29.09.2022 | 
Մշակույթ
ԵՊՀ ՇԱՌԼ ԱԶՆԱՎՈՒՐԻ ԱՆՎԱՆ ՄՇԱԿՈՒՅԹԻ ԿԵՆՏՐՈՆԻ ՄԵՆԵՐԳՉՈՒՀԻՆ ՇԱՐՈՒՆԱԿՈՒՄ Է ՄԻՋԱԶԳԱՅԻՆ ՄՐՑՈՒՅԹՆԵՐՈՒՄ ՀԱՂԹԱՆԱԿՆԵՐ ԳՐԱՆՑԵԼ
ԵՊՀ ՇԱՌԼ ԱԶՆԱՎՈՒՐԻ ԱՆՎԱՆ ՄՇԱԿՈՒՅԹԻ ԿԵՆՏՐՈՆԻ ՄԵՆԵՐԳՉՈՒՀԻՆ ՇԱՐՈՒՆԱԿՈՒՄ Է ՄԻՋԱԶԳԱՅԻՆ ՄՐՑՈՒՅԹՆԵՐՈՒՄ ՀԱՂԹԱՆԱԿՆԵՐ ԳՐԱՆՑԵԼ
Մարիցա Թիլիքյանը Բուլղարիայում անցկացված «Արծաթե յանտրա 2022» փոփ երաժշտության միջազգային մրցույթում արժանացել է Գրան պրի մրցանակի։ Մշակույթի կենտրոնի տնօրեն Կարինե Դավթյանի հետ զրուցել ենք միջազգային մրցույթի, Մարիցայի մասնակցության և գրանցած հաջողություններում կենտրոնի ունեցած դերի մասին:

Միջազգային մրցույթն անցկացվել է սեպտեմբերի 23-25-ը՝ նպատակ ունենալով խթանելու համաշխարհային և ազգային բարձրաճաշակ երաժշտության տարածումը։

 

Մարիցա Թիլիքյանը ԵՊՀ ինֆորմատիկայի և կիրառական մաթեմատիկայի ֆակուլտետի շրջանավարտ է: Նա մշակույթի կենտրոնում մեծ սեր է ձեռք բերել երգարվեստի հանդեպ և որոշել ուսումը շարունակել Երևանի Կոմիտասի անվան պետական կոնսերվատորիայում՝ միաժամանակ պահպանելով ԵՊՀ-ի և Շառլ Ազնավուրի անվան մշակույթի կենտրոնի հետ ունեցած ամուր կապը:

 

 

Կարինե Դավթյանի խոսքով՝ երգչուհու տաղանդը նկատվել է այն ժամանակ, երբ դեռ առաջին կուրսի ուսանող է եղել:

 

«Առաջին անգամ, երբ լսեցի Մարիցայի կատարումը, հասկացա՝ նրան մեծ բեմեր են սպասում: Այսօր կարող եմ ասել՝ տարիների աշխատանքը տվել է իր արդյունքը. Մարիցային շատերն են ճանաչում և նրանով հպարտանում: Դիտարկելով Մարիցայի օրինակը՝ կարող եմ փաստել, որ ԵՊՀ Շառլ Ազնավուրի անվան մշակույթի կենտրոնը տաղանդաշատ ուսանողների համար հարթում է ուղի՝ դեպի մեծ բեմեր»,- վստահեցնում էր Կ. Դավթյանը և հպարտորեն ժպտում:

 

 

Կ․ Դավթյանը հայտնեց, որ մրցույթի ընթացքին հետևել է առցանց տարբերակով:

 

«Աշխատանքային գրաֆիկով պայմանավորված՝ այս անգամ չկարողացա մեկնել Մարիցայի հետ, սակայն մինչ մեկնելը նախապատրաստական աշխատանք ենք կատարել՝ փորձերի ժամանակ քննարկելով յուրաքանչյուր դետալ»,- ասաց կենտրոնի տնօրենը:

 

Մեր մասնակիցը մրցույթում ներկայացել է նախապես մտածված, ինքնատիպ և խիստ ազդեցիկ բեմադրությամբ, որի հեղինակը եղել է Կարինե Դավթյանը։

 

Հետևելով ելույթին՝ Կ․ Դավթյանը նկատել է՝ Մարիցայի կատարման ժամանակ ժյուրին որքա՜ն տպավորված է եղել, հատկապես երգի կուլմինացիայի պահին, երբ, Կարինե Դավթյանի մտահղացմամբ, Մարիցան սկսել է անակնկալ ծածանել Հայաստանի դրոշը։ 

 

Ըստ Կ․ Դավթյանի՝ հաղթանակի հասնելու համար պետք է ուշադրություն դարձնել բոլոր մանրուքներին: Այս է պատճառը, որ երկար ժամանակ է հատկացվել անգամ հագուստի ընտրությանը:

 

 

«Պետք էր ընտրել այնպիսի հագուստ, որը «կպատմեր» երգի մասին»,- նշեց Կ. Դավթյանը:

 

Ուշագրավ է այն, որ մրցույթի բոլոր մասնակիցներն ունեցել են հաղթելու հավանականություն և արժանիքներ, սակայն հաղթանակի բերկրանքը վայելելու հնարավորությունն ընձեռվել է Մարիցային։ Դեպի հաղթանակ տանող ճանապարհը եղել է դժվարին և փորձություններով լի։ Կ. Դավթյանը փաստեց, որ Մարիցային շատ է օգնել նաև այն, որ նա եղել է ԵՊՀ Շառլ Ազնավուրի անվան մշակույթի կենտրոնի թատրոն-ստուդիայի սան՝ տարբեր ներկայացումներում մարմնավորելով դերեր և ստեղծելով կերպարներ, ինչը չէր կարող դրական ազդեցություն չունենալ թե՛ երգի մատուցման, թե՛ տպավորիչ ելույթ ունենալու գործերում:

 

Ամփոփելով իր խոսքը՝ Կ․ Դավթյանն ընդգծեց․ «Հպարտանալու առիթ է, որ մեծ բեմեր է նվաճում ԵՊՀ շրջանավարտը՝ Շառլ Ազնավուրի անվան մշակույթի կենտրոնի մեներգչուհին: Սա ոչ միայն ԵՊՀ-ի, այլև ողջ Հայաստանի հաղթանակն է: Վստահաբար կարող եմ ասել, որ այսպիսի հեղինակավոր մրցույթները ևս նպաստում են բուհի միջազգային ճանաչմանը և ստեղծում համագործակցության նոր հնարավորություններ»։

 

Նշենք, որ Մարիցան մրցույթին ներկայացրել է Շուշան Սարգսյանի «Հայաստա՛ն երկիր, ի՛մ մայր» երգը:

Այլ նորություններ
«ՀԱՄԱԼՍԱՐԱՆԸ ՀԱՅԱԳԻՏԱԿԱՆ ՀՈՒՄԱՆԻՏԱՐ ԿԵՆՏՐՈՆ Է, ՈՐԸ ԳԻՏՈՒԹՅԱՆ ՆՎԱՃՈՒՄՆԵՐԻՆ ՈՒ ՁԵՌՔԲԵՐՈՒՄՆԵՐԻՆ ԻՄԱՍՏ ԵՎ ՀՈՂԵՂԵՆ ՄԱՐՄԻՆ Է ՏԱԼԻՍ». ՏԻԳՐԱՆ ՄԱՆՍՈՒՐՅԱՆ
ԵՊՀ Շառլ Ազնավուրի անվան մշակույթի կենտրոնում տեղի ունեցավ հանդիպում հայ կոմպոզիտոր, Հայաստանի Հանրապետության ժողովրդական արտիստ Տիգրան Մանսուրյանի հետ, որի ընթացքում համալսարանի ռեկտոր Հովհաննես Հովհաննիսյանը մաեստրոյին հանձնեց ԵՊՀ ոսկե մեդալ:
ՀԱՄԱԼՍԱՐԱՆԱԿԱՆՆԵՐԸ ԴԻՏԵՑԻՆ «…ԵՎ ՆՈՐԻՑ ԳԱՐՈՒՆ» ՆԵՐԿԱՅԱՑՈՒՄԸ
ԵՊՀ Շառլ Ազնավուրի անվան մշակույթի կենտրոնի նախաձեռնությամբ «Համալսարանական» թատրոն-ստուդիայի սաները Ս. Սարգսյանի անվան համազգային թատրոնում դիտեցին ներկայացում, որի ավարտին տեղի ունեցավ քննարկում ներկայացման ստեղծագործական և դերասանական կազմի հետ: