23.12.2016 | 
Գիտություն
ՈՒԳԸ-Ն ԱՄՓՈՓԵՑ ԱՆՑՆՈՂ ԿԻՍԱՄՅԱԿԸ
ՈՒԳԸ-Ն ԱՄՓՈՓԵՑ ԱՆՑՆՈՂ ԿԻՍԱՄՅԱԿԸ
Այսօր ԵՊՀ Պալեանների անվան դահլիճում տեղի ունեցավ ԵՊՀ ՈՒԳԸ 2016-2017 ուստարվա առաջին կիսամյակի ընդլայնված նիստը:

Ամփոփելով ուստարին՝ Ուսանողական գիտական ընկերությունը ներկայացրեց անցնող կիսամյակի հաջողությունները, ձեռքբերումներն ու բացթողումները: Բարի ավանդույթ դարձած ընդլայնված նիստերը նպատակ ունեն խրախուսելու նաև ֆակուլտետային ՈՒԳԸ-ների ակտիվ գործունեությունն ու լավագույն անդամներին:

 

ԵՊՀ ՈՒԳԸ նախագահ Մհեր Հակոբյանը ողջունեց ՈՒԳԸ-ականներին՝ նշելով, որ հաշվետու կիսամյակի ընթացքում կառույցը հասցրել է իրականացնել մի շարք գիտաժողովներ, սեմինար-դասընթացներ, գիտաճանաչողական այցեր, ֆիլմի դիտումներ և այլն: Ըստ Մհեր Հակոբյանի՝ դրանք տարեցտարի կատարելագործվում են՝ շնորհիվ այն ուսանողների, ովքեր, ջանք ու եռանդ չխնայելով, կազմակերպում և իրականացնում են տարաբնույթ միջոցառումներ:

 

Ընդլայնված նիստի ընթացքում բարձր գնահատվեց հատկապես Իրավագիտության, Պատմության, Ռոմանագերմանական բանասիրության և Սոցիոլոգիայի ֆակուլտետների ՈՒԳԸ-ների գործունեությունը: Ինչ վերաբերում է գերազանց գնահատականներին, ապա լավագույն եռյակում այս կիսամյակում հայտնվել են երեքը՝ Ինֆորմատիկայի և կիրառական մաթեմատիկայի, Ռադիոֆիզիկայի և Պատմության ֆակուլտետների ՈՒԳԸ-ները:

 

ԵՊՀ ՈՒԳԸ նախագահը կառույցի ներկայացուցիչներին հորդորեց ավելի ակտիվ լինել և մեծ ջանքեր գործադրել՝ ֆակուլտետային ՈՒԳԸ-ների գործունեությունը բարձր նշաձողի հասցնելու համար:

 

ՈՒԳԸ-ի գործունեության կիսամյակային հաշվետու միջոցառմանը ներկա էր նաև ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը: Պրոռեկտորը ողջունեց ներկաներին, խոսեց ՈՒԳԸ գործունեությունից, ինչպես նաև պատասխանեց ուսանողներին հետաքրքրող հարցերին: Դրանք հիմնականում վերաբերում էին մագիստրատուրայի ընդունելությանը, տարկետման իրավունքով սահմանված տեղերին, ինչպես նաև ասպիրանտուրայում պարտադիր պայման հանդիսացող հոդվածների առկայությանը:

 

 

Տեղեկացնենք նաև, որ 2017 թ.-ին ԵՊՀ ՈՒԳԸ-ն իր հիմնական շեշտը կդնի գիտական մտածողության բարձրացմանը միտված սեմինար-դասընթացների վրա: Կկազմակերպվեն նաև երիտասարդական համաժողով, ինչպես նաև միջազգային գիտաժողով, որը նվիրված կլինի ԵՊՀ ՈՒԳԸ հիմնադրման 70-ամյակին:

 

Միջոցառման ավարտին գերազանց գնահատականի արժանացած ֆակուլտետային ՈՒԳԸ-ները պարգևատրվեցին հավաստագրերով և մասնագիտական գրքերով:

Այլ նորություններ
ՀԵՏԱԶՈՏՄԱՆ ԱՌԱՆՑՔՈՒՄ ԻՐԱՎԱԿԱՆ ԴԱՇՏԻ ԽՆԴԻՐՆԵՐՆ ԵՆ
Այսօր ԵՊՀ իրավագիտության ֆակուլտետում տեղի ունեցավ պրոֆեսորադասախոսական կազմի ամենամյա գիտաժողովը, որը նվիրված էր ՀՀ անկախության 25-ամյակին:
ԻՐԱՆ-ՀԱՅԱՍՏԱՆ-ՎՐԱՍՏԱՆ ԿԱՊԵՐՆ ԱՄՐԱՊՆԴՎՈՒՄ ԵՆ
Այսօր ԵՊՀ Պալեանների անվան դահլիճում մեկնարկեց «Իրան-Հայաստան-Վրաստան. խաղաղ հարևանության և զարգացման տեսլականներ» խորագրով միջազգային գիտաժողովը: