25.08.2020 | 
Հասարակություն
ԵՊՀ ՀՈԳԱԲԱՐՁՈՒՆԵՐԻ ԽՈՐՀՈՒՐԴԸ ՔՆՆԱՐԿԵԼ Է ՌԵԿՏՈՐԻ ԵՎ ԻՄ ՏՆՕՐԵՆԻ ՄՐՑՈՒՅԹՆԵՐԻ ԳՈՐԾԸՆԹԱՑՆԵՐԸ
ԵՊՀ ՀՈԳԱԲԱՐՁՈՒՆԵՐԻ ԽՈՐՀՈՒՐԴԸ ՔՆՆԱՐԿԵԼ Է ՌԵԿՏՈՐԻ ԵՎ ԻՄ ՏՆՕՐԵՆԻ ՄՐՑՈՒՅԹՆԵՐԻ ԳՈՐԾԸՆԹԱՑՆԵՐԸ
ԵՊՀ-ում այսօր տեղի ունեցած Հոգաբարձուների խորհրդի նիստի օրակարգային երրորդ հարցը վերաբերում էր «Երևանի պետական համալսարան» հիմնադրամի և «Երևանի պետական համալսարան» հիմնադրամի Իջևանի մասնաճյուղի տնօրենի մրցույթների գործընթացներին:

ՀԽ նորընտիր նախագահ Գևորգ Մուրադյանը Հոգաբարձուների խորհրդի անդամներին տեղեկացրեց, որ դեռևս մարտին նախատեսված` ԵՊՀ ռեկտորի և ԻՄ տնօրենի մրցույթները հետաձգվեցին՝ պայմանավորված երկրում հաստատված արտակարգ դրությամբ:

 

Նրա խոսքով, եթե անգամ այդ ժամանակ նիստը տեղի ունենար, ապա ռեկտորի և տնօրենի ընտրության բուն գործընթացը կարող էր խնդրահարույց լինել ու վիճարկվեր դատարանում: Գևորգ Մուրադյանի հավաստմամբ, իրավական կարգավորում այն մասին, թե ինչ պետք է անել հիմա, չկա. «Հոգաբարձուների խորհուրդը հայտարարել է մրցույթ, եղել է հինգ թեկնածու, բայց գործընթացը կանգ է առել»:

 

Նրա կարծիքով, ԵՊՀ ՀԽ-ն բարձրագույն ղեկավարման մարմին է և լիազորված է որոշելու, թե ինչ քայլ պետք է ձեռնարկել հետագայում, բայց հաշվի առնելով բոլոր ռիսկերը՝ Գևորգ Մուրադյանն առաջարկեց, որ ՀԽ-ն հարցում ուղարկի նախ ԵՊՀ իրավագիտության ֆակուլտետ՝ հասկանալու, թե ինչ իրավակարգավորումներ կան տվյալ իրավիճակում, և դրան զուգահեռ՝ հարցում ուղարկի Արդարադատության նախարարություն:

 

ՀԽ նախագահի դիտարկմամբ, այդ գործընթացը կտևի 7-10 օր և թույլ կտա իրավական ճիշտ ճանապարհով կազմակերպել հետագա քայլերը. «ԵՊՀ ռեկտորի ընտրության հարցը Հոգաբարձուների խորհրդի առջև ծառացած խնդիրներից առաջնայինն է այսօր»:

 

Երևանի պետական համալսարանի հեռահաղորդակցության և ազդանշանների մշակման ամբիոնի պրոֆեսոր, ՀՀ ԳԱԱ թղթակից անդամ Ա. Հախումյանն առաջարկեց նոր մրցույթ հայտարարել կամ թույլ տալ այլ թեկնածուների ևս առաջադրվելու, քանի որ փոխվել են խաղի կանոնները և ՀԽ անդամները:

 

Նրա կարծիքով, կարելի է սպասել նաև մինչև կընդունվի «Բարձրագույն կրթության և գիտության մասին» նոր օրենքը, որով այլ չափորոշիչներ են սահմանվում խորհուրդների և ռեկտորի ընտրության համար:  

 

Գևորգ Մուրադյանը փաստեց, որ իրավական ճանապարհը պետք է պարզաբանվի, իսկ ինչ վերաբերում է նոր օրենքի ընդունմանը, ապա դրա ժամկետները դեռևս անորոշ են:

 

ԿԳՄՍ նախարարի տեղակալ Ժաննա Անդրեասյանը նշեց, որ օրենքի նախագիծը դեռևս կառավարությունում է և չի ուղարկվել ԱԺ: Բացի դրանից՝ նրա խոսքով, անիմաստ է այս պահին խոսել և քայլեր պլանավորել նախագծի դրույթների համաձայն, քանի որ դեռևս անհայտ է, թե վերջնական ինչ տեսք կունենա և ինչ ձևակերպմամբ կընդունվի օրենքի նախագիծը:

 

Հոգաբարձուների խորհուրդը քվեարկությամբ ընդունեց Գևորգ Մուրադյանի առաջարկությունը:

 

Նիստի ամբողջական տեսագրությունը՝ https://www.youtube.com/watch?v=ul3vbafML6I&t=7s :

 

Քնար Միսակյան

Այլ նորություններ
ԳԵՎՈՐԳ ԱՐՇԱԿՅԱՆԸ «ՄԱՐՏԱԿԱՆ ԽԱՉ» 1-ԻՆ ԱՍՏԻՃԱՆԻ ՇՔԱՆՇԱՆԱԿԻՐ Է
Արցախի Հանրապետության նախագահ Արայիկ Հարությունյանի որոշմամբ, ԵՊՀ շրջանավարտ, ավագ լեյտենանտ, Արցախյան երկրորդ պատերազմին մասնակցած և Շուշիի պաշտպանության համար հերոսաբար զոհված Գևորգ Արշակյանը պարգևատրվել է «Մարտական խաչ» 1-ին աստիճանի շքանշանով, որն այսօր ԵՊՀ ռեկտորի ժ.պ. Գեղամ Գևորգյանը փոխանցել է նրա ընտանիքին:
«ՈՒԺԵՂ ՊԵՏՈՒԹՅԱՆ ՀԻՄՔՈՒՄ ՀԶՈՐ ԳԻՏՈՒԹՅՈՒՆՆ Է». ՄՀԵՐ ԽԱՉԱՏՐՅԱՆ
ԵՊՀ ֆիզիկայի ֆակուլտետի 4-րդ կուրսի ուսանող Մհեր Խաչատրյանը ԿԳՄՍ նախարարության կազմակերպած «Հանրապետության լավագույն ուսանող-2020» մրցույթի հաղթողներից է: Մեքենայական ուսուցման ոլորտում մասնագիտացող Մհերի հետ զրուցել ենք մասնագիտության ընտրության, դրա հեռանկարների, կրթության ու գիտության զարգացմանն ուղղված քայլերի մասին: