07.11.2018 | 
Հասարակություն
«ՌՈՒՍԱՍՏԱՆԻ ԺԱՄԱՆԱԿԱԿԻՑ ՊԱՏՄՈՒԹՅՈՒՆՆ ԱՌԱՆՑ ՀԱՅԵՐԻ ՀՆԱՐԱՎՈՐ ՉԷ ՊԱՏԿԵՐԱՑՆԵԼ». ՀՀ-ՈՒՄ ՌՈՒՍԱՍՏԱՆԻ ԱՐՏԱԿԱՐԳ ԵՎ ԼԻԱԶՈՐ ԴԵՍՊԱՆ
«ՌՈՒՍԱՍՏԱՆԻ ԺԱՄԱՆԱԿԱԿԻՑ ՊԱՏՄՈՒԹՅՈՒՆՆ ԱՌԱՆՑ ՀԱՅԵՐԻ ՀՆԱՐԱՎՈՐ ՉԷ ՊԱՏԿԵՐԱՑՆԵԼ». ՀՀ-ՈՒՄ ՌՈՒՍԱՍՏԱՆԻ ԱՐՏԱԿԱՐԳ ԵՎ ԼԻԱԶՈՐ ԴԵՍՊԱՆ
ԵՊՀ ռեկտոր Արամ Սիմոնյանն այսօր հանդիպել է Հայաստանում Ռուսաստանի նորանշանակ արտակարգ և լիազոր դեսպան Սերգեյ Կոպիրկինի հետ:

Հանդիպմանը ներկա էին ԵՊՀ գիտական քաղաքականության և միջազգային համագործակցության գծով պրոռեկտոր Գեղամ Գևորգյանը, Միջազգային համագործակցության վարչության պետ Ալեքսանդր Մարգարովը, Ռուս բանասիրության ֆակուլտետի դեկան Պավել Բալայանը, ԵՊՀ ռուսական կենտրոնի տնօրեն Արուսյակ Ներսեսյանը:  

Դեսպանն առաջին անգամ էր այցելում ԵՊՀ, ուստի Արամ Սիմոնյանը համառոտ ներկայացրեց համալսարանի անցած ուղին: Ռեկտորն անդրադարձավ նաև Ռուս բանասիրության ֆակուլտետի և Ռուսական կենտրոնի գործունեություններին: Այնուհետև Սերգեյ Կոպիրկինը ԵՊՀ գիտխորհրդի նիստերի դահլիճում հանդիպեց ուսանողների հետ:

 

Դեսպանը ողջույնի խոսքում անդրադարձավ հայ-ռուսական հարաբերություններին՝ խոսելով այդ հարաբերությունների ամուր հիմքերի և բազմակողմանիության մասին:

 

«Հայ և  ռուս ժողովուրդների բարեկամությունը շատ երկար տարիների փորձ և պատմություն ունի: Այն իր մեջ ընդգրկում է ամենատարբեր ոլորտներ, քանի որ Ռուսաստանի համար Հայաստանը շատ կարևոր գործընկեր է: Մեր առաջնային նպատակն է շարունակել արդեն առկա ավանդույթները, որոնք ձևավորվել են այս բարեկամության ընթացքում»:

 

 

Սերգեյ Կոպիրկինը, խոսելով Ռուսաստանում ապրող հայ համայնքի մասին, նշեց, որ այն շատ ազդեցիկ է և մեծ ներդրում ունի Ռուսաստանի ամենատարբեր ոլորտների զարգացման գործում. «Ռուսաստանի ժամանակակից պատմությունն առանց հայերի հնարավոր չէ պատկերացնել»:

Դեսպանը խոսեց նաև Հայաստանում տեղի ունեցած քաղաքական փոփոխությունները. «Շատ հատկանշական է, որ այդ փոփոխությունները համընկան իմ նշանակման հետ: Ես հայ ժողովրդի հետ ականատես դարձա քաղաքական այդ ողջ գործընթացին»: Այնուհետև դեսպանը պատասխանեց ուսանողների հարցերին:

Ուսանողներին հետաքրքրում էր, թե ինչպիսի միջմշակութային ծրագրեր է դեսպանությունը պատրաստվում իրականացնել բուհում, արդյոք Հայաստանում նույնպես տեղի կունենան գրական փառատոններ ժամանակակից ռուս գրողների մասնակցությամբ:

Բանախոսը նշեց, որ ամեն ինչ կանի երկկողմանի հարաբերություններն ակադեմիական և մշակութային ոլորտում ավելի ամրացնելու համար:

 

Ուսանողներին նաև հետաքրքիր էր, թե ինչ վայրեր խորհուրդ կտա դեսպանը Հայաստան այցելած զբոսաշրջիկներին:

«Ես նրանց խորհուրդ կտամ ճամփորդությունը սկսել հենց Երևանից, քանի որ Երևանն առանձնահատուկ էներգիա և  ջերմություն ունեցող քաղաք է: Հետո, իհարկե, պետք է այցելել թանգարաններ, լինել թատրոնում և վայելել երևանյան ջազը»,- ասաց դեսպանը:

Անի Պողոսյան

Այլ նորություններ
«ՀԱՐԳԵԼՈՎ ԶՈՀԵՐԻ ՀԻՇԱՏԱԿԸ՝ ԹՈՒՅԼ ՉԵՆՔ ՏԱԼԻՍ ՈՂԲԵՐԳՈՒԹՅԱՆ ԿՐԿՆՈՒԹՅՈՒՆ»․ ՀԱՄԱԼՍԱՐԱՆԱԿԱՆՆԵՐԻ ՀԱՐԳԱՆՔԻ ՏՈՒՐՔԸ ՄԵԾ ԵՂԵՌՆԻ ԶՈՀԵՐԻ ՀԻՇԱՏԱԿԻՆ
Երևանի պետական համալսարանի ուսանողներն ու պրոֆեսորադասախոսական կազմի ներկայացուցիչներն այսօր բարձրացան Ծիծեռնակաբերդ ու անմար կրակի մոտ իրենց հարգանքի տուրքը մատուցեցին Մեծ եղեռնի զոհերի հիշատակին։
ՑԵՂԱՍՊԱՆՈՒԹՅՈՒՆ ՎԵՐԱՊՐԱԾՆԵՐԸ. ԴՈԼՈՐԵՆՍ ԶՈՀՐԱՊ-ԼԻԲՄԱՆ, ԳԱՌՆԻԿ ՍՏԵՓԱՆՅԱՆ, ԱՇԽԵՆ ՏԻԳՐԱՆՅԱՆ
Որքան էլ Հայոց ցեղասպանության թեման բազմիցս արծարծված լինի, միևնույն է, այն շարունակում է մնալ արդիական: Ցեղասպանության մնացորդները սպիի նման խրված են մնում վերապրածների և հաջորդող սերունդների հիշողության ծալքերում: