14.02.2018 | 
Քաղաքականություն
ԺՈՒՌՆԱԼԻՍՏԻԿԱՅԻ ՖԱԿՈՒԼՏԵՏՆ ԸՆԴԼԱՅՆՈՒՄ Է ՄԻՋԱԶԳԱՅԻՆ ԿԱՊԵՐԸ
ԺՈՒՌՆԱԼԻՍՏԻԿԱՅԻ ՖԱԿՈՒԼՏԵՏՆ ԸՆԴԼԱՅՆՈՒՄ Է ՄԻՋԱԶԳԱՅԻՆ ԿԱՊԵՐԸ
Այսօր ԵՊՀ ռեկտոր Արամ Սիմոնյանը հյուրընկալեց Սորբոնի համալսարանի տեղեկատվական և հեռահաղորդակցության բարձրագույն դպրոցի ժուռնալիստիկայի բաժնի պատվիրակության ղեկավար Էղվե Դեմեյիին:

Հանդիպմանը ներկա էին ԵՊՀ ժուռնալիստիկայի ֆակուլտետի դեկան Նաղաշ Մարտիրոսյանը, դեկանի տեղակալ Անահիտ Մենեմշյանը, ինչպես նաև ԵՊՀ միջազգային համագործակցության վարչության պետ Ալեքսանդր Մարգարովը:

 

Արամ Սիմոնյանը նախ հյուրին ներկայացրեց բուհի ուսումնագիտական գործընթացը, գիտահետազոտական հիմնական ուղղությունները, ինչպես նաև միջազգային համագործակցությունն արտասահմանյան կրթական կենտրոնների և համալսարանների հետ:

 

«30 տարի է, ինչ Մայր բուհը համագործակցում է ֆրանսիական համալսարանների հետ,  և արդյունքը, անկասկած, գոհացնող է: Ուրախ եմ, որ նախաձեռնել եք Հայաստան և մասնավորապես ԵՊՀ այցելությունը: Վստահ եմ, որ Ժուռնալիստիկայի ֆակուլտետի հետ փոխգործակցությունը պարզապես ծանոթությունների մակարդակով չի մնա, այլ հետագայում կընդլայնվի՝ ներառելով կրթական ծրագրեր, դասախոսների և ուսանողների փոխանակումներ և այլն»,- նշեց Արամ Սիմոնյանը:

 

Էղվե Դեմեյին շնորհակալություն հայտնեց ջերմ ընդունելության համար և նշեց, որ այցելությունը կազմակերպվել է «Կարճատև խմբագրություն Հայաստանում» վերապատրաստման ծրագրի շրջանակում:

 

«Արդեն ինը տարի է, ինչ մենք այցելում ենք տարբեր երկրնեի և նոր բացահայտումներ անում: Նախորդ տարի Ուկրաինայում էինք, իսկ այս տարի Հայաստան այցելությունը ծրագրել և նախաձեռնել են հենց ուսանողները: Պատճառը առաջիկայում Հայաստանում անցկացվելիք Ֆրանկոֆոնիայի միջազգային կազմակերպության 17-րդ գագաթնաժողովն է»,- մանրամասնեց պրոֆեսորը:

 

Նաղաշ Մարտիրոսյանն էլ հավելեց, որ ֆակուլտետը պատրաստ է սերտ համագործակցություն ծավալել ֆրանսիացի գործընկերների հետ.«Հայաստանի մեդիա դաշտը լուրջ փոփոխությունների կարիք ունի, փոփոխություններ, որոնք անմիջականորեն կապված են մեր ֆակուլտետի գործունեության, կրթական ծրագրերի մշակման և ընդհանրապես ուսուցման մեխանիզմների հետ»:

 

Քննարկումներից հետո կողմերը համաձայնություն ձեռք բերեցին առաջիկայում ֆակուլտետների միջև կապն ամրապնդելու և զարգացնելու ուղղությամբ կոնկրետ քայլեր կատարել:

 

Հավելենք, որ վերապատրաստման ծրագրի շրջանակում Հայաստան և Մայր բուհ այցելած Սորբոնի համալսարանի 5 պրոֆեսորներն ու ժուռնալիստիկայի ֆակուլտետի 29 ուսանողները վստահեցնում են, որ հեռանում են մեծ տպավորություններով և կրկին վերադառնալու ակնկալիքով:

Այլ նորություններ
ՀԱՄԱԼՍԱՐԱՆԻ  ՁԵՌՔԲԵՐՈՒՄՆԵՐԸ  ԿՐԹՈՒԹՅԱՆ  ՈԼՈՐՏՈՒՄ
Հայաստանի անկախացումից հետո հանրապետության կրթական ողջ համակարգի բարեփոխումը ժամանակի հրամայականն էր և առաջնահերթ նշանակություն պետք է ունենար երկրի հետագա զարգացման համար: Այս համատեքստում անհրաժեշտ էր ԵՊՀ-ի ընդհանուր գործունեությունն աստիճանաբար արմատապես վերափոխել, որն էլ սկիզբ առավ ՀՀ նախագահի 1992 թ. հրամանագրով: Համալսարանին շնորհվեց կրթական, գիտական և մշակութային ինքնավար հաստատության կարգավիճակ:
ԵՐԵՎԱՆԻ ՊԵՏԱԿԱՆ ՀԱՄԱԼՍԱՐԱՆԻ ՀԻՄՆԱԴՐՄԱՆ 101-ՐԴ ՏԱՐԵԴԱՐՁԻՆ ԸՆԴԱՌԱՋ. ԵՊՀ-Ն ԱԶԳԱՅԻՆ ԱԶԱՏԱԳՐԱԿԱՆ ՊԱՅՔԱՐԻ ԱՌԱՋԱՄԱՐՏԻԿ
1956 թ. փետրվարին տեղի ունեցած ԽՄԿԿ 20-րդ համագումարը, որ դատապարտեց անհատի պաշտամունքը, ԽՍՀՄ պատմության մեջ մտցրեց աննախադեպ բեկում. սկսվեց մի ժամանակաշրջան, երբ փոխվեց մարդկանց մտածելակերպը, աստիճանաբար ձևավորվեց այլախոհական մթնոլորտ: