20.03.2017 | 
Քաղաքականություն
ՄԱՍՆԱԳԻՏԱԿԱՆ ՕԳՆՈՒԹՅՈՒՆ ԱՐՑԱԽԻ ՊԵՏԱԿԱՆ ՀԱՄԱԼՍԱՐԱՆԻՆ
ՄԱՍՆԱԳԻՏԱԿԱՆ ՕԳՆՈՒԹՅՈՒՆ ԱՐՑԱԽԻ ՊԵՏԱԿԱՆ ՀԱՄԱԼՍԱՐԱՆԻՆ
ԵՊՀ իրավագիտության ֆակուլտետի և Արցախի պետական համալսարանի (ԱրՊՀ) միջև կնքվել է համագործակցության հուշագիր, որը նպատակ ունի նպաստել ԱրՊՀ-ում իրավաբանական կրթության կատարելագործմանը:

Իրավական պետության և բարձր իրավագիտակցությամբ օժտված հասարակության կերտման գործում իրավաբանական որակյալ կրթությունն անհրաժեշտ նախադրյալ է: Արդյունքում՝ արհեստավարժ իրավաբանների առկայությունը դառնում է երաշխիք միջազգային իրավական չափանիշներին համահունչ օրենսդրության ձևավորմանը, մարդու իրավունքների և ազատություն­ների պաշտպանության ամրապնդման ու զարգացման համար:

 

Հաշվի առնելով ԱրՊՀ-ի՝ Արցախի  Հանրապետության կայացման և զարգացման, մարդու իրավունքների պաշտպանության, իրավաբանական կրթության երաշխավորման գործում կարևոր դերակատարությունը՝ ԵՊՀ իրավագիտության ֆակուլտետը կնքված հուշագրի շրջանակում կաջակցի և մասնագիտական օգնություն ցույց կտա գործընկեր բուհին:

 

Այդ նպատակով մարտի 17-19-ը ԵՊՀ իրավագիտության ֆակուլտետի պատվիրակությունը, որի կազմում ընդգրկված էին ֆակուլտետի դեկան, պրոֆեսոր Գագիկ Ղազինյանը, ամբիոնի վարիչներ, պրոֆեսորներ Վահրամ Ավետիսյանը, Սամվել Դիլբանդյանը և դոցենտ Սերգեյ Մեղրյանը այցելեցին ԱրՊՀ: Արցախի Հանրապետություն է այցելել և հուշագրի կնքմանը ներկա գտնվել նաև ԵՊՀ ռեկտոր Արամ Սիմոնյանը:

 

ԵՊՀ ռեկտոր Արամ Սիմոնյանը փաստում է, որ այս հուշագիրը, ի տարբերություն նման այլ փաստաթղթերի, ենթադրում է  բովանդակային օգնություն և կոնկրետ գործողությունների իրականացում:

 

«Անհրաժեշտ է, որպեսզի Արցախի պետական համալսարանում ստեղծվեն բոլոր պայմանները որակյալ և կայացած իրավագետների պատրաստման համար: Այս բարդ ու երկար գործընթացում մեր իրավագիտության ֆակուլտետը պատրաստ է գործընկեր ֆակուլտետին տրամադրել ամեն տեսակի օգնություն՝ մասնագիտական խորհրդատվությունից մինչև դասախոսների պատրաստում և վերապատրաստում»,- նշեց ռեկտորը և հույս հայտնեց, որ մյուս ֆակուլտետները նույնպես կհետևեն Իրավագիտության ֆակուլտետի օրինակին:

 

Նշենք, որ ծրագիրը ներառում է ԵՊՀ իրավագիտության ֆակուլտետի կողմից ուսումնական գործընթացի և համատեղ մասնագիտական միջոցառումների կազմակերպում, գրականության հատկացում, հեռավար դասախոսություններ, դասավանդման մեթոդիկայի ներդրում, պրոֆեսորադասախոսական կազմի անդամների վերապատրաստում, փոխայցելություններ և այլն:

 

 

«Այս գործընթացի ազդակը եղավ այն, որ սահմանադրական փոփոխությունների պատրաստվող Արցախի Հանրապետությանը հարկավոր էր մասնագիտական օգնություն և խորհրդատվություն: Քանի որ ԱրՊՀ-ում բարձրորակ իրավաբան կադրերի պակաս կա, ուստի նրանք ստիպված էին դիմել ՀՀ մասնագետների օգնությանը: Արդյունքում՝ որոշվեց աջակցել ԱրՊՀ-ին՝ պատրաստելու որակյալ իրավաբաններ,- ասում է Գագիկ Ղազինյանը և ավելացնում,- նոր կայացող պետության համար, ինչպիսին Արցախի Հանրապետությունն է, ներկայումս ամենակարևոր գործոններից է պատշաճ իրավակարգավորումներն ու բազմաշերտ իրավական ոլորտի մշակումը, ինչը երկարատև գործընթաց է և պահանջում է որակյալ կադրերի առկայություն, ինչը, ցավոք, այսօր բացակայում է: Սա է, թերևս, մեծագույն խնդիրը»:

 

Դեկանն ընդգծեց, որ ներկայումս Արցախի պետական համալսարանում գործում է Պատմության և իրավագիտության ֆակուլտետ, ուստի մեկ ամբիոնը (Իրավունքի ամբիոն) բազմաճյուղ բնագավառում օբեկտիվորեն չի կարող պատճաշ մակարդակով իրականացնել որակյալ իրավաբան կադրերի պատրաստում:

 

«Արցախի Հանրապետության նախագահի հետ հանդիպման ընթացքում շեշտել ենք, որ նորաստեղծ պետության առջև ծառացած մարտահրավերները հաղթահարելու համար կադրերի պատրաստման հզոր դարբնոց է հարկավոր, և մենք՝ ԵՊՀ իրավագիտության ֆակուլտետի ամբողջ կազմը, պատրաստակամ է սատարել ԱրՊՀ-ին՝ նշված խնդիրները լուծելու համար»,- ասաց Գագիկ Ղազինյանը և հավելեց, որ առաջիկայում գործընկեր ֆակուլտետի պատվիրակությունը կայցելի Մայր բուհ՝ մշակելու և կնքելու գործողությունների իրականացման ժամանակացույցը:

 

Հավելենք, որ այցելության շրջանակում ԵՊՀ իրավագիտության ֆակուլտետի պատվիրակության անդամները հանդիպել են ԱրՊՀ իրավունքի ամբիոնի ուսանողների և պրոֆեսորադասախոսական կազմի ներկայացուցիչների հետ, ներկայացրել ծրագիրը, նպատակները և դրանց իրականացման գործընթացը, ինչպես նաև հետագա անելիքները:

Այլ նորություններ
ՀԱՄԱՊԱՏԱՍԽԱՆ ՔԱՆԱԿԻ ԿՐԵԴԻՏՆԵՐ ՉՀԱՎԱՔԱԾ ԵՎ ՈՒՍՄԱՆ ՎԱՐՁԵՐԸ ՉՎՃԱՐԱԾ ՈՒՍԱՆՈՂՆԵՐԸ ԿՀԵՌԱՑՎԵՆ. ԵՊՀ ՌԵԿՏՈՐԱՏԻ ՆԻՍՏՈՒՄ ԱՄՓՈՓՎԵՑ ՔՆՆԱՇՐՋԱՆԸ
Այսօր ԵՊՀ գիտխորհրդի նիստերի դահլիճում տեղի ունեցավ ռեկտորատի հերթական նիստը, որի ընթացքում ամփոփվեց 2017-2018 ուստարվա երկրորդ կիսամյակի քննաշրջանը:
4 ԴԵԿԱՆՆԵՐԻ ՈՒ 31 ԱՄԲԻՈՆԻ ՎԱՐԻՉՆԵՐԻ ԸՆՏՐՈՒԹՅՈՒՆՆԵՐԻ ՀԱՍՏԱՏՈՒՄ, ՆՈՐ ՊՐՈՖԵՍՈՐՆԵՐ, ԴՈՑԵՆՏՆԵՐ. ԹԵԺ ՔՆՆԱՐԿՈՒՄ՝ ԵՊՀ ԳԻՏԽՈՐՀՐԴՈՒՄ
Այսօր ԵՊՀ գիտխորհրդի նիստերի դահլիճում տեղի ունեցավ գիտխորհրդի հերթական նիստը, որի օրակարգում ընդգրկված էին ութ օրակարգային և մի քանի ընթացիկ հարցեր: