30.10.2019 | 
Հասարակություն
ԵՐԵՎԱՆԻ ՍՈՒՐԲ ԱՆՆԱ ԵԿԵՂԵՑՈՒ ԲԱԿՈՒՄ ՏՆԿՎԵՑ ԵՊՀ ՀԻՄՆԱԴՐՄԱՆ 100-ԱՄՅԱԿԻՆ ՆՎԻՐՎԱԾ ԵՂԵՎՆԻ
ԵՐԵՎԱՆԻ ՍՈՒՐԲ ԱՆՆԱ ԵԿԵՂԵՑՈՒ ԲԱԿՈՒՄ ՏՆԿՎԵՑ ԵՊՀ ՀԻՄՆԱԴՐՄԱՆ 100-ԱՄՅԱԿԻՆ ՆՎԻՐՎԱԾ ԵՂԵՎՆԻ
Երևանի Սուրբ Աննա եկեղեցու բակում այսօր տեղի է ունեցել ծառատունկ՝ նվիրված ԵՊՀ հիմնադրման 100-ամյակին:

Մեկդարյա Մայր բուհին  նվիրված ծառատունկը նախաձեռնել էր ԵՊՀ արևելագիտության ֆակուլտետը՝ Մայր Աթոռ Սուրբ Էջմիածնի աջակցությամբ:

 

Միջոցառմանը ներկա էին ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանը, ԵՊՀ արևելագիտության ֆակուլտետի դեկան Ռուբեն Մելքոնյանը, Թյուրքագիտության ամբիոնի վարիչ Ալեքսանդր Սաֆարյանը, ֆակուլտետի դասախոս Վարուժան Գեղամյանը, ՀԵՀԵՄ-ի ներկայացուցիչներ:

 

Խոսելով ծառատունկի նպատակի և եկեղեցի-համալսարան կապերի ամրապնդման մասին՝ ԵՊՀ արևելագիտության ֆակուլտետի դեկան Ռուբեն Մելքոնյանն ընդգծեց. «ԵՊՀ արևելագիտության ֆակուլտետի և Մայր Աթոռ Սուրբ Էջմիածնի համագործակցությունը երկար տարիների պատմություն ունի, և ի նշանավորումն ԵՊՀ 100-ամյակի` երկուստեք առաջարկեցին ծառ տնկել՝ այդ կերպ նպաստելով նաև եկեղեցի-համալսարան կապերի ամրապնդմանը»:

 

Վերջինիս խոսքով, ծառատունկի վայրը ևս պատահական ընտրված չէ. «Եղևնին տնկվելու է մայրաքաղաքի «սրտում», իսկ համապատասխան ցուցանակը փաստելու է, որ մենք ունենք ոչ միայն 1718-ամյա եկեղեցի, այլև 100-ամյա Մայր բուհ»:

 

Մինչև ծառատունկի սկսելը համալսարանականները հանդիպեցին ՀԵՀԵՄ հոգևոր տեսուչ, կենտրոնական գրասենյակի տնօրեն Հոգեշնորհ Հայր Թովմա վարդապետ Խաչատրյանին:

 

Վերջինս ողջունեց համալսարանականներին, ինչպես նաև մշտադալար եղևնու տնկումը Սուրբ Աննա եկեղեցու բակում և հույս հայտնեց, որ ԵՊՀ-ի և Հայ առաքելական եկեղեցու համագործակցությունն ավելի է խորանալու:

 

ԵՊՀ պրոռեկտոր Արթուր Իսրայելյանը նշեց, որ ԵՊՀ 100-ամյակին նվիրված ծառատունկն արդեն երրորդն է:

 

«Ապրիլին Քաշաթաղի շրջանի Բերձոր քաղաքում հիմնադրվեց ԵՊՀ 100-ամյակին նվիրված պուրակ, որտեղ տնկվեցին խորհրդանշական ընկուզենիներ, դրան հաջորդեց ԵՊՀ հիմնադրման 100-ամյակի միջոցառումների շրջանակում օտարերկրյա հյուրերի կողմից Ցեղասպանության թանգարան-ինստիտուտի պուրակում եղևնու տնկումը, իսկ այժմ այստեղ անցկացվեց խորհրդանշական երրորդ ծառատունկը»,- ասաց պրոռեկտորը:

 

Նշենք, որ ծառատունկից հետո արևելագետները ՀԵՀԵՄ կենտրոնական գրասենյակի հետ համագործակցության շրջանակում հանդես եկան Ստամբուլի Հայոց պատրիարքությանը նվիրված դասախոսությամբ:

 

Մեզ հետ զրույցում Վարուժան Գեղամյանը նշեց, որ նմանաբնույթ հանրային դասախոսությունները շարունակական բնույթ են կրելու, և համագործակցության ընթացքում իրականացվելու են նաև այլ ծրագրեր: 

 

Անգին Խաչատրյան

Այլ նորություններ
«ՄԱՅՐԵՆԻՆ ՄԵՐ ԱԶԳԱՅԻՆ ԻՆՔՆՈՒԹՅՈՒՆՆ Է, ՄԵՐ ԱՆՁՆԱԳԻՐԸ». ՀԱՄԱԼՍԱՐԱՆԱԿԱՆՆԵՐԸ  ԵՎ «ՇԻՐԱԿԱՑՈՒ ՃԵՄԱՐԱՆԻ» ՍԱՆԵՐԸ  ՏՈՆՈՒՄ ԵՆ ՄԱՅՐԵՆԻԻ  ՕՐԸ
ԵՊՀ մշակույթի կենտրոնի և «Շիրակացու ճեմարան» միջազգային գիտակրթական համալիրի համատեղ ջանքերով այսօր տեղի է ունեցել Մայրենի լեզվի օրվան նվիրված «Մայրենի լեզու, Մայր ճեմարան, Մայր համալսարան» խորագիրը կրող միջոցառումը:
«ԱՅՍ ՕՐԸ ՀՐԱՇԱԼԻ ԱՌԻԹ ՊԵՏՔ Է ԴԱՌՆԱ, ՈՐ ՄԵՐ ԵՐԻՏԱՍԱՐԴՈՒԹՅՈՒՆԸ ՀԱՍԿԱՆԱ՝ ԳՐԱԿԱՆ  ՀԱՅԵՐԵՆՈՎ, ԳԵՂԵՑԻԿ ՀԱՅԵՐԵՆՈՎ ՈՒ ՀԱՅԿԱԿԱՆ ՀԱՅԵՐԵՆՈՎ ԽՈՍԵԼԸ ՆՈՐԱՈՃ Է». ԱՅՍՕՐ ՄԱՅՐԵՆԻ ԼԵԶՎԻ ՄԻՋԱԶԳԱՅԻՆ ՕՐՆ Է
Մայրենի լեզվի միջազգային օրն ընդունվել է ՅՈՒՆԵՍԿՕ-ի գլխավոր համաժողովի 30-րդ նստաշրջանի որոշումով 1999 թվականի նոյեմբերին, և 2000 թվականից սկսած՝ փետրվարի 21-ը նշվում է որպես մայրենի լեզուների իրավունքների ճանաչման և գործածության աջակցման օր։ Մայրենի լեզվի միջազգային օրը 2005 թվականից նշվում է նաև Հայաստանում: