18.10.2018 | 
Հասարակություն
«ԻՆՉՊԵ՞Ս Է ԽՈՍՔԸ ՓՈԽՈՒՄ ԱՇԽԱՐՀԸ». ՊԱՏԳԱՄԱՎՈՐ ՀԱՅԿ ԿՈՆՋՈՐՅԱՆԸ՝ ՍՈՑԻՈԼՈԳԻԱՅԻ ՖԱԿՈՒԼՏԵՏԻ ՀՅՈՒՐ
«ԻՆՉՊԵ՞Ս Է ԽՈՍՔԸ ՓՈԽՈՒՄ ԱՇԽԱՐՀԸ». ՊԱՏԳԱՄԱՎՈՐ ՀԱՅԿ ԿՈՆՋՈՐՅԱՆԸ՝ ՍՈՑԻՈԼՈԳԻԱՅԻ ՖԱԿՈՒԼՏԵՏԻ ՀՅՈՒՐ
ԵՊՀ սոցիոլոգիայի ֆակուլտետի «Հասարակայնության հետ կապեր» մագիստրատուրա 2-րդ կուրսի ուսանողները «Քաղաքական PR» առարկայի շրջանակում հյուրընկալեցին «Ելք» խմբակցության պատգամավոր Հայկ Կոնջորյանին:

Հայկ Կոնջորյանը հանդես եկավ «Ինչպե՞ս է խոսքը փոխում աշխարհը» խորագրով ելույթով:

«Մենք ապրում ենք մի ժամանակաշրջանում, երբ խոսքն այնքան շատ է, որ տպավորություն է ստեղծվում, թե այն արժեզրկվել է»,- ասաց Հայկ Կոնջորյանը:

Նա առանձնացրեց պատմական 3 ժամանակաշրջան, երբ խոսքը փոխել է կյանքի ընթացքը: Ըստ նրա՝ առաջինը նախնադարյան ժամանակաշրջանն է, երբ խոսքը զարգացնելու շնորհիվ հոմոսապիենսը կարողացավ հաղթել նեանդերթալցուն:

Մյուս փուլը Հին Հունաստանում շուկայի կերպափոխումն էր հրապարակի: Մարդիկ հավաքվում էին շուկայում, քննարկում տարբեր թեմաներ, և այդ ամենից ծնվեց հին հունական ժողովրդավարությունը:

Երրորդ փուլը Հայկ Կոնջորյանը տպագրության գյուտով է պայմանավորում: Գրավոր խոսքի միջոցով ձևավորվեց եվրոպացիների հավաքական ինքնությունը:



Պատմական նախաբանից հետո Հայկ Կոնջորյանը ներկայացրեց խոսքի կառուցվածքը՝ առանձնացնելով խոսքը ճիշտ սկսելու և միանգամից լսարանի ուշադրությունը գրավելու կարևորությունը: Նա նշեց, որ իրավիճակները տարբեր են լինում, իսկ կողմնորոշվելու համար պետք է ճկուն լինել:
Ըստ պատգամավորի՝ խոսքը սկսելու լավագույն տարբերակներից է հարց հնչեցնելը:

«Դուք PR մասնագետներ եք և շատ լավ գիտեք, թե որքան կարևոր է գրավել ուշադրությունը, ինչից հետո հնարավոր կլինի հղել ուղերձը: Իմ փորձից կարող եմ ասել, որ ելույթը սկսելու ամենաարդյունավետ տարբերակներից է հարցը: Ուղղակի տեքստ ասելիս լսարանը փորձում է որսալ խոսողի միտքը, իսկ հարցի պարագայում լսարանը միանգամից ինտեգրվում է զրույցին: Հարցը պետք է լինի հետաքրքիր, պետք է բխի ընդհանուր կոնտեքստից»,- ասաց նա:



Պատգամավորը խոսեց նաև ելույթը պատմությամբ սկսելու եղանակի մասին: Ըստ Պենսիլվանիայի համալսարանի հետազոտությունների՝ մարդիկ ավելի ուշադիր են լինում, եթե պատմության մեջ գտնում են իրենց: Սա նշանակում է, որ լսարանի առջև ելույթ ունենալիս արդյունավետ է պատմել սեփական կամ մեկ ուրիշի փորձի մասին: Բանախոսը նկատեց, որ մարդիկ սիրում են լսել դրամատիկ, դժվարությունների հաղթահարմամբ համեմված պատմություններ, քանի որ այդ պարագայում գտնում են նմանություն իրենց և հերոսի միջև:

Նա առանձնացրեց գլխավոր թեզ-ուղերձները փաստերով, վիճակագրությամբ հարստացնելու կարևորությունը. «Confidence comes from competence՝ վստահությունը գալիս է իմացությունից: Եթե դուք չգիտեք ձեր հիմնական ասելիքը, դա ազդում է ձեր ինքնավստահության վրա, ինչն էլ միանգամից նկատում է լսարանը»:

Հայկ Կոնջորյանը շեշտադրեց խոսքում հնարավորինս կարճ նախադասությունների կիրառումը՝ մոտավորապես 14-18 բառ: Խոսելով խոսքի ընդհանուր տևողության մասին՝ Կոնջորյանը խորհուրդ տվեց հնարավորինս շատ բարձրաձայն կարդալ տեքստը՝ այս ձևը համարելով մտքի լավագույն մարզում:



Ելույթի ընթացքում պատկերավոր ու տեղին համեմատությունները կարևորելով՝ նա օրինակ բերեց մեկ առավելությունը՝ ամենակարևոր ձեռքբերում ներկայացնելու հնարքը. «Հայաստանում առավել հեշտ է բիզնես սկսելը, քան, օրինակ, Չեխիայում: Սա ներկայացվում էր կոնտեքստից դուրս, և տպավորություն էր ստեղծվում, թե Հայաստանն առաջատար է ընդհանուր առմամբ»:

Պատգամավորը մի շարք պրակտիկ նշանակություն ունեցող խորհուրդներ տվեց լսարանին՝ ինչպես հաղթահարել լարվածությունը, վախը, ինչպես վարվել, եթե լսարանում կան խանգարող հանգամանքներ և այլն:

Կոնջորյանի ելույթից հետո ծավալվեց քննարկում, որի ժամանակ հարցեր հնչեցին քաղաքական գործիչ-լրագրող հարաբերությունների, վախն ու անհաջողությունը հաղթահարելու մասին:


Մարի Ռաֆյան 

 

Այլ նորություններ
«ՀԻՍՈՒՍ ՔՐԻՍՏՈՍԻ ԿԵՐՊԱՐԸ XX ԴԱՐԻ ԵՎ ԱՐԴԻ ՀԱՅ ԱՐՎԵՍՏՈՒՄ» ԳԻՐՔԸ ՀՈԳԵՎՈՐ ԱՐԺԵՔՆԵՐԻՆ ՄՈՏԵՆԱԼՈՒ ՆՈՐ ՈՒՂԵՆԻՇ
ՀՀ նկարիչների միության մեծ սրահում այսօր տեղի են ունեցել ԵՊՀ հայ արվեստի պատմության և տեսության ամբիոնի դոցենտ, արվեստագիտության թեկնածու Սաթենիկ Վարդանյանի «Հիսուս Քրիստոսի կերպարը XX դարի և արդի հայ արվեստում» գրքի շնորհանդեսը, ինչպես նաև հայ արդի նկարիչների թեմատիկ ստեղծագործությունների ցուցահանդեսը:
ՀԱՄԱԼՍԱՐԱՆԱԿԱՆՆԵՐՆ ԱՄԱՆՈՐԸ ԿԱՐՈՂ ԵՆ ԱՆՑԿԱՑՆԵԼ ԾԱՂԿԱՁՈՐԻ ՈԻՍՈԻՄՆԱԱՐՏԱԴՐԱԿԱՆ ԲԱԶԱՅՈՒՄ
Այս տարի ևս ԵՊՀ հիմնական աշխատակիցներն ու բոլոր ցանկացողներն իրենց ամանորյա տոները 31.12.2020-06.01.2021 թթ. ընկած ժամանակահատվածում կարող են անցկացնել Ծաղկաձորի ուսումնաարտադրական բազայում։