29.03.2019 | 
Կրթություն
19 ԴԱՍԱԽՈՍ ՄԱՍՆԱԿՑԵԼ Է ՎԵՐԱՊԱՏՐԱՍՏՄԱՆ ԴԱՍԸՆԹԱՑԻ ԵՎ ԾԱՆՈԹԱՑԵԼ ՈՒՍՈՒՑՄԱՆ ՆՈՐԱԳՈՒՅՆ ՄԵԹՈԴՆԵՐԻՑ ՄԵԿԻՆ
19 ԴԱՍԱԽՈՍ ՄԱՍՆԱԿՑԵԼ Է ՎԵՐԱՊԱՏՐԱՍՏՄԱՆ ԴԱՍԸՆԹԱՑԻ ԵՎ ԾԱՆՈԹԱՑԵԼ ՈՒՍՈՒՑՄԱՆ ՆՈՐԱԳՈՒՅՆ ՄԵԹՈԴՆԵՐԻՑ ՄԵԿԻՆ
«Erasmus+ PRINTeL» ծրագրի շրջանակում ԵՊՀ եվրոպական լեզուների և հաղորդակցության ֆակուլտետի միջմշակութային հաղորդակցության անգլերենի ամբիոնի դոցենտ Մարինե Յաղուբյանը Պորտոյի համալսարանում մասնակցել է «Տեսանյութերը՝ որպես դասավանդման գործիք դասախոսների և ուսանողների համար» խորագրով վերապատրաստման դասընթացներին, ապա ստացած գիտելիքները փոխանցել գործընկերներին:

Մեզ հետ զրույցում Մարինե Յաղուբյանը պատմեց, որ Պորտոյի համալսարանում մասնակիցները ծանոթացել են ուսուցման նորագույն մեթոդներին ու գործիքներին. «Մասնավորապես առավել մանրամասն քննարկվեց տեսանյութերի՝ որպես ժամանակակից ուսուցման մեթոդական գործիքի պատրաստումը դասախոսների և ուսանողների համար»:

 

«Դասընթացի ժամանակ ծանոթացանք «Panopto» նորարարական ծրագրին: Այն առցանց հարթակ է, որը հնարավորություն է տալիս պատրաստելու և ցուցադրելու անհրաժեշտ տեսանյութերը: ԵՊՀ-ում այդ ծրագիրը չկա, այստեղ օգտվում ենք «Մուդլ»-ի հնարավորություններից»,- ասաց Մարինե Յաղուբյանը:

 

Նրա հավաստմամբ, տեսանյութերը դասավանդման գործընթացում կարևոր դեր ունեն. «Կա գիտական հիմնավորում, ըստ որի՝ եթե տեղեկատվությունը ստանում ենք լսելով, ապա տպավորվում է դրա 1/4-ը, իսկ եթե տեսնելով՝ 1/3-ը, իսկ դրանք համադրելով՝ արդեն ավելի բարձր արդյունավետություն կարող ենք արձանագրել»:

 

«Տեսանյութերը չեն պատրաստվում մեկ ամբողջական դասաժամի համար: Առավել նպատակահարմար է, երբ դրանց տևողությունը կազմում է 7-8 րոպե: Տեսանյութերի կիրառումը նպատակահարմար է նաև այն առումով, որ ուսանողները բացակայելու դեպքում կարող են դրանց միջոցով ծանոթանալ քննարկվող նյութին և հետ չմնալ ուսումնական գործընթացից»,- փաստեց Մարինե Յաղուբյանը:

 

 

Նրա կողմից գործընկերների համար կազմակերպված վերապատրաստման 5-օրյա դասընթացին մասնակցել է ֆակուլտետի 19 դասախոս: Հանդիպումների ժամանակ եղել են նաև գործնական դասընթացներ, որոնց մասնակիցները փորձել են ստեղծել իրենց տեսանյութերը:

 

Մարինե Յաղուբյանն իր ուսանողների հետ արդեն կիրառում է այս մեթոդը՝ հանձնարարելով 2 րոպե տևողությամբ տեսանյութեր պատրաստել. «Երբ ուսանողները սովորում էին ուտելիքին վերաբերող բառեր, նրանցից ամեն մեկը տեսանկարահանել էր թեմային առնչվող գործողություն, ինչն ավելի է ամրապնդել ուսուցանվող նյութը: Այժմ այն կիրառում ենք որպես հավելյալ մեթոդ, առանց պարտադրելու, բայց ուսանողները հաճույքով են ներգրավվում այդ աշխատանքներին»:

 

5-օրյա վերապատրաստման դասընթացի ընթացքում քննարկվել են նաև մեթոդի կիրառման խնդիրներն ու խոչընդոտները: Ըստ դասախոսների՝ բարձր արդյունավետության համար անհրաժեշտ են տեխնիկապես հագեցած լսարաններ, համացանցի որակյալ հասանելիություն. «Կան վարժություններ, որոնք ուսանողները պետք է տեղում իրականացնեն, բայց հնարավորություններ չկան: Իսկ տնային աշխատանքի դեպքում էլ արդեն չգիտենք՝ ինքնուրույն են աշխատել, թե ոչ և այլն»:

 

 

Մեթոդի կանոնավոր կիրառումը ԵՊՀ-ում, ըստ Մարինե Յաղուբյանի, հնարավոր կլինի ժամանակի ընթացքում. «Հաջորդ տարի նախատեսվում է, որ կունենանք համապատասխան տեխնիկայով հագեցած կաբինետ: Բացի դրանից՝ այսօրվա տեխնոլոգիաներն էլ թույլ են տալիս յուրաքանչյուրին բջջային հեռախոսով տեսանկարահանել և մոնտաժել անհրաժեշտ նյութը»:

 

Մեզ հետ զրույցում Մարինե Յաղուբյանը տեղեկացրեց, որ ուսանողները պատրաստվում են մասնակցել նաև մայիսին տեղի ունենալիք համաժողովին, որի ընթացքում կներկայացնեն իրենց կողմից պատրաստած տեսանյութերը:

 

Քնար Միսակյան

Այլ նորություններ
ՏԵՍԱԿԱՆ ԳԻՏԵԼԻՔՆԵՐԸ ՎԵՐԱԾՎՈՒՄ ԵՆ ԳՈՐԾՆԱԿԱՆ ՀՄՏՈՒԹՅՈՒՆՆԵՐԻ․ «ՏՕՊԱՍ» ԾՐԱԳՐԻ ՀԵՐԹԱԿԱՆ ԽՈՐՀՐԴԱԿՑՈՒԹՅՈՒՆԸ ԵՊՀ-ՈՒՄ
Երևանի պետական համալսարանի տնտեսագիտության և կառավարման ֆակուլտետում այսօր տեղի է ունեցել «ՏՕՊԱՍ»-ի (TOPAS- From Theoretical-Oriented to Practical education in Agrarian Studies) «Տեսական ուղղվածությունից գործնական կրթությանը նվիրված Ագրարային կրթության» ծրագրի հերթական խորհրդակցությունը։
 «ՏՎՅԱԼՆԵՐԻ ԳԻՏՈՒԹՅՈՒՆԸ ԲԻԶՆԵՍՈՒՄ» ՄԱԳԻՍՏՐՈՍԱԿԱՆ ԾՐԱԳՐԻ ՈՐՈՇ ՈՒՍԱՆՈՂՆԵՐ ՇԱՐՈՒՆԱԿԵԼՈՒ ԵՆ ՈՒՍՈՒՄԸ ՍԱՆ ԽՈՍԵԻ ՀԱՄԱԼՍԱՐԱՆՈՒՄ
Երևանի և Սան Խոսեի պետական համալսարանների 2019 թվականին ձեռք բերված համագործակցության շնորհիվ ԵՊՀ տնտեսագիտության և կառավարման ֆակուլտետի «Տվյալների գիտությունը բիզնեսում» մագիստրոսական ծրագրի ընտրական փուլը հաղթահարած 2-4 ուսանող 2020 թ. սեպտեմբերից կշարունակեն ուսումն ԱՄՆ-ի Սան Խոսեի պետական համալսարանի «Data Analytics» (MS) մագիստրոսական ծրագրում։ Համագործակցության, նպատակների ու հետագա գործունեության մասին ysu.am-ը զրուցել է «Տվյալների գիտությունը բիզնեսում» մագիստրոսական ծրագրի ղեկավար Ռուբեն Գևորգյանի և ընտրական փուլ հասած ուսանողներից մի քանիսի հետ։