06.08.2019 | 
Կրթություն
ԵՊՀ ԹԻՄԸ ՈՍԿԵ ԵՎ ԱՐԾԱԹԵ ՄԵԴԱԼՆԵՐ Է ՆՎԱՃԵԼ ՄԱԹԵՄԱՏԻԿԱԿԱՆ ՄԻՋԱԶԳԱՅԻՆ ՈՒՍԱՆՈՂԱԿԱՆ ՕԼԻՄՊԻԱԴԱՅՈՒՄ
ԵՊՀ ԹԻՄԸ ՈՍԿԵ ԵՎ ԱՐԾԱԹԵ ՄԵԴԱԼՆԵՐ Է ՆՎԱՃԵԼ ՄԱԹԵՄԱՏԻԿԱԿԱՆ ՄԻՋԱԶԳԱՅԻՆ ՈՒՍԱՆՈՂԱԿԱՆ ՕԼԻՄՊԻԱԴԱՅՈՒՄ
Ավարտվել է Բուլղարիայի Բլագոևգրադ քաղաքում անցկացվող 26-րդ մաթեմատիկական միջազգային ուսանողական օլիմպիադան։ Օլիմպիադային Հայաստանը ներկայացրել է Երևանի պետական համալսարանի թիմը՝ նվաճելով 3 ոսկե և 3 արծաթե մեդալներ։

Օլիմպիադան տեղի է ունեցել հուլիսի 28-ից օգոստոսի 3-ը, որին մասնակցել են աշխարհի 77 համալսարանի թիմեր (360 մասնակից)։

ԵՊՀ մաթեմատիկայի և մեխանիկայի ու ինֆորմատիկայի և կիրառական մաթեմատիկայի ֆակուլտետների ուսանողներից բաղկացած թիմի մասնակիցներից երեքը՝ Ալբերտ Գևորգյանը, Արսեն Համբարձումյանը և Գրիգոր Քերոբյանը, արժանացել են ոսկե, իսկ Վահագն Ալթունյանը, Սևակ Աբրահամյանը և Արման Բայրամյանը՝ արծաթե մեդալների: Օլիմպիադան անցկացվել է և՛ անհատական, և՛ թիմային հաշվարկներով: Ալբերտ Գևորգյանն անհատական հաշվարկում կիսել է 19-21-րդ տեղերը: Թիմային առաջնությունում Երևանի պետական համալսարանի թիմը գրավել է 13-րդ տեղը՝ առաջ անցնելով մի շարք հեղինակավոր համալսարաններից:



Ուսանողական միջազգային օլիմպիադայի ԵՊՀ-ի թիմը ղեկավարել է ԵՊՀ և ՀԱՀ դասախոս Կարեն Քեռյանը, որն օլիմպիադայում թիմի ղեկավարներից արդյունավետությամբ 2-րդն էր: ԵՊՀ թիմը մարզել են Վազգեն Միքայելյանն ուԿարեն Քեռյանը:

Ysu.am-ի հետ զրույցում ոսկե մեդալակիր Ալբերտ Գևորգյանն ասաց, որ մրցապայքարը բարդ էր, քանի որ օլիմպիադային մասնակցում էին Եվրոպայի, Ռուսաստանի, Չինաստանի, Լատինական Ամերիկայի առաջատար համալսարանների լավագույն ուսանողները։ Օլիմպիադայի ժյուրին, հաշվի առնելով այդ ամենը, ընտրել էր բավականին բարդ խնդիրներ, որոնց լուծման համար տրամադրում էր ընդամենը 5 ժամ, իսկ այդ ժամանակահատվածը քիչ էր այդօրինակ բարդ մաթեմատիկական խնդիրներ լուծելու համար։

Այն հարցին, թե երբվանից են նրանք սկսել պատրաստվել օլիմպիադային մասնակցելու համար, Ալբերտ Գևորգյանը պատասխանեց․ «Պետք է նշեմ, որ Մաթեմատիկայի և մեխանիկայի ֆակուլտետի ուսանողն ամբողջ օրն էլ առնչվում է մաթեմատիկա գիտության հետ։ Այնուամենայնիվ, բուն օլիմպիադային սկսել ենք պատրաստվել հունիսի սկզբից՝ մասնակցելով պարոն Քեռյանի կողմից կազմակերպված օլիմպիական խմբակներին»։



Պատմելով իր տպավորությունների մասին՝ վերջինս նշեց, որ դրանք շատ տարբեր են։

«Նախ շատ հաճելի էր լինել իմ հասակակից լավագույն մաթեմատիկոսների միջավայրում։ ԵՊՀ-ի համար հոբելյանական տարում համալսարանը լավ ներկայացնելը մեծ պատիվ է։ Այնուամենայնիվ, եթե օլիմպիադայի ժամանակ թույլ չտայի որոշ, սպորտային լեզվով ասած՝ ոչ պարտադիր սխալներ, ապա արդյունքը կարող էր ավելի լավը լինել, ինչի պատճառով փոքր-ինչ հիասթափված եմ»,-ավելացրեց նա։

Այլ նորություններ
ՄԱՍՆԱԳԻՏԱԿԱՆ ԿՈՂՄՆՈՐՈՇՄԱՆ ՆՊԱՏԱԿՈՎ ԱՅՑԵՐԸ ԵՎ ԵՊՀ ՀՅՈՒՐԸՆԿԱԼՈՒԹՅՈՒՆՆԵՐԸ ՇԱՐՈՒՆԱԿՎՈՒՄ ԵՆ
Երևանի պետական համալսարանի աշխարհագրության և երկրաբանության ֆակուլտետն այսօր հյուրընկալել էր Երևանի թիվ 4 հիմնական դպրոցի աշակերտներին, իսկ Երևանի թիվ 190 դպրոցը՝ ԵՊՀ ռեգիոնալ երկրաբանության և օգտակար հանածոների հետախուզման ամբիոնի դոցենտներ Ռուբեն Մովսեսյանին և Հարություն Մովսիսյանին։
«ՄԱՐԴՈՒ ԻՐԱՎՈՒՆՔՆԵՐԻ ԱԶԳԱՅԻՆ ՀԱՍՏԱՏՈՒԹՅՈՒՆՆԵՐԻ ՀԶՈՐՈՒԹՅԱՆ ԱՍՏԻՃԱՆԸ ԽՈՍՈՒՄ Է ԱՅԴ ԵՐԿՐՈՒՄ ԺՈՂՈՎՐԴԱՎԱՐՈՒԹՅԱՆ ԵՎ ՕՐԵՆՔԻ ԳԵՐԱԿԱՅՈՒԹՅԱՆ ՄԱԿԱՐԴԱԿԻ ՄԱՍԻՆ»․ ԴԱՍԱԽՈՍՈՒԹՅՈՒՆ-ՔՆՆԱՐԿՈՒՄ ԵՊՀ-ՈՒՄ
Երևանի պետական համալսարանի գիտխորհրդի նիստերի դահլիճում այսօր տեղի է ունեցել «Մարդու իրավունքներ և սոցիալական աշխատանք» թեմայով դասախոսություն-քննարկում, որը կազմակերպել էր Սոցիոլոգիայի ֆակուլտետի սոցիալական աշխատանքի և սոցիալական տեխնոլոգիաների ամբիոնը՝ ի դեմս Լիանա Մկրտչյանի։