25.03.2020 | 
Կրթություն
ՏՆՏԵՍԱԳԻՏՈՒԹՅԱՆ ԵՎ ԿԱՌԱՎԱՐՄԱՆ ՖԱԿՈՒԼՏԵՏՈՒՄ ՀԵՌԱՎԱՐ ՈՒՍՈՒՑՈՒՄԸ ՀԱՋՈՂՈՒԹՅԱՄԲ Է ԻՐԱԿԱՆԱՑՎՈՒՄ
ՏՆՏԵՍԱԳԻՏՈՒԹՅԱՆ ԵՎ ԿԱՌԱՎԱՐՄԱՆ ՖԱԿՈՒԼՏԵՏՈՒՄ ՀԵՌԱՎԱՐ ՈՒՍՈՒՑՈՒՄԸ ՀԱՋՈՂՈՒԹՅԱՄԲ Է ԻՐԱԿԱՆԱՑՎՈՒՄ
Տնտեսագիտության և կառավարման ֆակուլտետում մարտի 20-ին տեղի է ունեցած առցանց ուսուցման կազմակերպման վերաբերյալ խորհրդակցությունից հետո՝ երեք օր անց՝ մարտի 23-ից, սկսվել է դասացուցակով (լսարանային ուսուցման) նախատեսված բոլոր առարկաների առցանց դասավանդումը:

Դասավանդման գործընթացի իրականացման մասին զրուցել ենք ֆակուլտետի դեկան Հայկ Սարգսյանի և դեկանի տեղակալ Կարեն Եղոյանի հետ։ Մինչև արտակարգ դրության ավարտը ֆակուլտետում ուսումնական գործընթացի կազմակերպման և վերահսկողության պատասխանատու Կարեն Եղոյանն է:

 

Նշենք, որ այս ընթացքում ֆակուլտետում դասավանդվող առարկաների մեծ մասի դասախոսներն առարկայի վերաբերյալ բոլոր անհրաժեշտ նյութերն ուղարկել են ուսանողներին, իսկ ոմանք էլ արդեն հասցրել են տարբեր հարթակներում անցկացնել առցանց դասընթացներ:

 

Ինչպես արդեն տեղեկացրել ենք, Տնտեսագիտության և կառավարման ֆակուլտետում դասերի անցկացումը վերահսկելու նպատակով մշակվել և դասախոսներին են ուղարկվել հաշվետվության ձևեր, որոնք դասախոսը յուրաքանչյուր շաբաթվա համար պետք է լրացնի և ուղարկի ամբիոնի վարիչին (մագիստրոսական ծրագրի դեպքում՝ ծրագրի ղեկավարին): Վերջինս յուրաքանչյուր երեքշաբթի, հիմնվելով դասախոսների հաշվետվությունների վրա, պետք է ամփոփ հաշվետվություն ներկայացնի ֆակուլտետի յուրաքանչյուր ամբիոնի (մագիստրոսական ծրագրի) նախորդ շաբաթվա առցանց ուսուցման կատարողականի վերաբերյալ:

 

Մեզ հետ զրույցում ֆակուլտետի դեկան Հայկ Սարգսյանն ասաց, որ ստացված հաշվետվության տվյալներով դասախոսական կազմի 70 և ուսանողության 50 տոկոսից ավելին ներգրավված է հեռավար ուսուցման գործընթացում:

 

«Ուսանողներից շատերը մեծ խանդավառությամբ են մասնակցում այս գործընթացին: Չնայած առկա ուսուցումն իր արդյունավետությամբ առաջին տեղում է, սակայն նմանօրինակ փորձից հետո, մենք կարծում ենք, որ հնարավոր է որոշ դասընթացներ հետագայում էլ իրականացնել հեռավար ձևով»,- նշեց նա:

 

Տնտեսագիտության և կառավարման ֆակուլտետի դեկանի տեղակալի, մինչև արտակարգ դրության ավարտը ֆակուլտետում ուսումնական գործընթացի կազմակերպման և վերահսկողության պատասխանատու Կարեն Եղոյանի գնահատմամբ, այս պահին հեռավար ուսումնական գործընթացը թե՛ առկա և թե՛ հեռակա համակարգում ընթանում է բնականոն հունով:

 

«Մենք մշտական կապի մեջ ենք բոլոր դասախոսների հետ և ամեն շաբաթվա հաշվետվությունից հետո ամեն ինչ անում ենք՝ հեռավար ուսուցումն ավելի արդյունավետ և հասանելի դարձնելու համար»,-  ասաց նա:

 

Մարինա Առաքելյան

Այլ նորություններ
ՎԻՐՏՈՒԱԼ ՇՐՋԱՅՑ ՀԱՅԱՍՏԱՆԻ ՊԱՏՄՈՒԹՅԱՆ ԹԱՆԳԱՐԱՆՈՒՄ
ԵՊՀ պատմության ֆակուլտետի ուսանողական գիտական ընկերության և Հայաստանի պատմության թանգարանի համատեղ նախաձեռնությամբ օգոստոսի 3-ին տեղի ունեցավ վիրտուալ շրջայց Հայաստանի պատմության թանգարանում։ Էքսկուրսիան անցկացրեց թանգարանի էքսկուրսիոն բաժնի վարիչ Լիլիթ Հովհաննիսյանը:
ԵՊՀ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ԿԱՐԾԻՔԸ՝ ՀԱՆՐԱԿՐԹՈՒԹՅԱՆ ՊԵՏԱԿԱՆ ԱՌԱՐԿԱՅԱԿԱՆ ՉԱՓՈՐՈՇԻՉՆԵՐԻ ԵՎ ԾՐԱԳՐԵՐԻ ՄԱՍԻՆ
Այս օրերին տեղի են ունենում քննարկումներ «Հայոց լեզու 7-12-րդ դասարաններ» և «Գրականություն 7-12-րդ դասարաններ» հանրակրթության պետական առարկայական չափորոշիչների և ծրագրերի շուրջ: Արտահայտվեցին բազմաթիվ հայագետներ, այդ թվում՝ ԵՊՀ հայ բանասիրության ֆակուլտետի դասախոսներ: Հարցը քննարկվել է նաև ֆակուլտետի գիտխորհրդի նիստում: