08.03.2018 | 
Հասարակություն
55 ՏԱՐԻ ՀԱՄԱԼՍԱՐԱՆՈՒՄ. «ԵՊՀ-Ն ԱՐԺԱՆԻ Է ՀԱՎԱՏԱՐԻՄ ԱՇԽԱՏԱԿԻՑՆԵՐԻ»
55 ՏԱՐԻ ՀԱՄԱԼՍԱՐԱՆՈՒՄ. «ԵՊՀ-Ն ԱՐԺԱՆԻ Է ՀԱՎԱՏԱՐԻՄ ԱՇԽԱՏԱԿԻՑՆԵՐԻ»
ԵՊՀ կադրերի բաժնի վարիչ Աշխեն Հովսեփյանը 17 տարեկանից աշխատում է համալսարանում: Լավագույն տարիները Մայր բուհում անցկացրած տիկին Աշխենն այս տարի մեկնում է վաստակած հանգստի:

- Տիկի՛ն Աշխեն, ե՞րբ եք առաջին անգամ ԵՊՀ եկել, քանի՞ տարի է, որ այստեղ եք:

 

- ԵՊՀ-ում աշխատանքի եմ անցել 1962 թ.-ի սեպտեմբերի 24-ից: Մեր բաժնում աշխատակից ունենք, ով ծնվել է հենց այդ նույն տարում՝ այդ նույն օրը: Սկզբում անցել եմ աշխատանքի, ապա 1963 թ.-ին ընդունվել ԵՊՀ հայ բանասիրության ֆակուլտետ՝ երեկոյան հերթով ու ավարտել 1969 թ.-ին: Առաջին աշխատանքս եղել է որպես մեքենագրուհի, հետո դարձել եմ տեսուչ, ավագ տեսուչ, այնուհետև՝  Կադրերի բաժնի վարիչի տեղակալ, իսկ 1994 թ.-ից մինչ այսօր էլ Կադրերի բաժնի վարիչ: Ստացվում է, որ 17 տարեկանից մինչ այսօր այստեղ եմ, 55 տարի: Առաջին օրվանից էլ շատ սիրեցի համալսարանը: Այստեղ հաճելի էր ամեն ինչ. թե՛ մթնոլորտն էր գրավում, թե՛ կոլեգաները, թե՛ շփումը լավ մարդկանց հետ:

 

- Ի՞նչ դժվարությունների եք հանդիպել Ձեր աշխատանքային գործունեության ընթացքում: Ո՞րն է եղել ամենադժվար ժամանակահատվածը:

 

- Պատկերացրեք, որ դժվարություններ որպես այդպիսիք չեն եղել: Միայն սկզբում, երբ նոր էի եկել: Այդ ժամանակ դեռ սկսնակ էի ու ոչ պրոֆեսիոնալ. 17 տարեկան և նման հաստատություն: Աստիճանաբար սկսեցի ինքնուս սովորել շատ բաներ ու հարմարվեցի գրասենյակային աշխատանքին: Քիչ-քիչ ընտելացա ու բարձրացա աստիճաններով: Դժվար ժամանակահատված չենք ունեցել: Պարզապես ամեն նորամուծության դեպքում, իսկ ԵՊՀ-ում դրանք շատ են լինում, պիտի աշխատես ինքդ քեզ վրա: Հատկապես մեր աշխատանքի դեպքում պիտի քաջատեղյակ լինես Աշխատանքային օրենսգրքին, զգույշ լինես, սխալներ թույլ չտաս, որովհետև մարդկանց ու նրանց ճակատագրերի հետ գործ ունես:

 

- Ի՞նչ հետաքրքիր դեպքեր ու պատմություններ կհիշեք՝ կապված համալսարանի հետ:

 

- Համալսարանում բոլոր դեպքերն ու դեմքերը հետաքրքիր են: Գործ ենք ունենում շատ լավ մասնագետների, դասախոսների ու գիտնականների հետ: Միշտ հպարտացել եմ, որ աշխատում եմ նման մարդկանց հետ, ամենակարևորը՝ քաղաքավարի ու կիրթ: Առանձին հետաքրքիր դեպքեր հիմա չեմ հիշում, բայց այն, որ մեր աշխատանքային առօրյան միշտ հետաքրքիր է եղել, դա հաստատ է:

 

- Ձեր աշխատանքային գործունեության ընթացքում ԵՊՀ-ում  փաստորեն 7 ռեկտոր է փոխվել:

 

- Այո՛, պարոն Սիմոնյանը 7-րդ ռեկտորն է, ում հետ աշխատում եմ: Բոլորը շատ լավ են ղեկավարել համալսարանը: Դա է փաստում բուհի այսօրվա զարգացվածության բարձր մակարդակը: Համալսարանը միշտ քայլել է ժամանակին համընթաց, տեղին ու ժամանակին լուծել սերնդափոխության հարցը ու բաց եղել նորամուծությունների համար:

 

 

- Տիկի՛ն Աշխեն, կպատմե՞ք  Ձեր ընտանիքի մասին:

 

- Ամուսնացել եմ 1970 թ.-ին: Ունեմ երկու երեխա: Տղաս և աղջիկս նույնպես սովորել են համալսարանում: Երկուսն էլ ընտանիք են կազմել և ինձ 3 թոռնիկ պարգևել:

 

- Ինչպե՞ս եք համատեղել ընտանիքն ու կարիերան:

 

- Մեծ դժվարությամբ: Այն ժամանակ ֆիզիոլոգիական արձակուրդը մեկ տարի էր միայն: Այսինքն՝ երբ լրանում էր երեխայի մեկ տարեկանը, պիտի վերադառնայիր աշխատանքի: Շատ մեծ դժվարություններ եմ կրել: Ցավոք, սկեսուրս շուտ է մահացել ու ինձ օգնողներ չեն եղել: Ամեն ինչ արել եմ, որ ոչ մի կողմը չտուժի՝ ո՛չ ընտանիքս, ո՛չ էլ այս բարդ ու պատասխանատու աշխատանքը:

 

- Այս տարի արդեն անցնում եք վաստակած հանգստի, ի՞նչ զգացողություններ ունեք:

 

- Ամենալավ տարիներս անցկացրել եմ համալսարանում և ուրախ ու հպարտ եմ, որ դրանք բովանդակալից և հիշարժան են անցել: ԵՊՀ-ին շատ բաների համար եմ պարտական: Այո՛, գնում եմ հանգստի, իմ ուժերով վաստակած հանգստի: Իհարկե, չեմ պատկերացնում կյանքն առանց համալսարանի, բայց հանգստի կարիք իսկապես ունեմ: Շատ գոհ և շնորհակալ եմ բոլորին: ԵՊՀ-ն այն օրրանն է, որ յուրաքանչյուր ոք կերազեր այստեղ աշխատելու մասին:

 

 - Ի՞նչ խորհուրդ կտաք նրանց, ովքեր դեռ նոր են գալու այստեղ աշխատանքի:

 

- Նվիրումով ու ջանասիրությամբ մոտեցե՛ք գործին, ներդրե՛ք ձեր ուժն ու կորովը, որ ամեն ինչ լավ ստացվի, բացթողումներ չլինեն: ԵՊՀ-ն արժանի է հավատարիմ աշխատակիցների:

 

Քնար Միսակյան

 

Այլ նորություններ
«ՍՈՑՔԵՄՓ» ՍՈՑԻԱԼԱԿԱՆ ՉԿՈՖԵՐԱՆՍՆ ԱՅՍ ՏԱՐԻ ՀԱՏՈՒԿ ՀՅՈՒՐԵՐԻ ԿԱԶՄՈՒՄ ԱՆԱԿՆԿԱԼՆԵՐ Է ԽՈՍՏԱՆՈՒՄ
ԵՊՀ սոցիոլոգիայի ֆակուլտետի ՈՒԳԸ-ն արդեն 4-րդ տարին է, ինչ նախաձեռնում է «ՍոցՔեմփ» սոցիալական ոչ ֆորմալ կոնֆերանսը կամ, ինչպես կազմակերպիչներն են ասում, չկոնֆերանսը: Այն մասնագիտական հարթակ է բոլոր նրանց համար, ովքեր ունեն վերլուծական ասելիք՝ կապված հասարակական տարբեր խնդիրների ու դրանց լուծման ուղիների հետ: Հունիսի 30-ին տեղի ունենալիք միջոցառման մասին զրուցել ենք Սոցիոլոգիայի ֆակուլտետի ՈՒԳԸ անդամ Տաթևիկ Կարապետյանի հետ:
«ԺՈՂՈՎՐԴԱՎԱՐՈՒԹՅՈՒՆԸ ԿԵՆՍՈՒՆԱԿ ԼԻՆԵԼ ՉԻ ԿԱՐՈՂ ԱՌԱՆՑ ՔԱՂԱՔԱԿԱՆ ԲԱՆԱՎԵՃԻ».ԳԵՐՄԱՆԱՑԻ ՄԱՍՆԱԳԵՏ
ԵՊՀ լրագրող Անի Պողոսյանը Գերմանիայի Բունդեսթագում մասնակցել է IPS (Միջազգային խորհրդարանական կրթաթոշակ) ծրագրի կրթաթոշակակիրների համար կազմակերպված հանդիպմանը: