14.01.2022 | 
Հասարակություն
ԵՊՀ ԴՈՑԵՆՏ ՀՈՎԻԿ ՓԱՆՈՍՅԱՆԸ՝ 14 ԳԼԽԻՑ ԲԱՂԿԱՑԱԾ ՇՊՐԻՆԳԵՐՅԱՆ ԳՐՔԻ ԽՄԲԱԳԻՐ
ԵՊՀ ԴՈՑԵՆՏ ՀՈՎԻԿ ՓԱՆՈՍՅԱՆԸ՝ 14 ԳԼԽԻՑ ԲԱՂԿԱՑԱԾ ՇՊՐԻՆԳԵՐՅԱՆ ԳՐՔԻ ԽՄԲԱԳԻՐ
Գիտական հանրույթին քաջածանոթ «Springer» հրատարակչական տունն արդեն երկրորդ անգամ լույս է ընծայել ԵՊՀ կենսաբանության ֆակուլտետի կենսաքիմիայի, մանրէաբանության և կենսատեխնոլոգիայի ամբիոնի դոցենտ, կենսաբ. գիտ. թեկնածու Հովիկ Փանոսյանի և նրա օտարերկրյա գործընկերների համատեղ խմբագրությամբ կազմված «Մանրէային համակեցություններ և դրանց փոխազդեցություններն էքստրեմալ էկոհամակարգերում» 14 գլխից բաղկացած ստվարածավալ գիրքը:

«Մանրէային համակեցություններ և դրանց փոխազդեցություններն էքստրեմալ էկոհամակարգերում»գրքում զետեղված են կենսաբանության բնագավառում միջազգային հեղինակություն ունեցող գիտնականների՝ տասնամյակների ընթացքում հետազոտած փորձարարական ու տեսական աշխատանքները:

 

Գրքում արծարծվում են եվրասիական էկոհամակարգերի էքստրեմոֆիլ մանրէների մի շարք ասպեկտներին առնչվող խնդիրներ, ինչպես նաև տեղ են գտել կենսատեխնոլոգիաներում այդ մանրէների կիրառման հեռանկարներին վերաբերող աշխատանքներ:

 

Մեզ հետ զրույցում Հ. Փանոսյանն ասաց, որ նախկինում առիթ եղել է ներկայացնելու էքստրեմոֆիլ մանրէների նկատմամբ աճող հետաքրքրությունը՝ պայմանավորված վերջիններիս գիտագործնական նշանակությամբ: Նրա խոսքով, այսօր էլ էքստրեմոֆիլ մանրէները գիտնականների ուշադրության կիզակետում են, ըստ այդմ՝ դրանց առանձնահատկությունները լուսաբանելու և գիտության արդի նվաճումները նոր լույսի ներքո ներկայացնելու անհրաժեշտությունն արդիական է ու կարևոր:

 

 

«Առկա պահանջը բավարարելու նպատակադրվածությամբ էլ ես և իմ գործընկերները լծվեցինք այդ հետաքրքիր նախաձեռնությունն իրականացնելու բարդ ու պատասխանատու գործին, և այսօր արդեն գիտական հանրույթի դատին է ներկայացված նոր լույս ընծայված գիրքը»,- նշեց ԵՊՀ դոցենտը:

 

Ի դեպ, գրքի 3 գլուխները հեղինակել են ԵՊՀ աշխատակիցները: Այդ գլուխներից մեկում ներկայացված են «Thermus» ցեղի թերմոֆիլ մանրէների բազմազանությունը և դրանց կիրառական հեռանկարները, մյուսում՝ մետալաֆիլ մանրէների կենսաբանությունն ու ծանր մետաղների նկատմամբ հարմարվողականության մեխանիզմները:

 

Երրորդ գլուխը ԵՊՀ մասնագետները հեղինակել են տաջիկ և նորվեգացի գործընկերների հետ՝ ներկայացնելով Տաջիկստանի բարձրադիր երկրաջերմային աղբյուրների մանրէային կենսաբազմազանությունը: Ի դեպ, Հ. Փանոսյանն ասաց,  որ այդ աշխատանքներն իրականացվել են գրքի խմբագիրների համաղեկավարությամբ արդեն տասնամյա պատմություն ունեցող «Մետաքսի ճանապարհ» դրամաշնորհային ծրագրի շրջանակում:

 

«Մանրէային համակեցություններ և դրանց փոխազդեցություններն էքստրեմալ էկոհամակարգերում» գիրքը կարող է օգտակար լինել ընդհանուր և էկոլոգիական մանրէաբանություն, մանրէների  կենսատեխնոլոգիա մասնագիտություններով մասնագիտացող ուսանողների, մագիստրանտների, ասպիրանտների, ինչպես նաև երիտասարդ հետազոտողների և գիտաշխատողների համար:

 

 

Քնար Միսակյան

 

Այլ նորություններ
ԵՊՀ ՊԱՏՎԻՐԱԿՈՒԹՅՈՒՆՆ ԱՅՑԵԼԵՑ ԱՄԷ ԴԵՍՊԱՆՈՒԹՅՈՒՆ
ԵՊՀ զարգացման ու նորարությունների գծով պրոռեկտոր Միքայել Հովհաննիսյանը, արաբագիտության ամբիոնի վարիչ Հայկ Քոչարյանը, նույն ամբիոնի դասախոս Վահե Հակոբյանը պատվիրակվել էին Երևանում ԱՄԷ դեսպանություն` իրենց ցավակցությունը հայտնելու լուսահոգի շեյխ Խալիֆա իբն Զայեդ ալ-Նահյանի մահվան կապակցությամբ։
ԵՊՀ-ՈՒՄ ՆՇՎԵՑ ԲՈՒՀԻ ՀԻՄՆԱԴՐՄԱՆ 103-ԱՄՅԱԿԸ
Այսօր ԵՊՀ գիտական խորհրդի նիստերի դահլիճում տեղի ունեցավ միջոցառում՝ նվիրված Մայր բուհի հիմնադրման 103-ամյակին: Տոնի առթիվ դրամական պարգևներով և պատվոգրերով պարգևատրվեցին համալսարանի վարչական աշխատակիցներ, դասախոսներ, ուսանողներ, ինչպես նաև «ԵՊՀ օլիմպիադա-2022»-ի առաջին կարգի մրցանակակիրները: