19.03.2019 | 
Կրթություն
«ՀԱՋՈՂՈՒԹՅԱՆ ՀԱՍՆԵԼՈՒ ՀԱՄԱՐ ՇԱՏ ԿԱՐԵՎՈՐ Է ԻՆՔՆԻՐԱՑՄԱՆ ՃԻՇՏ ՈԼՈՐՏ ԳՏՆԵԼԸ». «ԼԱՎԱԳՈՒՅՆ ՈՒՍԱՆՈՂ» ՀԱՆՐԱՊԵՏԱԿԱՆ ՄՐՑՈՒՅԹԻ ՄՐՑԱՆԱԿԱԿԻՐ ԴԱՎԻԹ ԱՔԵԼՅԱՆ
«ՀԱՋՈՂՈՒԹՅԱՆ ՀԱՍՆԵԼՈՒ ՀԱՄԱՐ ՇԱՏ ԿԱՐԵՎՈՐ Է ԻՆՔՆԻՐԱՑՄԱՆ ՃԻՇՏ ՈԼՈՐՏ ԳՏՆԵԼԸ». «ԼԱՎԱԳՈՒՅՆ ՈՒՍԱՆՈՂ» ՀԱՆՐԱՊԵՏԱԿԱՆ ՄՐՑՈՒՅԹԻ ՄՐՑԱՆԱԿԱԿԻՐ ԴԱՎԻԹ ԱՔԵԼՅԱՆ
Փիլիսոփայության և հոգեբանության ֆակուլտետի փիլիսոփայության բաժնի 4-րդ կուրսի ուսանող Դավիթ Աքելյանը «Հանրապետության լավագույն ուսանող-2018» մրցույթում բակալավրի կրթական ծրագրով հումանիտար գիտությունների ոլորտում զբաղեցրել է առաջին տեղը: ՀՀ ԿԳ նախարարի կողմից նա պարգևատրվել է հավաստագրով և միանվագ անվանական կրթաթոշակով:

Դավիթը մեզ հետ զրույցում պատմում է իր հաջողությունների ու առաջիկա ծրագրերի մասին:

 

«Յուրաքանչյուր նոր սերունդ կատարում է իր նախորդների մշակույթի դիալեկտիկական բացասումը». Գեորգ Վիլհելմ Ֆրիդրիխ Հեգելի հետևյալ տողերը նպատակ ունեն ցույց տալու հին և գալիք սերունդների փոխադարձ կապն ու ժամանակի ընթացքում դրսևորվելիք հնարավոր փոխակերպությունը:

 

Դավիթը զրույցը սկսեց գերմանական դասական փիլիսոփայության ներկայացուցչի՝ Գեորգ Վիլհելմ Ֆրիդրիխ Հեգելի վերոնշյալ խոսքերով:
Այս իմաստով յուրաքանչյուր նոր սերունդ, հաշվի նստելով ու ընդունելով նախորդ սերնդի կողմից ստացված մտավոր, մշակութային ու այլ արժեքներն ու ժառանգությունը, իր հերթին չբացառելով դրանք, փորձում է դրանց հիմքի վրա կառուցել իր պատկերացումների սոցիոմշակութային նոր տիրույթներն ու արժեհամակարգը։


Այս մրցանակը շատ պարտավորեցնող է, այն իմ մասնագիտական հաջողությունների մեկնակետն է: Այսօր հասարակության մեջ ավելի շատ գնահատվում են բնագիտական ոլորտի հաջողությունները, իսկ հումանիտար ոլորտը կարծես թե հետին պլան է մղվել: Հումանիտար ոլորտում մրցանակ ստանալն ինձ պարտավորեցնում է 21-րդ դարում փիլիսոփայության օրինակով հումանիտար ոլորտի տեղն ու դերը ճիշտ մատնանշել և ցույց տալ:

 

Փիլիսոփայության և հոգեբանության ֆակուլտետի ընտրության հարցում իր դերն է ունեցել ավագ դպրոցում անցած հասարակագիտության մասին դասընթացների շարքը:
Իմ կարծիքով, «Փիլիսոփայություն» առարկան մարդուն տալիս է բազմաբովանդակ գիտելիքներ և մատնանշում այն ճանապարհը, որով պետք է անցնել նպատակին հասնելու համար՝ հաղթահարելով խոչընդոտները: Փիլիսոփայության ուսումնասիրությունը մարդու կայացման ճանապարհներից մեկն է: Ես այսպես կսահմանեմ այն՝ «Փիլիսոփայությունը նպատակ ունի վերջավոր մարդու տեղը մտածելու անվերջ աշխարհում»:

 

ԵՊՀ փիլիսոփայության և հոգեբանության ֆակուլտետ ընդունվելն իմ կյանքում բեկումնային նշանակություն է ունեցել: Մեր ֆակուլտետում տիրում է այնպիսի միջավայր, որտեղ դու ազատ ես և՛ մտածելու, և՛ գործելու համար: Այստեղ գրեթե ամեն ինչ նպաստում է ուսանողի մասնագիտական կայացմանը և սոցիալիզացմանը, ինչպես նաև մի շարք այլ որակների զարգացմանը: Ուսանողների և դասախոսների միջև այնպիսի ընկերական փոխհարաբերություններ են, որոնք նպաստում են, որ ուսանողն իր տեղը գտնի մասնագիտության մեջ:

 

 

ԵՊՀ-ում ես հայտնվեցի մի այլ աշխարհում, որտեղ կարողացա ամբողջովին ինքնիրացնել կարողություններս իմ իմացությունների շրջանակում: Համալսարանն անգնահատելի դեր ունեցավ իմ անձնային և մասնագիտական զարգացման գործում:
Նախատեսում եմ ուսումս շարունակել Գերմանիայի Լայբնիցի անվան Հանովերի համալսարանում և ուսումնասիրել գիտության փիլիսոփայությունը: Իմ կրթությունը չի սահմանափակվի միայն փիլիսոփայության ուսումնասիրությամբ, ցանկանում եմ նաև այլ մասնագիտացումներ ձեռք բերել: Նախատեսում եմ անցնել ակադեմիական և ոչ ակադեմիական երկար ուսումնառության ճանապարհ, քանի որ սովորելու համար երբեք ուշ չէ:


Կարևորում եմ անհատի սոցիալական ակտիվությունը: Առաջին իսկ կուրսից մասնակցել եմ ԵՊՀ ՈՒԽ-ի և ՈՒԳԸ-ի կազմակերպած սոցիալ-մշակութային մի շարք միջոցառումների, ինչպես նաև ինքս եմ կազմակերպում տարբեր կրթական միջոցառումներ: Մասնակցել եմ «ԵՊՀ լավագույն ուսանող» մրցանակաբաշխությանը, որի ժամանակ «Փիլիսոփայության և հոգեբանության ֆակուլտետի լավագույն ուսանող» անվանակարգում արժանացել եմ արծաթե մեդալի:

Տարբեր ՀԿ-ներում ծավալում եմ կամավորական գործունեություն, որն էլ նպաստում է իմ ինքնաճանաչողությանը և մասնագիտական աճին: Կարևորում եմ նաև սպորտով զբաղվելը: Ինը տարի զբաղվել եմ թեթև ատլետիկայով:

 

Տարբեր գիտական ամսագրերում հրատարակել եմ մի շարք գիտական հոդվածներ, որոնք վերաբերել են գիտության պատմությանը, գիտության փոփոխման հարացույցին: Այժմ էլ աշխատում եմ «Աշխարհի գիտական պատկերի փոփոխությունը Ի. Նյուտոնից մինչև նոր ժամանակներ» հոդվածի վրա:

 

Սիրում եմ ուսումնասիրել օտար լեզուներ. այժմ սովորում եմ գերմաներեն, ապագայում ուսումնասիրելու եմ նաև չինարեն, քանի որ հետաքրքրվում եմ արևելյան մշակույթի գրականությամբ և փիլիսոփայությամբ:

 

Փորձում եմ նաև ինքնիրացվել ոչ ֆորմալ կրթական միջավայրում, քանի որ անհատի զարգացման վրա անկյունաքարային նշանակություն կարող են ունենալ ոչ ֆորմալ միջավայրում ստացած գիտելիքները և կրթությունը: «Վորլդ Վիժն Հայաստան» զարգացման և բարեգործական միջազգային կազմակերպությունում և «Երիտասարդները հանուն զարգացման» հիմնադրամում վերապատրաստվել եմ և այժմ ինքս եմ վարում տարբեր դասընթացներ:

 

 

Հաջողության հասնելու համար շատ կարևոր է ինքնիրացման ճիշտ ոլորտ գտնելը: Այդ նպատակով ուսանողը պետք է բացահայտի իր մեջ եղած տաղանդը և այն փորձի հարաբերել աշխատասիրության հետ: Եթե անհատն իր ներքին կարողությունները դնում է ճիշտ առարկայական տիրույթում և փորձում է իր ունակությունները ճիշտ ինքնադրսևորել ճիշտ վայրում, դրան էլ գումարվում է աշխատասիրությունը, ապա նա կարող է մեծ արդյունքներ ունենալ:

 

Այսօրվա ուսանողի խնդիրն է գտնել և բացահայտել սեփական ինքնիրացման սահմանները և տիրույթները: ԵՊՀ-ն ուսանողներին ինքնիրացվելու համար տալիս է բավական լայն ու բազմաբովանդակ հնարավորություններ: Թեպետ բարոյական արժեքային բնութագիրը մարդը ստանում է իր դաստիարակման վաղ շրջանում, սակայն ուսանողական տարիներն այդ արժեքների համալրման և վերաիմաստավորման ու փոխանցման ժամանակաշրջան են: Այս տեսանկյունից բուհը սկզբունքային նշանակություն կարող է ունենալ անհատի համար:
Ես միշտ փորձել եմ ԵՊՀ-ում եղած միջոցներն օգտագործել՝ իմ մասնագիտության մեջ խորանալու համար: ԵՊՀ-ն ինձ տվել է բավականին լավ բազային հիմք հաջողությունների հասնելու համար:

 

 

Իմ կյանքի առաջաբանն է մշտապես մնալ ինտելեկտուալ «դիսկոմֆորտի» մեջ: Եթե չլինի ինտելեկտուալ «դիսկոմֆորտ», այսինքն՝ եթե նպատակին հասնելու համար չլինեն խոչընդոտներ և արգելքներ, ապա անհատը չի ունենա մոտիվացիա և մղումներ: Մարդը մշտապես պետք է իր առջև դնի խնդիրներ և փորձի դրանք հաղթահարել:

 

Իմ ցանկությունն է համամարդկային նշանակություն ունեցող կարևոր գործ անել: Այն որպես անկյունաքարային արժեք և հեռահար նպատակ պահպանելով՝ ես փորձում եմ իմ ողջ գործունեությունը սրա շուրջ կառուցել և խորանալ իմ մասնագիտության մեջ:

 

Նադեժդա Տեր-Աբրահամյան

Այլ նորություններ
ԵՊՀ-ՈՒՄ ՏԵՂԻ Է ՈՒՆԵՑԵԼ ԻԻՀ ԽՈՐՀՐԴԱՐԱՆԻ ՀԱՅԱԶԳԻ ՊԱՏԳԱՄԱՎՈՐԻ ՊԱՐՍԿԵՐԵՆ ՄԵՆԱԳՐՈՒԹՅԱՆ ՇՆՈՐՀԱՆԴԵՍԸ
ԵՊՀ արևելագիտություն ֆակուլտետի իրանագիտության ամբիոնում այսօր տեղի են ունեցել ԻԻՀ խորհրդարանի հայազգի պատգամավոր, պատմագիտության դոկտոր Կարեն Խանլարյանի «Հայաստանի աշխարհագրության սահմանումը ըստ իսլամական աղբյուրների» պարսկերեն մենագրության շնորհանդեսը և հեղինակի հետ հանդիպումը։
ՍԱՀՄԱՆՎԵԼ Է ԵՊՀ 2019-2020 ՈՒՍՈՒՄՆԱԿԱՆ ՏԱՐՎԱ ՀԱՄԱՐ ՄԻՋԻՆ ՈՐԱԿԱԿԱՆ ԳՆԱՀԱՏԱԿԱՆԻ (ՄՈԳ) ՇԵՄԸ
ԵՊՀ-ում 2019-2020 ուսումնական տարվա համար միջին որակական գնահատականի (ՄՈԳ) շեմը բակալավրիատում սահմանվել է 11.00-ն, իսկ մագիստրատուրայում՝ 15.00-ն: