17.09.2007 | 
Կրթություն
ՊՈՐՏՈՒԳԱԼԵՐԵՆԻ ՊԱՀԱՆՋԱՐԿ ԿԱ
ՊՈՐՏՈՒԳԱԼԵՐԵՆԻ ՊԱՀԱՆՋԱՐԿ ԿԱ
ԵՊՀ-ի ռոմանագերմանական բանասիրության ֆակուլտետի ուսանողները որպես երկրորդ օտար լեզու այսուհետ կարող են ուսումնասիրել Բրազիլիայի պետական լեզուն` պորտուգալերենը:

Հայաստանում Բրազիլիայի դեսպանատան եւ Երեւանի պետական համալսարանի ջանքերով այսօր բացված պորտուգալերենի հատուկ լսարանում ուսանողները ոչ միայն ուսումնասիրելու են այդ լեզուն, այլեւ ծանոթանալու են Բրազիլիայի պատմությանը, գրականությանը եւ մշակույթին: 

Մի քանի տարի առաջ ԵՊՀ-ում պորտուգալերեն դասավանդելու փորձ է կատարվել, բայց մասնագետների բացակայության պատճառով մտահղացումը չի իրականացվել: Այս տարի Հայաստանում Բրազիլիայի դեսպանատան ջանքերով ընտրել են մի երիտասարդ դասախոսի` Դանիելա Կապիլեին, ով պորտուգալերեն է դասավանդել իր հայրենի երկրում: Ուստի Ռոմանագերմանական բանասիրության ֆակուլտետի դեկան Կարո Կարապետյանը համոզված է, որ այս անգամ ծրագիրը հաջողություն կունենա. մասնագետի բացակայության խնդիր այլեւս չկա, բացի այդ հարցերը լուծվում են արդեն պետական մակարդակով :

Բրազիլիան համարվում է արագ տեմպերով զարգացող պետություն, որը, ԵՊՀ ռեկտոր Արամ Սիմոնյանի կարծիքով, վաղուց արդեն դադարել է ընկալվել որպես միայն ֆուտբոլի եւ պարահանդեսների երկիր:

«Մեր պետությունը հետաքրքրված է Բրազիլիայի հետ բազմակողմանի կապերի հաստատմամբ,եւ համալսարանն անմասն չի մնում դրանից»,- ասաց նա լսարանի բացման արարողության ժամանակ: Ռեկտորի խոսքերով` համագործակցությունն ունենալու է շարունակություն, եւ չի բացառվում բրազիլական մշակույթի կենտրոնի ստեղծումը, որտեղ առավել խորությամբ կուսումնասիրվի Բրազիլիայի հզոր քաղաքակրթությունը:

Արտաքին գործերի փոխնախարար Արման Կիրակոսյանի ներկայությունը եւս փաստում էր, որ այսպիսի նախաձեռնությունների իրականացումը հայ-բրազիլական հարաբերությունների զարգացման կարեւոր բաղադրիչներից է:

Բրազիլիայի դեսպանատունը հետեւելու է, որ ԵՊՀ-ում պորտուգալերենի դասընթացների անցկացումը դրվի բարձր հիմքերի վրա: Ինչպես հայտնեց Հայաստանում Բրազիլիայի դեսպան Ռենատա Ստիլեն, իրենց աջակցությունը շարունակական է լինելու:

Այլ նորություններ
ՎԻՐՏՈՒԱԼ ՇՐՋԱՅՑ ՀԱՅԱՍՏԱՆԻ ՊԱՏՄՈՒԹՅԱՆ ԹԱՆԳԱՐԱՆՈՒՄ
ԵՊՀ պատմության ֆակուլտետի ուսանողական գիտական ընկերության և Հայաստանի պատմության թանգարանի համատեղ նախաձեռնությամբ օգոստոսի 3-ին տեղի ունեցավ վիրտուալ շրջայց Հայաստանի պատմության թանգարանում։ Էքսկուրսիան անցկացրեց թանգարանի էքսկուրսիոն բաժնի վարիչ Լիլիթ Հովհաննիսյանը:
ԵՊՀ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ԿԱՐԾԻՔԸ՝ ՀԱՆՐԱԿՐԹՈՒԹՅԱՆ ՊԵՏԱԿԱՆ ԱՌԱՐԿԱՅԱԿԱՆ ՉԱՓՈՐՈՇԻՉՆԵՐԻ ԵՎ ԾՐԱԳՐԵՐԻ ՄԱՍԻՆ
Այս օրերին տեղի են ունենում քննարկումներ «Հայոց լեզու 7-12-րդ դասարաններ» և «Գրականություն 7-12-րդ դասարաններ» հանրակրթության պետական առարկայական չափորոշիչների և ծրագրերի շուրջ: Արտահայտվեցին բազմաթիվ հայագետներ, այդ թվում՝ ԵՊՀ հայ բանասիրության ֆակուլտետի դասախոսներ: Հարցը քննարկվել է նաև ֆակուլտետի գիտխորհրդի նիստում: