27.10.2010 | 
Մշակույթ
ԵՊՀ-Ն ՋԱՎԱԽՔՈՒՄ ԷՐ
ԵՊՀ-Ն ՋԱՎԱԽՔՈՒՄ ԷՐ
ԵՊՀ մշակույթի կենտրոնը համերգային ծրագրով հոկտեմբերի 24-ից 26-ը շրջեց Ջավախքի մի շարք բնակավայրերում:

Եռօրյա համերգային շրջագայությունն իրականացվում էր ՀՀ սպորտի եւ երիտասարդության հարցերի նախարարության «Ոսկե աշուն. բերքի ու բարիքի տոն» ծրագրի շրջանակներում: Մշակույթի կենտրոնի սաների առաջին կանգառը, «իրենց կամքից անկախ», դարձավ Ախալքալաքի շրջանի Խանդո գյուղը: Քանի որ ծրագրով նախատեսված էր ոչ միայն համերգային շրջագայություն, այլեւ այցելություններ մի շարք տեսարժան եւ պատմական վայրեր, համալսարանականներն ուղեւորվեցին Խանդո, որը հայաբնակ ամենամեծ գյուղերից մեկն է: Սակայն տեղացիների «պահանջով» քիչ անց սովորական այցը վերածվեց բացօթյա համերգի, որին չխանգարեցին անգամ հոսանքի տատանումներն ու իսկական ջավախքյան ցուրտը: Հաջորդ օրը համալսարանի ուսանողների ունկնդիրներն էին Ախալքալաքի բնակիչները:

 

Տեղի Սուրբ Խաչ հայկական եկեղեցու բակում տեղակայված բեմից հնչում էին հայկական, արտասահմանյան երգ ու երաժշտություն, ցուցադրվում էին տղաների խրոխտ ու աղջիկների հեզաճկուն պարերը: Մոտ 2,5 ժամ տեւած համերգը դիտելու էր եկել գրեթե ամբողջ քաղաքը: Տիկին Համասփյուռը եկեղեցու մոտ էր դեռեւս համերգից մեկ ժամ առաջ: «Դեռ երեկվանից էի սպասում այս համերգին, երբ իմացա, որ գալու են: Շատ սիրուն է համերգը, համ էլ շատ գեղեցիկ երգեր են կատարում»,- ասում է նա: Իսկ երրորդ օրը ուսանողները հրաժեշտ տվեցին Ախալքալաքին` շարժվելով դեպի Նինոծմինդայի շրջան` Գանձա գյուղ: Հայոց մեծ բանաստեղծ Վահան Տերյանի ծննդավայրում նրանք նույնպես ջերմ ընդունելության արժանացան: Մինչ համերգը համալսարանականները շրջեցին բանաստեղծի տուն-թանգարանում, նրա կյանքի ու գործունեության վերաբերյալ լսեցին նոր մանրամասներ: Իսկ քիչ անց գյուղի Սուրբ Կարապետ եկեղեցու բակն էլ վերածվեց «համերգասրահի»: Գանձացիներն այդ օրն իրենց առօրյայի մեկ ժամը նվիրեցին համալսարանի ուսանողներին: Դարձյալ երգ, պար ու երգիչներին ձայնակցող ջավախքցիներ:

 

«Այս օրերին մարդկանց ընդունելությունն ու վերաբերմունքը ցույց տվեցին, որ մենք իզուր չենք աշխատում: Պետք էր տեսնել, թե ինչպես էին նրանք մեզ սպասում եւ ինչպես էին տխրում, երբ հայտարարվում էր, որ համերգն ավարտվում է: Նրանց հայացքները մեզ պարտավորեցնում են»,- նշում է Մշակույթի կենտրոնի տնօրեն Կարինե Դավթյանը: Այցի երեք օրերի ընթացքում ուսանողներն այցելեցին նաեւ Վարձիա (Վարձունիք) ժայռափոր քաղաք, իսկ տուն վերադառնալու ճանապարհին վայելեցին նաեւ Ջավախքի «թագուհու»` Փարվանա լճի գեղեցկությունը:

Այլ նորություններ
«ԱՍՏՂԱԶԱՐԴ ԵՐԿԻՆՔՆ ԻՄ ԳԼԽԱՎԵՐԵՎՈՒՄ» ԽՈՐԱԳԻՐԸ ԿՐՈՂ ՀԱՄԵՐԳ՝ ՆՎԻՐՎԱԾ ԼՅՈՒԴՎԻԳ ՎԱՆ ԲԵԹՀՈՎԵՆԻ 250-ԱՄՅԱԿԻՆ
ԵՊՀ մշակույթի կենտրոնում այսօր տեղի ունեցավ Երևանի Կոմիտասի անվան պետական կոնսերվատորիայի Օպերային ստուդիայի՝ «Աստղազարդ երկինքն իմ գլխավերևում» խորագիրը կրող համերգը՝ նվիրված գերմանացի հայտնի կոմպոզիտոր, դաշնակահար, դիրիժոր Լյուդվիգ վան Բեթհովենի 250-ամյակին:
«ՀԻՍՈՒՍ ՔՐԻՍՏՈՍԻ ԿԵՐՊԱՐԸ XX ԴԱՐԻ ԵՎ ԱՐԴԻ ՀԱՅ ԱՐՎԵՍՏՈՒՄ» ԳԻՐՔԸ ՀՈԳԵՎՈՐ ԱՐԺԵՔՆԵՐԻՆ ՄՈՏԵՆԱԼՈՒ ՆՈՐ ՈՒՂԵՆԻՇ
ՀՀ նկարիչների միության մեծ սրահում այսօր տեղի են ունեցել ԵՊՀ հայ արվեստի պատմության և տեսության ամբիոնի դոցենտ, արվեստագիտության թեկնածու Սաթենիկ Վարդանյանի «Հիսուս Քրիստոսի կերպարը XX դարի և արդի հայ արվեստում» գրքի շնորհանդեսը, ինչպես նաև հայ արդի նկարիչների թեմատիկ ստեղծագործությունների ցուցահանդեսը: