16.07.2019 | 
Կրթություն
ԹՅՈՒՐՔԱԳԻՏՈՒԹՅԱՆ ԱՄԲԻՈՆԻ ՄԱԳԻՍՏՐՈՍՆԵՐԸ ՍԵՎԱՆԱՎԱՆՔՈՒՄ ՍՏԱՑԱՆ ԻՐԵՆՑ ԴԻՊԼՈՄՆԵՐԸ
ԹՅՈՒՐՔԱԳԻՏՈՒԹՅԱՆ ԱՄԲԻՈՆԻ ՄԱԳԻՍՏՐՈՍՆԵՐԸ ՍԵՎԱՆԱՎԱՆՔՈՒՄ ՍՏԱՑԱՆ ԻՐԵՆՑ ԴԻՊԼՈՄՆԵՐԸ
ԵՊՀ արևելագիտության ֆակուլտետի թյուրքագիտության ամբիոնի մագիստրատուրայի շրջանավարտների դիպլոմների հանձնման հանդիսավոր արարողությունը տեղի ունեցավ Սևանավանքում:

ԵՊՀ արևելագիտության ֆակուլտետի դեկան, պրոֆեսոր Ռուբեն Մելքոնյանը շնորհավորեց շրջանավարտներին նախ՝ 100-ամյա համալսարանի շրջանավարտ լինելու, հետո՝ արևելագիտության մագիստրոսի բարձր կոչմանն արժանանալու կապակցությամբ:



«Երբ 2 տարի առաջ բակալավրիատի դիպլոմները հանձնում էի ձեզ և շնորհավորում Գյումրիում՝ համալսարանի հիմնադիր շենքում, մաղթեցի, որ ձեզնից շատերը շարունակեն իրենց մասնագիտական ուղին: Դուք իրավամբ և արդեն նաև փաստաթղթով կարող եք կոչվել հայ արևելագետների գործը շարունակողներ: Ուրախ եմ նշել, որ ձեզնից շատերն արևելագիտության ոլորտում կայանալու կարևոր քայլեր են արել ու ունեն հիմք լավ արևելագետ, լավ մասնագետ կոչվելու համար: Արևելագիտությունն ուղեկցելու է ձեզ ողջ կյանքում՝ դառնալով ձեր կյանքի բաղկացուցիչ մասը»,- նշեց դեկանը:



Պրոֆեսոր Մելքոնյանը հավելեց, որ ուրախալի է Թյուրքագիտության ամբիոնի մագիստրատուրայում տեսնել մարդկանց, որոնք, ունենալով այլ մասնագիտությամբ բակալավրի աստիճան, որոշել են իրենց գիտելիքները զարգացնել ու համալրել թյուրքագիտության ոլորտում և երկու տարվա ընթացքում հաջողությամբ ինտեգրվել են մասնագիտական, ինչպես նաև ուսանողական մեծ ընտանիքում:

Մագիստրոսական դիպլոմները հանձնելու վայրը ֆակուլտետի դեկանը համարեց խորհրդանշական` մեր ունեցածը կարևորելու, պահպանելու և դրանով նաև ազգային ավելի մեծ իղձերին ու գաղափարներին հետամուտ լինելու տեսանկյունից:



Ռուբեն Մելքոնյանը նաև շնորհակալություն հայտնեց Թյուրքագիտության ամբիոնի դասախոսներին, ամբիոնի վարիչ, պրոֆեսոր Ալեքսանդր Սաֆարյանին՝ կրթության գործում իրենց նվիրումի համար:

Ուսանողներն իրենց երախտիքի խոսքը հայտնեցին ֆակուլտետի պրոֆեսորադասախոսական կազմին մասնագիտական բարձրորակ գիտելիքներ տալու, որպես արևելագետներ կայանալու ուղի հարթելու համար:

 

Այլ նորություններ
 «ՏՎՅԱԼՆԵՐԻ ԳԻՏՈՒԹՅՈՒՆԸ ԲԻԶՆԵՍՈՒՄ» ՄԱԳԻՍՏՐՈՍԱԿԱՆ ԾՐԱԳՐԻ ՈՐՈՇ ՈՒՍԱՆՈՂՆԵՐ ՇԱՐՈՒՆԱԿԵԼՈՒ ԵՆ ՈՒՍՈՒՄԸ ՍԱՆ ԽՈՍԵԻ ՀԱՄԱԼՍԱՐԱՆՈՒՄ
Երևանի և Սան Խոսեի պետական համալսարանների 2019 թվականին ձեռք բերված համագործակցության շնորհիվ ԵՊՀ տնտեսագիտության և կառավարման ֆակուլտետի «Տվյալների գիտությունը բիզնեսում» մագիստրոսական ծրագրի ընտրական փուլը հաղթահարած 2-4 ուսանող 2020 թ. սեպտեմբերից կշարունակեն ուսումն ԱՄՆ-ի Սան Խոսեի պետական համալսարանի «Data Analytics» (MS) մագիստրոսական ծրագրում։ Համագործակցության, նպատակների ու հետագա գործունեության մասին ysu.am-ը զրուցել է «Տվյալների գիտությունը բիզնեսում» մագիստրոսական ծրագրի ղեկավար Ռուբեն Գևորգյանի և ընտրական փուլ հասած ուսանողներից մի քանիսի հետ։
«ԻՆԴՈՒՍՏՐԻԱՅԻ ՕՐ» ԵՊՀ ՄԱԹԵՄԱՏԻԿԱՅԻ ԵՎ ՄԵԽԱՆԻԿԱՅԻ ՖԱԿՈՒԼՏԵՏՈՒՄ
Երևանի պետական համալսարանի մաթեմատիկայի և մեխանիկայի ֆակուլտետն այսօր կազմակերպել էր «Ինդուստրիայի օր» խորագիրը կրող միջոցառում, որի նպատակն էր բարձր կուրսերի ուսանողներին հնարավորություն տալ ծանոթանալու ՏՏ ոլորտի ընկերությունների ներկայացուցիչների հետ և իրենց մագիստրոսական ծրագրի համար գտնելու համագործակցության ուղիներ։