28.02.2022 | 
Հասարակություն
ՀԱՅ-ՖՐԱՆՍԻԱԿԱՆ ՀԱՄԱԳՈՐԾԱԿՑՈՒԹՅԱՆ ՆՈՐ ՀԵՌԱՆԿԱՐՆԵՐ. ՀՀ-ՈՒՄ ՖՐԱՆՍԻԱՅԻ ՀԱՆՐԱՊԵՏՈՒԹՅԱՆ ԱՐՏԱԿԱՐԳ ԵՎ ԼԻԱԶՈՐ ԴԵՍՊԱՆՆ ԱՅՑԵԼԵԼ Է ԵՊՀ
ՀԱՅ-ՖՐԱՆՍԻԱԿԱՆ ՀԱՄԱԳՈՐԾԱԿՑՈՒԹՅԱՆ ՆՈՐ ՀԵՌԱՆԿԱՐՆԵՐ. ՀՀ-ՈՒՄ ՖՐԱՆՍԻԱՅԻ ՀԱՆՐԱՊԵՏՈՒԹՅԱՆ ԱՐՏԱԿԱՐԳ ԵՎ ԼԻԱԶՈՐ ԴԵՍՊԱՆՆ ԱՅՑԵԼԵԼ Է ԵՊՀ
ԵՊՀ ռեկտոր Հովհաննես Հովհաննիսյանն այսօր հանդիպել է ՀՀ-ում Ֆրանսիայի Հանրապետության արտակարգ և լիազոր դեսպան տիկին Անն Լույոյին ու նրա հետ քննարկել երկկողմ համագործակցության ամրապնդմանն ուղղված քայլերը, ինչպես նաև ընդլայնման հնարավորությունները:

Հանդիպմանը մասնակցում էին ԵՊՀ ուսումնական գծով պրոռեկտոր Էլինա Ասրիյանը, Միջազգային համագործակցության վարչության պետ Ալեքսանդր Մարգարովը, Եվրոպական լեզուների և հաղորդակցության ֆակուլտետի դեկան Գևորգ Բարսեղյանը, Ֆրանսիական բանասիրության ամբիոնի վարիչի պաշտոնակատար Գայանե Սարգսյանը և ՀՀ-ում Ֆրանսիայի դեսպանության ներկայացուցիչներ:

 

 

Ռեկտորն Անն Լույոյին ներկայացրեց ԵՊՀ-ի գործունեությունը, բարեփոխման ծրագրերը, նշեց, որ ԵՊՀ-ն տարբեր ուղղություններով ակտիվորեն համագործակցում է ֆրանսիական առաջատար բուհերի հետ՝ իրականացնելով փոխանակման և ակադեմիական այլ ծրագրեր:

 

 

Հովհաննես Հովհաննիսյանը կարևորեց ԵՊՀ-ի փոխգործակցությունը ֆրանսիական բուհերի հետ և հույս հայտնեց, որ դեսպանության աջակցությամբ կհաստատվեն համագործակցային նոր կապեր, կգրանցվեն հաջողություններ, կյանքի կկոչվեն տարբեր ծրագրեր:

 

 

ՀՀ-ում Ֆրանսիայի Հանրապետության արտակարգ և լիազոր դեսպանը ևս կարևոր համարեց երկու երկրների համալսարանների միջև կապերը, վստահեցրեց, որ պատրաստ են օժանդակել դրանց ամրապնդմանն ու ընդլայնմանը: Նշեց նաև, որ ֆրանսերենի ուսուցումն իրենց հետաքրքրությունների առաջնահերթություններից է, և որ այդ հարցում էլ իրենք կարող են օգտակար լինել ու նպաստել խնդիրների լուծմանը:

 

 

Ա. Մարգարովը հանդիպման մասնակիցներին մանրամասն ներկայացրեց այն ոլորտները և ուղղությունները, որոնց շրջանակում ԵՊՀ-ն համագործակցում է ֆրանսիական բուհերի հետ: Ըստ Միջազգային համագործակցության վարչության պետի՝ ԵՊՀ-ն այս պահին ունի 7 գործող համաձայնագիր ֆրանսիական բուհերի հետ, որոնցից 3-ի շրջանակում իրականացվում են կրկնակի դիպլոմով կրթական ծրագրեր:

 

 

Ֆրանսիական բանասիրության ամբիոնի պաշտոնակատար Գ. Սարգսյանն էլ խոսեց ամբիոնի գործունեության և իրականացվող ծրագրերի մասին՝ տեղեկացնելով, որ Լիլի և Էքս Մարսելի համալսարանների հետ համագործակցության շրջանակում 2023 թ. սեպտեմբերից մեկնարկելու են կրկնակի դիպլոմով մագիստրոսական կրթական նոր ծրագրեր:

 

Կողմերը քննարկեցին կոնկրետ ծրագրեր, որոնք դրական նոր զարգացումներ կհաղորդեն կրթական ու գիտական կառույցների գործակցությանը:

 

Հանդիպման ավարտին Անն Լույոն այցելեց ԵԼՀ ֆակուլտետի ֆրանսիական բանասիրության ամբիոն, եղավ Ֆրանկոֆոնիայի համալսարանական գործակալության կողմից կահավորված Ակադեմիական նվաճումների կենտրոնում:

 

Դեսպանի հետ պայմանավորվածություն է ձեռք բերվել առաջիկայում հանդիպել և առավել մանրամասն քննարկել համագործակցության ոլորտները:

Այլ նորություններ
ՀԱՅԿԱԿԱՆ ՄՇԱԿՈՒԹԱՅԻՆ ԺԱՌԱՆԳՈՒԹՅԱՆ ՈՉՆՉԱՑՄԱՆ ՎՏԱՆԳՆ ԱՐՑԱԽՈՒՄ․ ԳԻՏՆԱԿԱՆՆԵՐԸ ՀԱՆԴԵՍ ԵՆ ԵԿԵԼ ԿՈՉՈՎ
2022 թ․ հուլիսի 15-19-ը ԵՊՀ-ում և Հայ Առաքելական եկեղեցու Վայոց ձորի թեմում տեղի է ունեցել «Արցախի մշակութային ժառանգությունը» խորագրով միջազգային գիտաժողով, որի ընթացքում ավելի քան երեսուն օտարերկրյա և հայ գիտնականներ ու փորձագետներ քննարկել են Լեռնային Ղարաբաղի տարածաշրջանում մշակութային արժեքների ստեղծման, պատմական զարգացման և ներկայիս վտանգվածության խնդիրները։
ԿԵՆՍԱԲԱՆՈՒԹՅԱՆ ՄԻՋԱԶԳԱՅԻՆ ՕԼԻՄՊԻԱԴԱՅԻ ՄԱՍՆԱԿԻՑՆԵՐԸ ՇԱՐՈՒՆԱԿՈՒՄ ԵՆ ԲԱՑԱՀԱՅՏԵԼ ՀԱՅԱՍՏԱՆԸ
Այսօր հայոց պատմամշակութային ժառանգությանը ծանոթանալու նպատակով «Կենսաբանության 33-րդ միջազգային օլիմպիադայի» (ԿՄՕ) մասնակիցները շրջայց են կատարել «Էրեբունի» պատմահնագիտական արգելոց–թանգարանում, այնուհետև ճանաչողական էքսկուրսիա իրականացրել Մեսրոպ Մաշտոցի անվան Մատենադարանում: