08.10.2019 | 
Հասարակություն
«ԼԱՎ ՍՈՎՈՐԵՔ, ՁԵՐ ՄԱՍՆԱԳԻՏՈՒԹՅԱՆԸ ԼԱՎԱԳՈՒՅՆՍ ՏԻՐԱՊԵՏԵՔ». ԳԵՂԱՐՔՈՒՆԻՔԻ ՄԱՐԶՊԵՏԸ՝ ԵՊՀ-ՈՒՄ
«ԼԱՎ ՍՈՎՈՐԵՔ, ՁԵՐ ՄԱՍՆԱԳԻՏՈՒԹՅԱՆԸ ԼԱՎԱԳՈՒՅՆՍ ՏԻՐԱՊԵՏԵՔ». ԳԵՂԱՐՔՈՒՆԻՔԻ ՄԱՐԶՊԵՏԸ՝ ԵՊՀ-ՈՒՄ
ԵՊՀ աշխարհագրության և երկրաբանության ֆակուլտետն այսօր հյուրընկալել էր Գեղարքունիքի մարզպետ Գնել Սանոսյանին:

Գնել Սանոսյանի հետ հանդիպմանը ներկա էին ֆակուլտետի պրոֆեսորադասախոսական կազմի ներկայացուցիչներ, շրջանավարտներ, ուսանողներ, ինչպես նաև Վարդենիսի քաղաքապետ Արամ Մելքոնյանն ու համայնքի այլ ներկայացուցիչներ:

 

Հանդիպման սկզբում Աշխարհագրության և երկրաբանության ֆակուլտետի դեկան Մարատ Գրիգորյանը տեղեկացրեց, որ Գնել Սանոսյանը, լինելով ֆակուլտետի շրջանավարտ,  ԵՊՀ-100 ամյակի կապակցությամբ ցանկություն է հայտնել հանդիպելու ֆակուլտետի ներկայացուցիչների հետ՝ քննարկելու տարաբնույթ հարցեր:

 

Մարատ Գրիգորյանն ասաց նաև, որ ֆակուլտետի շատ շրջանավարտներ այսօր տարբեր պաշտոններ են զբաղեցնում պետական կառավարման համակարգում. «Մենք միշտ հպարտանում ենք մեր սաներով: Այսինքն՝ մեր ֆակուլտետը, ԵՊՀ-ն ընդհանուր առմամբ ոչ միայն գիտելիք է տալիս, այլև կառավարման փորձի հմտություններ է փոխանցում»:

 

ԵՊՀ ֆիզիկական աշխարհագրության և ջրաօդերևութաբանության ամբիոնի վարիչ Արսեն Գրիգորյանն էլ փաստեց, որ ֆակուլտետն անում է հնարավորը՝ լավ շրջանավարտներ ունենալու, որոնք իրենց ներդրումը կունենան պետության զարգացման և հասարակության բարեկեցության ապահովման գործում:

 

 

Գնել Սանոսյանը հանդիպման ժամանակ ասաց, որ Աշխարհագրության և երկրաբանության ֆակուլտետի շրջանավարտները Հայաստանի տնտեսության տարբեր ոլորտներում, քաղաքական-հասարակական կյանքի բոլոր բնագավառներում մեծ ներդրում ունեն և լայն կազմով ընդգրկված են պետականաշինության գործում. «Մասնագիտությունս այսօր ինձ շատ է օգնում մարզպետի գործառույթներն իրականացնելու համար, քանի որ այստեղ ծանոթացել եմ բոլոր բնագավառներին և գիտելիք ստացել դրանց վերաբերյալ»:

 

Գեղարքունիքի մարզպետը հանդիպման մասնակիցներին պատմեց պետական կառավարման առանձնահատկությունների մասին՝ փաստելով, որ մարզպետի գործը նման է վարչապետի գործին: Նա նշեց, որ չնայած տեղեկատվական դաշտում այսօր առկա հակասական նորություններին՝ երկրի վիճակը շատ լավ է և կայուն:

 

«Բարեկամաբար հավաստիացնում եմ, որ իրականում այն գործընթացները, որոնք տեղի են ունենում այսօր, ավելի լավ և լուսավոր են դարձնելու մեր երկիրը: Ցավոք, սուտը, կեղծիքը մեր լրատվական դաշտում այնքան շատ են, որ հասել ենք մի մակարդակի, երբ կարող են ինձ քննադատել ձախլիկ լինելու համար»,- ասաց Գնել Սանոսյանը և հավաստիացրեց, որ չնայած իշխանության ներկայացուցիչները երբեմն թերանում են, սխալներ թույլ տալիս, բայց և ընդունում են դրանք և փորձում արագ շտկել:

 

Գնել Սանոսյանը պատմեց մարզում հեղափոխությունից հետո տեղի ունեցած բարեփոխումների մասին՝ մանրամասն ներկայացնելով մինչ այժմ կատարված շինարարական և հանրության բարեկեցիկ կյանքին ուղղված այլ աշխատանքները:

 

Գեղարքունիքի մարզպետը, կարևորելով կրթությունը, հավաստիացրեց, որ այսօր պետք է լավ սովորել, քանի որ նոր Հայաստանում ամբողջ հույսը գիտելիքի վրա է. «Լավ սովորեք, ձեր մասնագիտությանը լավագույնս տիրապետեք: Նոր պայմաններում իրենց արդարացի տեղն են գտնելու բարձրորակ մասնագետները»:

 

Գնել Սանոսյանը հանդիպման ընթացքում անդրադարձավ նաև Գեղարքունիքի մարզի՝ որպես սահմանամերձ տարածքի դերին ու նշանակությանը՝ պատմելով, թե ինչ աշխատանքներ են իրականացվում ռազմավարական տեսանկյունից:

 

Հանդիպման հյուրը խոսեց Սևանա լճի խնդիրների մասին՝ ասելով, որ դրա հետ կապված հիմնախնդիրները շատ են, որոնց լուծման համար ևս մեծ ծավալի աշխատանքներ են իրականացվում: Նրա հավաստմամբ, մարզպետարանն այսօր համագործակցում է «Սևան» ազգային պարկի հետ՝ խնդիրներն առավել արդյունավետ լուծելու համար:

 

Գնել Սանոսյանի փոխանցմամբ, Սևանա լճի ամենամեծ խնդիրը դրա տակ անցած անտառն է և շինությունները. «Մոտ 780 հեկտար անտառ է անցել ջրի տակ, որի օրգանական նյութը քայքայվում և պարարտ սնունդ է դառնում ջրիմուռների համար: Գյուղատնտեսության և անասնապահության հետևանքով էլ աղտոտվում է ջուրը, և կան այլ խնդիրներ ևս»:

 

Նա տեղեկացրեց, որ անտառային այլ տարածքներ կարող են անցնել ջրի տակ, ինչի համար պետք է առաջիկայում մաքրել դրանք. «Երեք տարում 770 հեկտար պետք է մաքրել: Մենք մշակել ենք ծրագիր. բնակիչներին հնարավորություն ենք տալու կտրելու ծառերը և փայտն օգտագործելու որպես վառելիք: Այդպես և՛ բնակչությանը ձեռնտու կլինի, և՛ պետությանը: Վերջինս միջոցներ չի ծախսի տարածքները մաքրելու համար»:

 

Հանդիպման վերջում Գնել Սանոսյանը պատասխանեց ներկաների հարցերին:

 

Քնար Միսակյան

 

Այլ նորություններ
ԵՊՀ ՍՈՑԻՈԼՈԳԻԱՅԻ ՖԱԿՈՒԼՏԵՏԸ 15 ՏԱՐԵԿԱՆ Է
ԵՊՀ մեծ դահլիճում այսօր տեղի է ունեցել ԵՊՀ սոցիոլոգիայի ֆակուլտետի 15-ամյակին նվիրված հանդիսավոր նիստ:
«ՀԱՅԱՍՏԱՆՆ ԻՐ ՕՐԻՆԱԿՈՎ ՑՈՒՅՑ Է ՏԱԼԻՍ, ՈՐ ԱՐԴՅՈՒՆԱՎԵՏ ԱՇԽԱՏԵԼՈՒ ԴԵՊՔՈՒՄ ԿԱՐԵԼԻ Է ՕԳՏՎԵԼ Ե՛Վ ԵՄ-Ի, Ե՛Վ ԵԱՏՄ-Ի ՀՆԱՐԱՎՈՐՈՒԹՅՈՒՆՆԵՐԻՑ». ԱՇՈՏ ԱԼԵՔՍԱՆՅԱՆ
ԵՊՀ քաղաքական գիտության պատմության և տեսության ամբիոնի դոցենտ, քաղ. գիտ. դոկտոր Աշոտ Ալեքսանյանը հոկտեմբերի 15-17-ը մասնակցել է Բելգորոդ քաղաքում տեղի ունեցած «ԵԱՏՄ անդամ երկրների միջսահմանային և միջտարածաշրջանային փոխազդեցությունը» խորագրով միջազգային ֆորսայթ-նստաշրջանին: Պարոն Ալեքսանյանի հետ զրուցել ենք դրա օրակարգի և արդյունքների, ինչպես նաև Հայաստանի՝ ԵԱՏՄ-ին ինտեգրվելու հեռանկարների մասին: