27.06.2022 | 
Կրթություն, Մշակույթ
ԿՈՐԵԵՐԵՆԻՆ ԵՎ ԿՈՐԵԱԿԱՆ ՄՇԱԿՈՒՅԹԻՆ ՆՎԻՐՎԱԾ ՑԵՐԵԿՈՒՅԹ ԵՊՀ-ՈՒՄ
ԿՈՐԵԵՐԵՆԻՆ ԵՎ ԿՈՐԵԱԿԱՆ ՄՇԱԿՈՒՅԹԻՆ ՆՎԻՐՎԱԾ ՑԵՐԵԿՈՒՅԹ ԵՊՀ-ՈՒՄ
ԵՊՀ միջազգային հարաբերությունների ֆակուլտետում տեղի ունեցավ կորեերենին և կորեական մշակույթին նվիրված ցերեկույթ, որի ընթացքում ԵՊՀ-ում անցկացված կորեերենի ութամսյա դասընթացի մասնակիցներին ֆակուլտետի կողմից հանձնվեցին վկայականներ։

Միջոցառումը կազմակերպվել էր միջազգային առկա համագործակցության ամրապնդման և ԵՊՀ-ում կորեերենի դերի վերարժևորման նպատակով։

 

Ինչպես կորեական մշակույթին նվիրված առաջին ցերեկույթի ընթացքում, այնպես էլ այս անգամ դասընթացի քառասուն մասնակիցներին վկայականներ հանձնեց ՀՀ-ում «Կորեա հիմնադրամ»-ի ներկայացուցիչ Փաք Հի Սուն:

 

 

Փաք Հի Սուն, դիմելով դասընթացի մասնակիցներին, ասաց. «Շատ ուրախ եմ, որ հանդիպել եմ ձեզ Երևանի պետական համալսարանում՝ Հայաստանի առաջատար բուհում։ Հույս ունեմ՝ կորեերեն սովորելու շնորհիվ ձեր երազանքները կիրականանան: Շարունակե՛ք սովորել առավել ջանասիրաբար»:

 

ԵՊՀ-ում կորեերենի զարգացման գործում ունեցած մեծ ավանդի համար ԵՊՀ միջազգային հարաբերությունների ֆակուլտետի՝ դիվանագիտական ծառայության և մասնագիտական հաղորդակցման ամբիոնի վարիչ Սյուզաննա Նավասարդյանը Փաք Հի Սուին հանձնեց շնորհակալագիր:

 

 

Ս. Նավասարդյանը շնորհակալագիր հանձնեց նաև ԵՊՀ կորեերենի հրավիրյալ դասախոս Ջոն Մունիին՝ ասելով, որ անգնահատելի է վերջինիս դերը գիտելիքների, կարողությունների և փորձի փոխանցման գործում:                              

 

Խոսելով ԵՊՀ-ում կորեերենի ուսուցման կարևորությունից և ուսանողների՝ լեզվի նկատմամբ ունեցած հետաքրքրությունից՝ Ս․ Նավասարդյանը նշեց. «Սկսած 2018 թվականից՝ ԵՊՀ միջազգային հարաբերությունների ֆակուլտետում կորեերենի դասավանդման մեկնարկից ի վեր, համալսարանում պարբերաբար կազմակերպվել են կորեական մշակույթին նվիրված միջոցառումներ՝ նպատակ ունենալով ուսանողների շրջանում տարածելու կորեական մշակույթն ու դրա նկատմամբ հետաքրքրությունը»:

 

Ֆակուլտետի դասախոս Հասմիկ Ճաղարյանը մեզ հետ զրույցում ընդգծեց, որ դասընթացին մասնակցել ցանկացողների թիվը բավականին մեծ է եղել:

 

 

«Ճիշտ է, դասընթացը բավականին խտացված էր, սակայն ութ ամիսների ընթացքում ուսանողները կարողացան ձեռք բերել փայլուն գիտելիքներ: Որպես փաստ կարող ենք նշել, որ դասընթացի մասնակիցներից մեկը Վ․ Բրյուսովի անվան պետական համալսարանում անցկացված կորեերենի բանավոր խոսքի մրցույթում զբաղեցրել է երրորդ հորիզոնականը»,- ասաց Հասմիկ Ճաղարյանը:

 

Հատկանշական է, որ դասընթացին մասնակցել են ոչ միայն համալսարանի ուսանողներ, այլև դպրոցականներ:

 

Վաղարշապատի N 1 հիմնական դպրոցի աշակերտ Արփի Մարտիրոսյանը, խոսելով դասընթացին իր մասնակցությունից, ասաց. «Դասընթացի մասին իմացել եմ սոցցանցերից մեկում տարածված հրապարակումից: Վստահաբար կարող եմ ասել, որ արդարացան իմ բոլոր սպասումները, և այս ամիսների ընթացքում կարողացա սովորել նոր լեզու, ինչը, կարծում եմ, կնպաստի ապագայի իմ նպատակների իրականացմանը»:

 

 

Ցերեկույթի հաջորդ հատվածում  մասնակիցներին հնարավորություն տրվեց ծանոթանալու կորեական խոհանոցին և վայելելու կորեական ազգային ուտեստներ` տոկբոկի և բուլգոգի։ Կորեական ուտեստների պատրաստման հարցում աջակցել էր ԲՊՀ կորեերենի դասախոս Կիմ Գյոնգ Հվան, ով ևս Ս․Նավասարդյանի կողմից արժանացավ շնորհակալագրի։

 

Այլ նորություններ
ՀԱՅԿԱԿԱՆ ՄՇԱԿՈՒԹԱՅԻՆ ԺԱՌԱՆԳՈՒԹՅԱՆ ՈՉՆՉԱՑՄԱՆ ՎՏԱՆԳՆ ԱՐՑԱԽՈՒՄ․ ԳԻՏՆԱԿԱՆՆԵՐԸ ՀԱՆԴԵՍ ԵՆ ԵԿԵԼ ԿՈՉՈՎ
2022 թ․ հուլիսի 15-19-ը ԵՊՀ-ում և Հայ Առաքելական եկեղեցու Վայոց ձորի թեմում տեղի է ունեցել «Արցախի մշակութային ժառանգությունը» խորագրով միջազգային գիտաժողով, որի ընթացքում ավելի քան երեսուն օտարերկրյա և հայ գիտնականներ ու փորձագետներ քննարկել են Լեռնային Ղարաբաղի տարածաշրջանում մշակութային արժեքների ստեղծման, պատմական զարգացման և ներկայիս վտանգվածության խնդիրները։
«ՆՈՐԱՐԱՐԱԿԱՆ ՍԱՐՔԱՎՈՐՈՒՄՆԵՐՈՎ ՀԱԳԵՑՎԱԾՈՒԹՅՈՒՆԸ ՆՊԱՍՏՈՒՄ է ԵՊՀ-ՈՒՄ ԳՈՐԾՆԱԿԱՆ ԴԱՍԵՐԻ ԱՐԴՅՈՒՆԱՎԵՏ ԿԱԶՄԱԿԵՐՊՄԱՆԸ». ԱՆՆԱ ՄԱԴԱԹՅԱՆ
ԵՊՀ եվրոպական լեզուների և հաղորդակցության ֆակուլտետի ուսանող Աննա Մադաթյանը «Էրազմուս+» միջազգային կրեդիտային շարժունության ծրագրով կրթություն է ստացել Իսպանիայի Լա Կորունյա համալսարանում: Մեզ հետ զրույցում Աննան պատմել է լեզուների իմացության կարևորության, Իսպանիայում անցկացրած օրերի և այլ թեմաների մասին։