25.12.2019 | 
Հասարակություն
«ՈՍՏԻԿԱՆՈՒԹՅՈՒՆԸ ՊԱՐՏԱՎՈՐ Է ՀԱՆԴԵՍ ԳԱԼ ՀԱՅՏԱՐԱՐՈՒԹՅԱՄԲ, ՈՐՈՎ ԿԱՄ ԿՊԱՐԶԱԲԱՆԵՆ ԵՎ ԿՀԻՄՆԱՎՈՐԵՆ ԱՅԴ ԳՈՐԾՈՂՈՒԹՅՈՒՆԸ, ԿԱՄ ՆԵՐՈՂԱՄՏՈՒԹՅՈՒՆ ԿՀԱՅՑԵՆ ԴԱՎԻԹ ԱՓՈՅԱՆԻՑ». ԳԵՂԱՄ ԳԵՎՈՐԳՅԱՆ
«ՈՍՏԻԿԱՆՈՒԹՅՈՒՆԸ ՊԱՐՏԱՎՈՐ Է ՀԱՆԴԵՍ ԳԱԼ ՀԱՅՏԱՐԱՐՈՒԹՅԱՄԲ, ՈՐՈՎ ԿԱՄ ԿՊԱՐԶԱԲԱՆԵՆ ԵՎ ԿՀԻՄՆԱՎՈՐԵՆ ԱՅԴ ԳՈՐԾՈՂՈՒԹՅՈՒՆԸ, ԿԱՄ ՆԵՐՈՂԱՄՏՈՒԹՅՈՒՆ ԿՀԱՅՑԵՆ ԴԱՎԻԹ ԱՓՈՅԱՆԻՑ». ԳԵՂԱՄ ԳԵՎՈՐԳՅԱՆ
Դեկտեմբերի 20-ին ԵՊՀ-ի բակում տեղի ունեցած վիճաբանության և կրակոցների գործի շրջանակում երեկ ԵՊՀ կենտրոնական մասնաշենքից ձեռնաշղթաներով բերման է ենթարկվել Դավիթ Ափոյանը` հարցաքննվելու, և ինչպես ինքն է փաստել՝ առանց ծանուցագրի և որոշման: ԵՊՀ ռեկտորի ժամանակավոր պաշտոնակատար Գեղամ Գևորգյանն այսօր պատասխանել է «1in.am»-ի լրագրողի հարցերին, որի ընթացքում իր վրդովմունքն է հայտնել ՀՀ ոստիկանության գործողության նկատմամբ:

Գեղամ Գևորգյանը լրագրողի հետ զրույցում ներկայացրել է դեպքերի հաջորդականությունը և մանրամասնել, թե ԵՊՀ-ի բակում հնչած կրակոցներից հետո ինչ գործողություններ է իրականացրել ՀՀ ոստիկանությունը:

Անդրադառնալով երեկ ՈՒԽ նախագահի հետ տեղի ունեցած միջադեպին՝ նա փաստել է որ այդ ժամանակ  գտնվել է Վ. Բրյուսովի անվան պետական լեզվահասարակագիտական համալսարանում և մասնակցել միջոցառման:

 

«Ինձ զանգեց Դավիթ Ափոյանը և ասաց, որ քննիչները եկել և ցանկանում են իրեն բերման ենթարկել: Ասացի՝ հեռախոսը փոխանցիր քննիչներին, նա էլ տեղեկացրեց, որ վերջիններս հրաժարվում են վերցնել հեռախոսը: Զանգեցի անվտանգության ծառայության պետ Լևոն Առուստամյանին և ասացի, որ հեռախոսը փոխանցի քննիչներին: Նրանցից հետաքրքրվեցի, թե ինչ է պատահել: Ի պատասխան՝ նշեցին, որ ցանկանում են հարցաքննել ՈՒԽ նախագահին: Նրանց հիշեցրի, որ գտնվում են համալսարանում և գործ ունեն ուսանողի հետ: Հորդորեցի պահել պատշաճ և զգուշացրի, որ համալսարանում բռնի և անօրինական գործողություն չպետք է լինի: Նրանք էլ հավաստիացրին, որ ամեն ինչ կլինի օրենքի սահմաններում»,- ասել է Գեղամ Գևորգյանը:

 

Նրա փոխանցմամբ, որոշ ժամանակ անց նրան զանգել է Լևոն Առուստամյանը և ասել, որ Դավիթին բերման են ենթարկել. «Ես շտապ դուրս եկա: Սկզբում գնացի Քննչական կոմիտե՝ կարծելով, որ այնտեղ կլինի, բայց ինձ ասացին, որ բաժանմունք են տարել Դավիթին: Գնացի այնտեղ, որի մուտքի առջև լրագրողներ կային: Նրանց հարցերին չպատասխանեցի՝ արագ ներս մտնելով, որովհետև իմ խնդիրն արագ Դավիթին օգնություն ցույց տալն էր: Մտա այն պահին, երբ Դավիթին արդեն դուրս էին տանում: Գնացի բաժանմունքի պետի մոտ՝ հարցնելով, թե ինչ է պատահել: Ինձ ասացին, որ Դավիթը դիմադրություն է ցույց տվել: Ես էլ հերքելու կամ հաստատելու փաստերի այդ պահին չէի տիրապետում:

 

Հետաքրքրվեցի, թե ինչ է լինելու: Ասացին, որ Դավիթին կհարցաքննեն և բաց կթողնեն: Էլի խնդրեցի, որ որևէ անօրինական գործողություն չլինի: Դուրս եկա բաժանմունքից: Մուտքի մոտ կանգնած լրագրողները հետաքրքրվեցին, թե ինչ է եղել, ես էլ ասացի այն, ինչ քննիչներն էին ինձ հաղորդել, և փաստեցի, որ Դավիթին շուտով բաց կթողնեն»:

 

Գեղամ Գևորգյանի փաստմամբ, ՀՀ ոստիկանության այս պահվածքն անընդունելի է. «Այս իրավիճակում Ոստիկանությունը պարտավոր է հանդես գալ հայտարարությամբ, որով կամ կպարզաբանեն և կհիմնավորեն այդ գործողությունը, կամ ներողամտություն կհայցեն Դավիթ Ափոյանից: Լռել և սպասել, թե ում ուսերին կընկնի մեղքը, ՀՀ ոստիկանությանը հարիր պահվածք չէ»:

 

Պատրաստեց Քնար Միսակյանը

 


Հարցազրույցն ամբողջությամբ կարող եք դիտել ստորև.

 

 

Այլ նորություններ
ԻՍՊԱՆԱՑԻ ԳՐՈՂ, ԵՊՀ ՊԱՏՎԱՎՈՐ ԴՈԿՏՈՐ ԳՈՆՍԱԼՈ ԳՈՒԱՐՉԻ ԲԱՑ ՆԱՄԱԿՆ ԱՀ ՆԱԽԱԳԱՀ ԱՐԱՅԻԿ ՀԱՐՈՒԹՅՈՒՆՅԱՆԻՆ
Ղարաբաղի Հանրապետության նախագահ մեծարգո պարոն Արայիկ Հարությունյանին
ԵՊՀ-Ն ՇԱՐՈՒՆԱԿՈՒՄ Է ՄԱՍՆԱԿՑԵԼ ՀԱՄԱԶԳԱՅԻՆ ԴՐԱՄԱՀԱՎԱՔ-ԱՐՇԱՎԻՆ՝ ՓՈԽԱՆՑԵԼՈՎ ԱՎԵԼԻ ՔԱՆ 55 ՄԼՆ ԴՐԱՄ
ԵՊՀ-ն հատուկ բացված հաշվեհամարին փոխանցել է ևս 30 մլն դրամ, Իջևանի մասնաճյուղը՝ 5.5 մլն դրամ, իսկ աշխատակիցները՝ ավելի քան 20 մլն դրամ։