոսի 3-ին տեղի ունեցավ վիրտուալ շրջայց Հայաստանի պատմության թանգարանում։ Էքսկուրսիան անցկացրեց թանգարանի էքսկուրսիոն բաժնի վարիչ Լիլիթ Հովհաննիսյանը:
ԵՊՀ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ԿԱՐԾԻՔԸ՝ ՀԱՆՐԱԿՐԹՈՒԹՅԱՆ ՊԵՏԱԿԱՆ ԱՌԱՐԿԱՅԱԿԱՆ ՉԱՓՈՐՈՇԻՉՆԵՐԻ ԵՎ ԾՐԱԳՐԵՐԻ ՄԱՍԻՆ
Այս օրերին տեղի են ունենում քննարկումներ «Հայոց լեզու 7-12-րդ դասարաններ» և «Գրականություն 7-12-րդ դասարաններ» հանրակրթության պետական առարկայական չափորոշիչների և ծրագրերի շուրջ: Արտահայտվեցին բազմաթիվ հայագետներ, այդ թվում՝ ԵՊՀ հայ բանասիրության ֆակուլտետի դասախոսներ: Հարցը քննարկվել է նաև ֆակուլտետի գիտխորհրդի նիստում: