24.01.2007 | 
Հասարակություն
ՍՊԱՆԵՑԻՆ, ՈՐՈՎՀԵՏԵՎ ՀԱՅ Է
ՍՊԱՆԵՑԻՆ, ՈՐՈՎՀԵՏԵՎ ՀԱՅ Է
Երեւանի պետական համալսարանի ուսանողները դատապարտում են Թուրքիայի հայ լրագրող Հրանտ Դինքի սպանությունը:

Երեւանի քաղաքապետարանը, Հայաստանի գրողների միությունը, մի շարք հասարակական կազմակերպություններ բոլոր բուհերի ուսանողների մասնակցությամբ հունվարի 24-ին հանրահավաք էին կազմակերպել Երեւանի Շահումյանի անվան հրապարակում: Դրանից հետո սգո երթը շարժվեց դեպի կորստի ու միասնության խորհրդանիշ դարձած Ծիծեռնակաբերդ:

Մայր բուհի առջեւ հավաքված 100-ավոր ուսանողները, չնայած քննական շրջանին, եկել էին մասնակցելու Հրանտ Դինքի հիշատակի խնկարկմանը: «Սա առաջին հերթին թուրքահայ մտավորականի հիշատակի հարգման արարողություն է: Համալսարանը` որպես պետական հաստատություն, իր վրդովմունքն ու բողոքի ձայնն է բարձրացնում այս կարգի երեւույթների դեմ»,- ասաց ԵՊՀ պրոռեկտոր Արսեն Քարամյանը:

Ըստ ԵՊՀ ուսանողական խորհրդի նախագահ Համլետ Մանուկյանի` կարեւոր չէ, թե որ բուհից քանի ուսանող ներկա կլինի հանրահավաքին: «Կարեւորը բոլորիս միասնականությունն է»:

ԵՊՀ ժուռնալիստիկայի ֆակուլտետի դեկան, պրոֆեսոր Գառնիկ Անանյանն ասաց. «Մեր միլիոնավոր զոհերի հիշատակը բոլորիս պարտադրում է այսօր մեկ անգամ եւս բողոքի ձայն բարձրացնել, որ Եղեռնի շարունակությունը դադարի: Կճանաչեն, չեն ճանաչի, գլուխները քարը. բայց եղեռնն այդ երկրում չպետք է շարունակվի»:

«Ցավալին այն է, որ բոլորս տեղյակ էինք Հրանտ Դինքի հասցեով եկող սպառնալիքների փաստին, իսկ գուցե պետք է ավելի շո՞ւտ պայքարեինք, որ հայ լրագրողի կյանքը նման ողբերգական ավարտ չունենար»,- կարծում է ԵՊՀ ռուս բանասիրության ֆակուլտետի ուսանողուհի Զարուհի Սարիբեկյանը:

Իրավագիտության ֆակուլտետի ուսխորհրդի նախագահ Տարոն Սիմոնյանը Դինքի սպանությունը երկու կողմից է դիտարկում: «Նախ` սա ոտնձգություն է ազատ արտահայտվելու իրավունքի դեմ (վերջինս պաշտպանվում է մոտ 20 միջազգային կոնվենցիաներով), եւ երկրորդ` ամեն մի նման հանցագործության ետեւում կանգնած են քաղաքական ուժեր»:

Գառնիկ Անանյանը կարեւորում է միջազգային հանրության դերը. «Մենք մեր ուժերով չենք կարող կասեցնել արյունոտ ձեռքերի հանցագործությունը: Իսկապես ժողովրդավարական երկրները պետք է իրենց ձայնը բարձրացնեն այս երեւույթի դեմ, այլապես պիտի կոչվեն «մեծ փարիսեցիներ»: Ամոթ աշխարհին, եթե նման բաները կհանդուրժի»:

Այլ նորություններ
«ԱՐՑԱԽՅԱՆ ՀԱԿԱՄԱՐՏՈՒԹՅԱՆ ԸՆԿԱԼՄԱՆ ՀԻՄՆԱԽՆԴԻՐՆԵՐԻ ՇՈՒՐՋ» ԽՈՐԱԳՐՈՎ ՔՆՆԱՐԿՈՒՄ ԵՊՀ-Ի ԵՎ ՈՒՐՈՒԳՎԱՅԻ ՀԱՆՐԱՊԵՏՈՒԹՅԱՆ ՀԱՄԱԼՍԱՐԱՆԻ ՄԻՋԵՎ
Երևանի պետական և Ուրուգվայի Հանրապետության համալսարանների միջև այսօր տեղի է ունեցել «Արցախյան հակամարտության ընկալման հիմնախնդիրների շուրջ» խորագրով քննարկում:
«ՑԵՂԱՍՊԱՆՈՒԹՅՈՒՆԸ ԺԱՄԱՆԱԿԱԿԻՑ ԱՇԽԱՐՀՈՒՄ. ՈՒՍՈՒՄՆԱՍԻՐՄԱՆ ՀԵՌԱՆԿԱՐՆԵՐԸ ԵՎ ՄԱՐՏԱՀՐԱՎԵՐՆԵՐԸ». ՏԵՂԻ Է ՈՒՆԵՑԵԼ ԵՌՕՐՅԱ ՄԻՋԱԶԳԱՅԻՆ ԳԻՏԱԺՈՂՈՎ
ԵՊՀ ՀՀԻ ցեղասպանության և այլ զանգվածային ոճրագործություների կանխարգելման և կրթության ՅՈՒՆԵՍԿՕ-ի ամբիոնի նախաձեռնությամբ և ԿԳՄՍ նախարարության գիտական կոմիտեի աջակցությամբ նոյեմբերի 5-7-ը տեղի է ունեցել «Ցեղասպանությունը ժամանակակից աշխարհում. Ուսումնասիրման հեռանկարները և մարտահրավերները» եռօրյա միջազգային առցանց գիտաժողով: