17.12.2015 | 
Քաղաքականություն
ԵՊՀ-ՈՒՄ ԿԱՌՈՒՑՎԱԾՔԱՅԻՆ ՓՈՓՈԽՈՒԹՅՈՒՆՆԵՐ ԵՆ ԿԱՏԱՐՎԵԼՈՒ
ԵՊՀ-ՈՒՄ ԿԱՌՈՒՑՎԱԾՔԱՅԻՆ ՓՈՓՈԽՈՒԹՅՈՒՆՆԵՐ ԵՆ ԿԱՏԱՐՎԵԼՈՒ
Այսօր կայացավ ԵՊՀ գիտխորհրդի՝ այս տարվա վերջին նիստը: Օրակարգային հարցերը 9-ն էին, քննարկվեցին նաև ընթացիկ հարցեր:

Այս անգամ ԵՊՀ գիտխորհուրդը հյուրընկալել էր «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանին, ով ներկայացրեց ԵՊՀ-ում գործող Հայ-հնդկական գերազանցության կենտրոնի ծրագրերն ու գործունեությունը: Կենտրոնը ստեղծվել է 2011 թ.-ին, բացման արարողությանն էլ մասնակցել է նաև Հնդկաստանի ինֆորմացիոն տեխնոլոգիաների նախարարը:

 

«Քանի որ կենտրոնը պետք է ունենար 3 ուղղություններ՝ կրթական, հետազոտական և մասնագետների փոխանակման, ապա կարևոր էր, որ այն տեղակայված լիներ հայաստանյան բուհերից մեկում: Հետագայում որոշում կայացվեց չսահմանափակվել միայն ՏՏ ոլորտով և փորձել նաև բիզնեսի զարգացման, ձեռներեցության խթանման ծրագրեր իրականացնել: Եվ այսօր այն դարձել է Հայաստանում վերապատրաստման ամենամեծ կենտրոններից մեկը՝ տեխնիկապես հագեցած լսարաններով»,- նշեց պարոն Ենգիբարյանը:  

 

Նիստի ընթացքում հաստատվեցին Աստվածաբանության և Ռադիոֆիզիկայի ֆակուլտետների կանոնադրությունները: Այնուհետև ԵՊՀ ռեկտոր Արամ Սիմոնյանը հակիրճ ներկայացեց ԵՊՀ 2016-2020 թթ. զարգացման ռազմավարական ծրագիրը, «Կոռուպցիոն երևույթների դեմ պայքարի՝ 2014-2015 ուստարվա համալիր միջոցառումների» կատարման արդյունքները, «Երևանի պետական համալսարան» հիմնադրամի 2015 թ.-ի եկամուտների և ծախսերի նախահաշվի (բյուջե) կատարողականը (հունվար-նոյեմբեր), ապա 2016 թ.-ի եկամուտների և ծախսերի նախահաշիվը (բյուջե): Դրանք գիտխորհուրդն ընդունեց ի գիտություն, և փաստաթղթերն ուղարկվեցին Հոգաբարձուների խորհրդի հաստատմանը: Նշենք, որ Հոգաբարձուների խորհրդի նիստը տեղի կունենա դեկտեմբերի 23-ին:  

 

Այնուհետև հերթը հասավ ԵՊՀ Իջևանի մասնաճյուղի՝ վերջին մեկ տարվա գործունեությանը ծանոթանալուն: Հաշվետվությունը գիտխորհրդին ներկայացրեց մասնաճյուղի տնօրեն Սամվել Առաքելյանը:

 

«Հաշվետու տարում վերանայվել է մասնաճյուղի մասնագիտությունների ցանկը՝ դրանք ավելի համապատասխանեցնելով աշխատաշուկայի պահանջներին: Համագործակցության հուշագիր է ստորագրվել մարզում գործող քոլեջների, ավագ և հիմնական դպրոցների ու վարժարանների հետ: Այս տարի վերջապես հասանք այն արդյունքին, որ դասախոսների 50 տոկոսից ավելին ունեն գիտական կոչումներ»,- ձեռքբերումներից մի քանիսն է առանձնացնում պարոն Առաքելյանը՝ հավելելով, սակայն, որ մասնաճյուղի դասախոսները քիչ են ներգրավված միջազգային ծրագրերում, և առաջիկայում պետք է ուշադրությունը կենտրոնացնել նաև այդ խնդրի վրա:

 

Վերջին 1 տարվա ընթացքում տպագրվել է ԵՊՀ Իջևանի մասնաճյուղի դասախոսների հեղինակած 8 մենագրություն, 15 մեթոդական ձեռնարկ և 113 հոդված:  

 

Ընթացիկ հարցերի մեջ քննարկվեց ԵՊՀ կառուցվածքային որոշ փոփոխություններ կատարելու հարցը:

 

«Մենք երկար աշխատելուց հետո ստացանք մի փաստաթուղթ, որը հստակեցնում է համալսարանի կառուցվածքը: Արդյունքում այսօր շատ լավ պատկերացնում ենք մեր կառուցվածքային ստորաբաժանումների քանակը, տեղը, հաստիքացուցակը և այլն: Սա պետք է ներկայացվի Հոգաբարձուների խորհրդի հաստատմանը»,- նշեց պարոն Սիմոնյանը:

 

Ըստ այդմ՝ եթե փաստաթուղթն արժանանա Հոգաբարձուների խորհրդի հավանությանը, ապա ԵՊՀ միջազգային համագործակցության վարչության սփյուռքի բաժինը կվերանվանվի Օտարերկրյա սովորողների կրթության կազմակերպման բաժին, իսկ ԵՊՀ միջազգային կրթական կենտրոնը կլուծարվի:

 

ԵՊՀ ուսանողների հետ տարվող աշխատանքի բաժինը կվերածվի նույնանուն կենտրոնի: Կառուցվածքային փոփոխություններ կկատարվեն նաև Հայագիտական հետազոտությունների ինստիտուտում. կլուծարվեն ԵՊՀ եգիպտագիտության կենտրոնն ու Հայոց պատմության աղբյուրների վերլուծության և գնահատման բաժինը: Վերջինիս փոխարեն կստեղծվեն Հայերենագիտության, Հայոց պետականության պատմության հիմնախնդիրների հետազոտությունների, Սփյուռքագիտական հետազոտությունների և Հայ-ռուսական հարաբերությունների բաժիններ:

 

ԵՊՀ քիմիայի և դեղագիտության ֆակուլտետում կստեղծվի Ֆարմքիմիայի և ֆարմակոգնոզիայի ամբիոն, իսկ Տնտեսագիտության և կառավարման ֆակուլտետի տնտեսագիտության տեսության ամբիոնը կվերանվանվի Տեսական և ընդհանուր տնտեսագիտության ամբիոն:

 

ԵՊՀ ավտոմատ հեռախոսակայանը կլուծարվի, իսկ Տեղեկատվական համակարգերի սպասարկման և զարգացման վարչությունում կստեղծվի հեռախոսային ցանցի սպասարկման բաժին:

 

Նիստի ընթացքում, պաշտոնական հարցերի քննարկումից բացի, նախատեսված էին նաև պարգևատրումներ: Ռուս բանասիրության ֆակուլտետի պրոֆեսոր Լիանա Մաթևոսյանն արժանացավ «Ռուսհամագործակցություն» կազմակերպության դիպլոմին: «Տավիտեան» հիմնադրամի նախագահ Ասո Տավիտեանին էլ գիտխորհրդի որոշմամբ շնորհվեց ԵՊՀ պատվավոր դոկտորի կոչում:

  

Նիստի ավարտին հրապարակվեցին նաև պրոֆեսորի և դոցենտի գիտական կոչում շնորհելու փակ քվեարկության արդյունքները. 4 դասախոս ստացավ պրոֆեսորի, 7-ը՝ դոկտորի կոչումներ:

Այլ նորություններ
ԵՊՀ ՀՈԳԱԲԱՐՁՈՒՆԵՐԻ ԽՈՐՀՐԴԻ ՆԻՍՏԸ ՏԵՂԻ ՉԻ ՈՒՆԵՑԵԼ. ՆԵՐԿԱ ԵՆ ԵՂԵԼ ՄԻԱՅՆ ՀԱՄԱԼՍԱՐԱՆԱԿԱՆ ԱՆԴԱՄՆԵՐԸ
ԵՊՀ հոգաբարձուների խորհրդի այսօր հրավիրված նիստը չի կայացել՝ քվեակազմի բացակայության պատճառով. 32 անդամներից ներկա էին 14-ը:
«ՍԵՐՎԻՍԻ ԿԱԶՄԱԿԵՐՊԻՉ/ՄԵՆԵՋՄԵՆՏ» ԽՈՐԱԳՐՈՎ ԴԱՍԱԽՈՍՈՒԹՅՈՒՆ ԵՐԵՎԱՆԻ ԹԻՎ 190 ԱՎԱԳ ԴՊՐՈՑՈՒՄ
ԵՊՀ աշխարհագրության և երկրաբանության ֆակուլտետի սերվիսի ամբիոնի վարիչ Սեյրան Սուվարյանն այսօր «Սերվիսի կազմակերպիչ/մենեջմենտ» խորագրով դասախոսություն է կարդացել Երևանի թիվ 190 ավագ դպրոցում: