29.12.2016 | 
Հասարակություն
ԵՊՀ ԱՇԽԱՏԱԿԻՑՆԵՐԸ ԿՈՒՆԵՆԱՆ ԱՌՈՂՋՈՒԹՅԱՆ ԱՊԱՀՈՎԱԳՐՈՒԹՅՈՒՆ
ԵՊՀ ԱՇԽԱՏԱԿԻՑՆԵՐԸ ԿՈՒՆԵՆԱՆ ԱՌՈՂՋՈՒԹՅԱՆ ԱՊԱՀՈՎԱԳՐՈՒԹՅՈՒՆ
2017 թ.-ից ԵՊՀ աշխատակիցները ևս բուժօգնության դիմելիս կկարողանան օգտվել առողջության ապահովագրությունից:

Դրա մասին որոշումը ԵՊՀ հոգաբարձուների խորհուրդը կայացրել է օրերս` հաստատելով 2017թ. եկամուտների և ծախսերի նախահաշիվը: Սակայն նախապատրաստական գործընթացը մեկնարկել էր դեռևս այս տարվա սկզբին: Նախաձեռնողը ԵՊՀ արհեստակցան կազմակերպությունն էր, ԵՊՀ գիտական խորհուրդն էլ հավանություն էր տվել գաղափարին: 


ԵՊՀ ռեկտորի հրամանով ստեղծվել էր ԵՊՀ աշխատողների կորպորատիվ սոցիալական աջակցության և առողջության ապահովագրության տրամադրման մեխանիզմները մշակող հանձնաժողով, որը ղեկավարում էր ԵՊՀ պրոռեկտոր Ռուբեն Մարկոսյանը: «Ուսումնասիրեցինք շուկայում առկա բժշկական ապահովագրության փաթեթները, հարցումներ ուղարկեցինք ընկերություններին և արդյունքում կազմեցինք ԵՊՀ աշխատողների բժշկական ապահովագրության տեխնիկական բնութագիրը, որն էլ հետագայում դարձավ համապատասխան  ապահովագրական ընկերությունների մրցույթի հիմքը»,- նշեց պարոն Մարկոսյանը: 


Մրցույթը հայտարարվել է այս տարվա դեկտեմբերի սկզբին: Դիմած երեք կազմակերպություններից հաղթող է ճանաչվել «Ռոսգոսստրախ Արմենիա» ապահովագրական ընկերությունը, որի հետ էլ ԵՊՀ-ն կնքելու է պայմանագիր՝ գործընթացն իրականացնելու համար: 

ԵՊՀ-ն իր բյուջեից բժշկական ապահովագրական ծախսերի համար նախատեսել է շուրջ 125 մլն դրամ: 

«ԵՊՀ-ն յուրաքանչյուր աշխատակցի համար տարեկան վճարելու է 52.000 դրամ, իսկ ապահովագրական ծածկույթը կազմելու է մինչև 6 մլն դրամ: Փաստաթղթում ներկայացված է բժշկական ծառայությունների շատ լայն սպակտր՝ կլինիկական, վիրաբուժական և այլն: Ներառված է նույնիսկ ատամնաբուժությունը, ինչն ապահովագրող շատ քիչ ընկերություններում է հանդիպում: Ասվածը չի վերաբերում խրոնիկ հիվանդություններին»,- ասում է ԵՊՀ արհեստակցական կազմակերպության նախագահ Արմեն Ավետիսյանը:

Նշենք, որ առողջության ապահովագրությունից օգտվելու են ԵՊՀ-ի միայն հիմնական աշխատողները, իսկ արտաքին համատեղությամբ կամ ժամավճարով աշխատողների դեպքում այն չի կիրառվում: Ապահովագրվող անձանց դեպքում ևս ամեն ինչ հստակ է. ապահովագրական ընկերությունը փոխհատուցում է միայն ԵՊՀ աշխատակցի բուժման ծախսերը: Ընտանիքի անդամներին ևս ապահովագրելու ցանկության դեպքում Արհեստակցական կազմակերպությունը պատրաստ է դիմել ապահովագրող ընկերությանը` նրանց ևս նույն պայմաններով ապահովագրելու համար: Այդ դեպքում, սակայն, վճարումները պետք է կատարեն իրենք` աշխատողները:

ԵՊՀ-ն ապահովագրական ընկերությանն է տրամադրել 2244 աշխատողի տվյալներ, ինչին կհաջորդի կողմերի միջև պայմանագրի ստորագրումը: Եկող տարվա հունվար-փետրվար ամիսներին համակարգում ներառված աշխատողներին կտրամադրվի «Ռոսգոսստրախ Արմենիա» ընկերության առողջության ապահովագրության պլաստիկ քարտեր, որոնցով կարող են դիմել ՀՀ և ԼՂՀ տարածքում գտնվող ցանկացած բուժհաստատության:

2017 թ.-ի տարեսկզբին ապահովագրող ընկերության ներկայացուցիչները հանդիպումներ կունենան ԵՊՀ բոլոր ստորաբաժանումների աշխատակիցների հետ, մանրամասն կներկայացնեն ապահովագրության տրամադրման բոլոր կետերն ու գործընթացները: Մինչ այդ առողջության ապահովագրման հետ կապված բոլոր հարցերով համալսարանականները կարող են դիմել Արհեստակցական կազմակերպությանը, որը համակարգում է ամբողջ գործընթացը:

«Ես պետք է խնդրեմ, որ մեր աշխատակիցները լինեն ակտիվ, գոնե տարին մեկ անգամ պրոֆիլակտիկ ստուգումներ անցնեն, որպեսզի չստացվի այնպես, որ ԵՊՀ-ն վճարի, իսկ իրենք չօգտվեն ապահովագրական ծառայությունից»,- ասաց պարոն Ավետիսյանն ու հավելեց, որ առաջիկայում կհրապարակվի ապահովագրության մեջ ներառվող բոլոր բուժծառայությունների ցանկը:

Այլ նորություններ
ԴԱՍԱԴՈՒԼ ԵՊՀ ՄԻՋԱԶԳԱՅԻՆ ՀԱՐԱԲԵՐՈՒԹՅՈՒՆՆԵՐԻ ՖԱԿՈՒԼՏԵՏՈՒՄ
ԵՊՀ միջազգային հարաբերությունների ֆակուլտետի տարբեր կուրսերի ուսանողներ այսօր համալսարանի կենտրոնական մասնաշենքի նախասրահում դասադուլ էին կազմակերպել՝ hաջակցություն Միջազգային հարաբերությունների ֆակուլտետի դեկանի տեղակալ, քաղաքական գիտությունների թեկնածու, դոցենտ Էդգար Քալանթարյանի, որը վերջերս աշխատանքից ազատման դիմում էր ներկայացրել:
ԵՊՀ ԹԻՄԸ ԿՐԿԻՆ ԱՌԱՋԻՆՆ Է ՄԻՋԲՈՒՀԱԿԱՆ ՊԱՅՔԱՐՈՒՄ.  ՏԵՂԻ Է ՈՒՆԵՑԵԼ ԱՄԵՆԱՄՅԱ ԱՐԲԻՏՐԱԺ ԴԱՏԱԽԱՂ-ՄՐՑՈՒՅԹԸ
Մարտի 23-24-ը Հայաստանի ամերիկյան համալսարանում Եվրոպայի խորհրդի և «ԷյԴիԱր փարթներս» ընկերության կողմից կազմակերպված արբիտրաժ դատախաղ-մրցույթին մասնակցել են համալսարանական երկու թիմեր, որոնցից մեկը զբաղեցրել է առաջին հորիզոնականը: