13.02.2019 | 
Գիտություն
ԹԵ ԻՆՉՊԵՍ Է ՀԱՅԱԶԳԻ «ՔՐԻՔԸ» ԴԱՐՁԵԼ ԱՄՆ ՄԻՋՈՒԿԱՅԻՆ ՀԵՏԱԶՈՏՈՒԹՅՈՒՆՆԵՐԻ ԿԵՆՏՐՈՆԻ ԼԵԳԵՆԴԸ
ԹԵ ԻՆՉՊԵՍ Է ՀԱՅԱԶԳԻ «ՔՐԻՔԸ» ԴԱՐՁԵԼ ԱՄՆ ՄԻՋՈՒԿԱՅԻՆ ՀԵՏԱԶՈՏՈՒԹՅՈՒՆՆԵՐԻ ԿԵՆՏՐՈՆԻ ԼԵԳԵՆԴԸ
Օսմանյան Կայսրությունից մազապուրծ եղած «Քրիք» մականունով հայ փախստականին անվանել են ժամանակին գաղտնի քաղաք համարվող Լոս Ալամոսի (Նյու Մեքսիկո նահանգ) լեգենդ, որտեղ մշակվել է ատոմային ռումբը:

Այս մասին գրում է «Ռուսարմինֆո» կայքը:

Ներսես «Քրիք» Քրիքորյանը ծնվել է 1921-ին գաղթի ճանապարհին, երբ նրա ծնողները փախչում էին Օսմանյան Թուրքիայից՝ փորձելով փրկվել Ցեղասպանությունից: Տղայի ծնունդից հետո Քրիքորյանների ընտանիքը կարողացավ ապաստան գտնել Կանադայում, իսկ երբ Ներեսը չորս տարեկան դարձավ, ընտանիքը տեղափոխվեց ԱՄՆ և հաստատվեց Նիագարա Ֆոլսում:

Ապագա գիտնականի ծնողները կրթություն չունեին, սակայն անում էին ամեն հնարավորը, որպեսզի նրանց երեխաները գնան քոլեջ և բարձր որակավորում ունեցող մասնագետներ դառնան: Քոլեջը քիմիա մասնագիտությամբ ավարտելուց հետո Ներսեսը սկսել է աշխատել «Յունիոն քարբայդ» ընկերությունում, այնուհետև մշտական աշխատանք է ստացել Լոս Ալամոսում, որտեղ էլ ստացել է «Քրիք» մականունը:

1943-ին Քրիքորյանը ներառվել է հայտնի «Մանհեթենյան ծրագրում» (ԱՄՆ ատոմային ռումբի մշակման կոդային անվանումը): Երկրորդ համաշխարհային պատերազմից հետո նա աշխատել է ջերմատոմային հրթիռների վրա և գլխավորել է Լոս Ալամոսի լաբորատորիայի բաժիններից մեկը:

Իր հարցազրույցներում Քրիքորյանը բազմիցս նշել է, որ Հերոսիմայի և Նագասակիի 1945-ի ատոմային ռմբակոծություններն այլևս չպետք է տեղի ունենան երկրի վրա:

1972 թ. Քրիքորյանին առաջարկում են միանալ ԱՄՆ նորաստեղծ հետախուզական բաժանմունքին: Նա՝ որպես վերլուծաբան, աշխատում էր հետախուզական բյուրոյում, քանի որ տիրապետում էր հայերենին ու ռուսերենին:

Ներսես Քրիքորյանը թոշակի է անցել 1991-ին, սակայն մինչև մահը՝ 2017 թվականը, շարունակել է զբաղվել գիտությամբ:

Իր ողջ կյանքի ընթացքում գիտնականը չի մոռացել իր հայկական արմատների մասին: 1990-ականներին նա մի քանի անգամ այցելել է Հայաստան:


Նադեժդա Տեր-Աբրահամյան

Այլ նորություններ
ՂՐՂԶՍՏԱՆՈՒՄ ԱՆՑԿԱՑՎԵԼՈՒ Է ԵԱՏՄ ՏԱՐԱԾՔՈՒՄ ԱՄԵՆԱՄԵԾ «ԵՎՐԱՍԻԱԿԱՆ ՇԱԲԱԹ-2019» ԽՈՐԱԳՐՈՎ ՀԱՄԱԺՈՂՈՎԸ
Եվրասիական տնտեսական միության (ԵԱՏՄ) գործարարները և ակտիվ երիտասարդները հանդիպելու են մեկ հարթակում՝ քննարկելու տնտեսական ինտեգրման և բիզնես համագործակցության հարցերը, որին հեռակա կարգով կարող են մասնակցել նաև ԵՊՀ տարբեր ֆակուլտետների դասախոսներ, երիտասարդ գիտնականներ, ասպիրանտներ և փորձագետներ:
ԼՈՒՅՍ ԵՆ ՏԵՍԵԼ «ԵՊՀ ՈՒԳԸ ԳԻՏԱԿԱՆ ՀՈԴՎԱԾՆԵՐԻ ԺՈՂՈՎԱԾՈՒ» ԵՐԻՏԱՍԱՐԴԱԿԱՆ ԳԻՏԱԿԱՆ ՊԱՐԲԵՐԱԿԱՆԻ 2019 ԹՎԱԿԱՆԻ ԱՌԱՋԻՆ ՀԱՄԱՐՆԵՐԸ
ԵՊՀ գիտխորհրդի նիստերի դահլիճում այսօր տեղի ունեցավ «ԵՊՀ ՈՒԳԸ գիտական հոդվածների ժողովածու» երիտասարդական գիտական պարբերականի Բնական և ֆիզիկամաթեմատիկական գիտությունների 1.1 (27), Հումանիտար և հասարակական գիտությունների 1.2 (28) համարների շնորհանդեսը: