01.02.2019 | 
Գիտություն
ԳԻՏԱԿԱՆ ԾՐԱԳԻՐ. ԵՊՀ-ՈՒՄ ԿՍՏԵՂԾՎԵՆ ՆՈՐ ՍԵՐՆԴԻ ԿԻՍԱՀԱՂՈՐԴՉԱՅԻՆ ՍԱՐՔԵՐ
ԳԻՏԱԿԱՆ ԾՐԱԳԻՐ. ԵՊՀ-ՈՒՄ ԿՍՏԵՂԾՎԵՆ ՆՈՐ ՍԵՐՆԴԻ ԿԻՍԱՀԱՂՈՐԴՉԱՅԻՆ ՍԱՐՔԵՐ
ԿԳՆ գիտության կոմիտեի կողմից ֆինանսավորման երաշխավորված թեմաներից է ԵՊՀ ռադիոֆիզիկայի ֆակուլտետի կիսահաղորդիչների ֆիզիկայի և միկրոէլեկտրոնիկայի ամբիոնի կողմից ներկայացրած «InAs-InSb-InP նյութական համակարգում կոնաձև և էլիպսարդաձև քվանտային կետերի և կղզյակների աճեցում և դրանց էլեկտրաֆիզիկական, մագնիսական ու օպտոէլեկտրոնային հատկությունների հետազոտում» գիտական ծրագիրը:

Ծրագրի ղեկավարն է կիսահաղորդիչների ֆիզիկայի և միկրոէլեկտրոնիկայի ամբիոնի վարիչի պաշտոնակատար Կարեն Ղամբարյանը: Գիտատեխնիկական հետազոտություններ իրականացնող խումբը բաղկացած է 4 անձից, որոնցից 2-ը երիտասարդ գիտնականներ են, իսկ մեկը՝ ամբիոնի ասպիրանտ: 

 

Պրոֆեսոր Կ. Ղամբարյանի հետ զրուցեցինք վերոնշյալ գիտական ծրագրի հեռանկարների, նպատակների ու արդյունավետության մասին:

 

Ըստ ղեկավարի՝ գիտական թեման վերաբերում է կիսահաղորդչային նանոտեխնոլոգիայի ոլորտին, որը շատ կարևոր և գերարդիական բնագավառ է ամբողջ աշխարհում. «Աշխարհի մի շարք երկրներում, օրինակ՝ Ճապոնիայում, Հոնկոնգում, Սինգապուրում, Հարավային Կորեայում, Չինաստանում, կիսահաղորդչային նանոտեխնոլոգիան համարվում է հիմնարար գիտություն: Հայաստանը բավականին լուրջ հիմքեր ունի այս ոլորտը զարգացնելու համար: Նանոկառուցվածքներն ունեն յուրահատուկ ֆիզիկական հատկություններ, իսկ կիսահաղորդչային նանոտեխնոլոգիաները՝ կիրառական մեծ նշանակություն»:

 

Պրոֆեսորի խոսքով, գիտական ծրագրի շրջանակում կիսահաղորդիչների ֆիզիկայի և միկրոէլեկտրոնիկայի ամբիոնում ու ԵՊՀ կիսահաղորդիչ սարքերի և նանոտեխնոլոգիաների գիտական կենտրոնում խումբը ստեղծելու է նանոկառուցվածքներ՝ մասնավորապես քվանտային կետեր, որից հետո իրականացվելու է այդ նանոկառուցվածքների ֆիզիկական հատկությունների հետազոտում: «Գիտական ծրագրի ավարտին կստեղծվի կիսահաղորդչային սարք՝ ենթակարմիր տիրույթի ֆոտոընդունիչ: Այն շատ կարևոր տիրույթ է զանազան կիրառական խնդիրներ լուծելու համար»,- հավելեց Կ. Ղամբարյանը:

 

Լիարժեք արդյունք ստանալու համար ծրագրի շրջանակում խումբը համագործակցելու է արտասահմանյան մի շարք հետազոտական ընկերությունների հետ:

 

Գիտական ծրագրի կատարման ընթացքում և ավարտից հետո ԵՊՀ ուսանողները և գիտաշխատողները հնարավորություն կունենան օգտագործելու այդ արդյունքներն ինչպես իրենց գիտական հետազոտություններում, այնպես էլ ավարտական աշխատանքներում և մագիստրոսական թեզերում: 

 

Նադեժդա Տեր-Աբրահամյան

Այլ նորություններ
ԵՊՀ ԴՈՑԵՆՏ ՀԱԿՈԲ ՀԱՐՈՒԹՅՈՒՆՅԱՆԻ ՀԵՐԹԱԿԱՆ ՀՈԴՎԱԾԸ «ՆՅՈՒԹԵՐ ՀԻՆ ԵՎ ՄԻՋՆԱԴԱՐՅԱՆ ՄԵՐՁՍԵՎԾՈՎՅԱՆ ՀՆԱԳԻՏՈՒԹՅԱՆ ԵՎ ՊԱՏՄՈՒԹՅԱՆ ՎԵՐԱԲԵՐՅԱԼ» ԳԻՏԱԿԱՆ ՀԱՆԴԵՍՈՒՄ
Երևանի պետական համալսարանի համաշխարհային պատմության ամբիոնի դոցենտ, պ.գ.դ. Հակոբ Հարությունյանն իր հերթական հոդվածն է հրատարակել «Նյութեր հին և միջնադարյան մերձսևծովյան հնագիտության և պատմության վերաբերյալ» հայտնի գիտական հանդեսի հերթական համարում:
«ԿԱՆԽԱՐԳԵԼԻՉ ՄԻՋՈՑԱՌՈՒՄՆԵՐԻ ԵՎ ԲՆԱՊԱՀՊԱՆԱԿԱՆ ԽՆԴԻՐՆԵՐԻ ԼՈՒԾՄԱՆ ՀԱՄԱՐ ԽՆԱՅԵԼ ՉԻ ԿԱՐԵԼԻ». ԱՐՄԵՆ ԹՌՉՈՒՆՅԱՆ
Ամբողջ աշխարհն այսօր պայքարում է նոր կորոնավիրուսի (COVID19) դեմ՝ իրականացնելով տարաբնույթ միջոցառումներ: Առողջապահության համաշխարհային կազմակերպության կողմից հայտարարված աշխարհավարակի պատճառ դարձած կորոնավիրուսով այսօր աշխարհում վարակված է ավելի քան 1 մլն մարդ: Հայաստանում նոր կորոնավիրուսային հիվանդության հաստատված ավելի քան 730 դեպք է գրանցվել: Երկրում հաստատված է արտակարգ դրություն: Ստեղծված իրավիճակի, իրականացվող միջոցառումների արդյունավետության և սպասվող քայլերի մասին զրուցել ենք ԵՊՀ կենսաքիմիայի, մանրէաբանության և կենսատեխնոլոգիայի ամբիոնի վարիչ, ՀՀ ԳԱԱ թղթակից անդամ, կենսաբ. գիտ. դոկտոր, պրոֆեսոր Արմեն Թռչունյանի հետ: