15.05.2019 | 
Կրթություն
ԵՊՀ-ՈՒՄ ՆԵՐԿԱՅԱՑՎԵՑԻՆ 180 ԵՐԿՐՆԵՐՈՒՄ ԳՈՐԾՈՂ, ՄԻՋԱԶԳԱՅԻՆ ԵՐԴՎՅԱԼ ՈՐԱԿԱՎՈՐՎԱԾ ՀԱՇՎԱՊԱՀՆԵՐԻ ԱՍՈՑԻԱՑԻԱՅԻ ԾՐԱԳՐԵՐԸ
ԵՊՀ-ՈՒՄ ՆԵՐԿԱՅԱՑՎԵՑԻՆ 180 ԵՐԿՐՆԵՐՈՒՄ ԳՈՐԾՈՂ, ՄԻՋԱԶԳԱՅԻՆ ԵՐԴՎՅԱԼ ՈՐԱԿԱՎՈՐՎԱԾ ՀԱՇՎԱՊԱՀՆԵՐԻ ԱՍՈՑԻԱՑԻԱՅԻ ԾՐԱԳՐԵՐԸ
Երևանի պետական համալսարանում այսօր տեղի ունեցավ հանդիպում Երդվյալ որակավորված հաշվապահների ասոցիացիայի (ACCA) Ուկրաինայի, Բելառուսի և Անդրկովկասի երկրների գծով տարածաշրջանային ղեկավար Ժանետա Օնիշչուկի հետ։

Հանդիպմանը ներկա էին ԵՊՀ տնտեսագիտության և կառավարման ֆակուլտետի դեկանի տեղակալ Կարեն Եղոյանը, Ֆինանսահաշվային ամբիոնի վարիչ Հայկ Մնացականյանը, ներկայացուցիչներ ԵՊՀ տնտեսագիտության և կառավարման ֆակուլտետի պրոֆեսորադասախոսական կազմից և ուսանողներ տարբեր ֆակուլտետներից։ 



Հանդիպման սկզբում Ֆինանսահաշվային ամբիոնի վարիչ Հայկ Մնացականյանը ողջունեց ներկաներին և ասաց, որ ուսանողները բացառիկ հնարավորություն ունեն ծանոթանալու «ACCA» միջազգային ծրագրին, որը թույլ կտա աշխատանք գտնել աշխարհի տարբեր երկրներում:

«ACCA»-ի Ուկրաինայի, Բելառուսի և Անդրկովկասի երկրների գծով տարածաշրջանային ղեկավար Ժանետա Օնիշչուկը և Աշխատակիցների հետ տարվող բաժնի ղեկավար Յուլիա Անդրիենկոն ողջունեցին ներկաներին ու պատմեցին ասոցիացիայի կողմից տրվող հնարավորությունների մասին:



Յուլիա Անդրիենկոն ասաց, որ ծրագրի լեզուն անգլերենն է, և նախագծի կողմից տրված հավաստագիրը գործում է աշխարհի 180 երկրներում:

«Այս պահին մեր ծրագրով սովորում են 500 հազարից ավելի ուսանողներ, իսկ 218 հազարն արդեն ունեն որակավորում և հնարավորություն՝ աշխատելու տարբեր երկրներում»,- նշեց նա:



Բանախոսներն ուսանողներին ներկայացրին Երդվյալ որակավորված հաշվապահների ասոցիացիայի հավաստագիր ստանալու, ուսման տևողության և քննությունների մանրամասները. «Հավաստագիր ստանալու համար անհրաժեշտ է հանձնել 13 քննություն, էթիկայի մոդուլ, ինչպես նաև ունենալ 3 տարվա աշխատանքային փորձ, որը կարելի է ձեռք բերել հընթացս»:

Հանդիպման ավարտին ուսանողները հարցեր հղեցին հյուրերին և ծրագրի մասին ավելին իմանալու ցանկություն հայտնեցին, ինչի համար նրանց խորհուրդ տրվեց այցելել «ACCA» պաշտոնական կայքէջ:

 

Մարինա Առաքելյան

Այլ նորություններ
ՎԻՐՏՈՒԱԼ ՇՐՋԱՅՑ ՀԱՅԱՍՏԱՆԻ ՊԱՏՄՈՒԹՅԱՆ ԹԱՆԳԱՐԱՆՈՒՄ
ԵՊՀ պատմության ֆակուլտետի ուսանողական գիտական ընկերության և Հայաստանի պատմության թանգարանի համատեղ նախաձեռնությամբ օգոստոսի 3-ին տեղի ունեցավ վիրտուալ շրջայց Հայաստանի պատմության թանգարանում։ Էքսկուրսիան անցկացրեց թանգարանի էքսկուրսիոն բաժնի վարիչ Լիլիթ Հովհաննիսյանը:
ԵՊՀ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ԿԱՐԾԻՔԸ՝ ՀԱՆՐԱԿՐԹՈՒԹՅԱՆ ՊԵՏԱԿԱՆ ԱՌԱՐԿԱՅԱԿԱՆ ՉԱՓՈՐՈՇԻՉՆԵՐԻ ԵՎ ԾՐԱԳՐԵՐԻ ՄԱՍԻՆ
Այս օրերին տեղի են ունենում քննարկումներ «Հայոց լեզու 7-12-րդ դասարաններ» և «Գրականություն 7-12-րդ դասարաններ» հանրակրթության պետական առարկայական չափորոշիչների և ծրագրերի շուրջ: Արտահայտվեցին բազմաթիվ հայագետներ, այդ թվում՝ ԵՊՀ հայ բանասիրության ֆակուլտետի դասախոսներ: Հարցը քննարկվել է նաև ֆակուլտետի գիտխորհրդի նիստում: