07.05.2014 | 
Գիտություն
ՀԱՅՈՑ ՑԵՂԱՍՊԱՆՈՒԹՅՈՒՆԸ ՑԵՂԱՍՊԱՆԱԳԻՏՈՒԹՅԱՆ ՀԱՄԱՏԵՔՍՏՈՒՄ
ՀԱՅՈՑ ՑԵՂԱՍՊԱՆՈՒԹՅՈՒՆԸ ՑԵՂԱՍՊԱՆԱԳԻՏՈՒԹՅԱՆ ՀԱՄԱՏԵՔՍՏՈՒՄ
Մայր բուհի տարբեր ֆակուլտետների ուսանողներ մասնագետների հետ քննարկում են Հայոց ցեղասպանության հիմնախնդիրները:

Մայիսի 6-ին ԵՊՀ ՈՒԳԸ-ի նախաձեռնությամբ ԵՊՀ գիտխորհրդի նիստերի դահլիճում տեղի ունեցավ «Հայոց ցեղասպանությունը ցեղասպանագիտության համատեքստում» խորագրով սեմինար` նվիրված Հայոց ցեղասպանության 99-րդ տարելիցին: Սեմինարավարները պատմ. գիտ. դոկտոր, պրոֆեսոր Աշոտ Հայրունին և իրավ. գիտ. թեկնածու, դոցենտ Վիգեն Քոչարյանն էին:

 

«Միջոցառման գլխավոր նպատակն է ուշադրության կենտրոնում պահել Ցեղասպանության հիմնախնդիրը` որպես մեր պատմության մեջ կարևորագույն խնդիրներից մեկը, որի հետևանքները մենք այսօր դեռևս շարունակում ենք ունենալ: Շատ կարևոր է Ցեղասպանության հետևանքների վերացումը. այս դեպքում առաջ է գալիս նաև տարածքային խնդիրը: Բացի այդ` անհրաժեշտ է ներկայացնել փոխհատուցմանը համապատասխան ծրագրային քաղաքականություն և առանձնացնել հետևանքների վերացմանն ուղղված ուսանողների դերակատարության ուղղությունները»,- ասաց ՈՒԳԸ նախագահ Միքայել Մալխասյանը:

 

Աշոտ Հայրունին անդրադարձավ հայկական հիշողության առջև ծառացած խնդիրներին` նշելով, թե Հայաստանն ինչ ռազմավարական խնդիրներ ունի լուծելու. «Ցեղասպանագետները, պատմաբանները Եվրոպայում ու Արևմուտքում զբաղված են այն հարցով, թե գլոբալ հիշողության ինչ հայեցակարգ պետք է զարգացվի: Սփյուռքի որոշ գիտնականներ գտնում են, որ եթե պետք է գլոբալ հիշողության հայեցակարգ մշակել, ապա դա պետք է լինի ոչ միակենտրոն: Այնուամենայնիվ, հենց արևմտյան գիտնականները կարծում են, որ պետք է լինի միակենտրոն, ու միանգամայն հիմնավորելի է, որ այդ կենտրոնում պետք է գտնվի Հայոց ցեղասպանությունը»:

 

Պատմաբանի ձևակերպմամբ` Առաջին աշխարհամարտը ազգությունների ձևավորման, նաև տոտալիտար ռեժիմների ձևավորման այն խառնարանն էր, որի մեջ տեղի ունեցավ Հայոց ցեղասպանությունը: Առաջին աշխարհամարտի ցեղասպանական ամենամեծ փորձառությունը բովանդակում է Հայոց ցեղասպանությունը:

 

Վիգեն Քոչարյանն էլ, համեմատելով Հայոց ցեղասպանությունը հրեական Հոլոքոստի հետ, ասաց. «Բացի Հայոց ցեղասպանությունից` 20-րդ դարում եղել են նաև այլ ցեղասպանություններ: Ի տարբերություն Հայոց ցեղասպանության` հրեաների Հոլոքոստի հիմնական կազմակերպիչները պատասխանատվության ենթարկվեցին: Այսինքն` մինչև միջազգային իրավական փաստաթուղթ ընդունելը միջազգային իրավունքում արդեն իսկ գոյություն ունեին այն միջազգային իրավական նորմերը, որոնք արգելում կամ որպես հանցագործություն են ճանաչում ցեղասպանությունը»:

 

Սեմինարի ավարտից հետո ուսանողները հարց ու պատասխանի միջոցով ստացան իրենց հետաքրքրող հարցերի պատասխանները: 

Այլ նորություններ
«ՔՐԴԱԳԻՏԱԿԱՆ ՀԵՏԱԶՈՏՈՒԹՅՈՒՆՆԵՐ»․ ԳԻՏԱԺՈՂՈՎ ԵՎ ԳՐՔԻ ՇՆՈՐՀԱՆԴԵՍ ԵՊՀ-ՈՒՄ
ԵՊՀ Պալեանների անվան դահլիճում այսօր տեղի է ունեցել «Քրդերն ու Իրաքյան Քուրդիստանը տարածաշրջանային զարգացումների համատեքստում» խորագրով գիտաժողով:
ԵՊՀ ԱՍՊԻՐԱՆՏՆԵՐԸ՝ ԳԻՏՈՒԹՅԱՆ ԿՈՄԻՏԵԻ ՀԱՅՏԱՐԱՐԱԾ ՄՐՑՈՒՅԹԻ ՀԱՂԹՈՂ
Դեռևս մայիսին ՀՀ ԿԳՄՍՆ գիտության կոմիտեն կազմակերպել էր գիտական և գիտատեխնիկական գործունեության պայմանագրային (թեմատիկ) ֆինանսավորման նպատակով գիտական թեմաների հայտերի ընտրության «Ասպիրանտների և երիտասարդ հայցորդների հետազոտությունների աջակցության ծրագիր-2020» մրցույթը: