23.10.2015 | 
Գիտություն
ԱՌԱՋԻՆ ՊԼԱՆՈՒՄ ՀՈԳԵԿԱՆ ԱՌՈՂՋՈՒԹՅՈՒՆՆ Է
ԱՌԱՋԻՆ ՊԼԱՆՈՒՄ ՀՈԳԵԿԱՆ ԱՌՈՂՋՈՒԹՅՈՒՆՆ Է
Աշխարհի տարբեր ծայրերից մի քանի տասնյակ հոգեբաններ ու հոգեբույժներ են հավաքվել ԵՊՀ-ում` քննարկելու հոգեկան առողջության խնդիրները:

Իսկ դրա նախաձեռնողը ԵՊՀ փիլիսոփայության և հոգեբանության ֆակուլտետի ընդհանուր հոգեբանության ամբիոնն է: Արդեն 5-րդ տարին է, ինչ ամբիոնը կազմակերպում և իրականացնում է «Տեսական և կիրառական հոգեբանության հիմնախնդիրները» խորագրով միջազգային գիտաժողովը: Այս անգամ այն անցկացվելու է հոկտեմբերի 23-25-ը:

 

Եռօրյա գիտաժողովն իրականացվում է ՀՀ ԿԳՆ գիտության պետական կոմիտեի աջակցությամբ՝  համագործակցելով միջազգային և ՀՀ հոգեբուժական ասոցիացիաների հետ: Բացման արարողությանը ներկա էին նշված կազմակերպությունների ներկայացուցիչներ, արտասահմանյան գիտնականներ, դասախոսներ, ուսանողներ և ուրիշներ:

 

«Ինքս տեսել եմ, թե վերջին ամիսների ընթացքում ինչ հսկայածավալ աշխատանք է կատարվել այս գիտաժողովին պատրաստվելիս: Եվ ուրախալին այն է, որ այդ ամենին մասնակցել են նաև մեր ուսանողները, իսկ ասպիրանտները հանդես են գալիս որպես զեկուցողներ: Դա կարծես գեղեցիկ ավանդույթ է դարձել մեր ֆակուլտետում»,- ուրախությամբ նշեց Փիլիսոփայության և հոգեբանության ֆակուլտետի դեկան Ալեքսան Բաղդասարյանը` գիտաժողովի մասնակիցներին փոխանցելով նաև ՀՀ վարչապետ Հովիկ Աբրահամյանի ողջույնն ու ուղերձը:

Գիտաժողովի կազմակերպիչները որոշել են այս տարի այն նվիրել Հայոց ցեղասպանության 100-ամյա տարելիցին: Այդ պատճառով էլ ծրագրում ներառվել է նաև ֆրանսիահայ ռեժիսոր Ժակ Քեբաբջյանի «Հայկական հիշողություն» (Ցեղասպանության վկաների հուշեր) ֆիլմի դիտումը և քննարկումը:

 

Այս տարվա նորություններից մեկն էլ ՀՀ Սփյուռքի նախարարության աջակցությամբ տպագրված «Հայ հոգեբանների միջազգային ներուժը» ձեռ­նար­կի շնորհանդեսն է, որում ներկայացված են արտերկրում բնակվող, մի­ջազ­գա­յին աս­պա­րե­զում մեծ ավանդ ունե­ցած հայ հոգեբանների կեն­սագ­րութ­յուն­նե­րը և նրանց գի­տա­կան նվաճում­նե­րը: Շնորհանդեսը նպա­տակ ու­նի լու­սա­բա­նելու և արժևո­րելու այն ներդրու­մը, ո­րը նրանք ու­նե­ցել և շարունակում են ­ու­նենալ հո­գե­բա­նութ­յան զարգաց­ման գործըն­թա­ցում:

 

«Այս տարի Առողջապահության համաշխարային կազմակերպությունը հոկտեմբեր ամիսը հայտարարել է հոգեկան առողջության պահպանման ամիս: Այդ կապակցությամբ մեր նստաշրջաններից մեկին հրավիրել ենք նաև Համաշխարհային և Հայկական հոգեբուժական ասոցիացիաներին: Սա նշանակում է, որ այս հոգեբաններն ու հոգեբույժները մեկ խնդիր են լուծում` ազգաբնակչության հոգեկան առողջության հիմնախնդիրները»,- նշում է Ընդհանուր հոգեբանության ամբիոնի վարիչ Հրանտ Ավանեսյանը:

 

Արդեն ավանդական դարձած գիտաժողովն ընդլայնել է նաև աշխարհագրությունը: Այս տարի զեկուցումներով հանդես կգան մասնագետներ Ռուսաստանից, Արգենտինայից, Իրանից, ԱՄՆ-ից, Ֆրանսիայից, Լիտվայից, Վրաստանից: Միայն Ռուսաստանը ներկայացված է տարբեր քաղաքների 12 համալսարաններով:

 

Ծրագրում ընդգրկված զեկուցումները վերաբերում են հոգեբանության տարբեր ճյուղերի արդի հիմնախնդիրներին, իսկ հատուկ նստաշրջանը նվիրված կլինի Հայոց ցեղասպանության արձագանքների հոգեբանական հիմնախնդիրների գիտական քննարկմանը:

Գիտաժողովը ներառում է հետևյալ նստաշրջանները՝ «Հոգեբանության տեսություն», «Մեթոդաբանություն», «Փորձարարական հոգեբանություն», «Անձի հոգեբանություն», «Կրթության և զարգացման հոգեբանություն», «Կառավարման հոգեբանություն», «Սոցիալական հոգեբանության էթնիկական և մշակութային հայեցակետերը», «Սպորտի և առողջ ապրելակերպի հոգեբանություն», «Հայաստանում հոգեկան առողջության ոլորտի բարեփոխումները»: Նստաշրջանների ընթացքում կներկայացվեն 60-ից ավելի զեկուցումներ:

 

«Հոգեկան առողջությունը միայն հոգեբույժների, հոգեբանների կամ սոցիալական աշխատողների մենաշնորհը չէ: Դրանում պետք է բոլոր մասնագետները ներգրավվեն: Հենց դրա համար որոշեցինք այս ձևաչափով անցկացնել գիտաժողովը»,- նշեց Հայկական հոգեբուժական ասոցիացիայի նախագահ Արմեն Սողոյանը:

 

Գիտաժողովի 3-րդ օրը կկազմակերպվեն հատուկ գիտագործնական սեմինարներ երիտասարդ հոգեբանների՝ ուսանողների, մագիստրանտների և ասպիրանտների համար: Դրանք կվարեն արտասահմանից հրավիրված մասնագետները:

 

Այլ նորություններ
ՂՐՂԶՍՏԱՆՈՒՄ ԱՆՑԿԱՑՎԵԼՈՒ Է ԵԱՏՄ ՏԱՐԱԾՔՈՒՄ ԱՄԵՆԱՄԵԾ «ԵՎՐԱՍԻԱԿԱՆ ՇԱԲԱԹ-2019» ԽՈՐԱԳՐՈՎ ՀԱՄԱԺՈՂՈՎԸ
Եվրասիական տնտեսական միության (ԵԱՏՄ) գործարարները և ակտիվ երիտասարդները հանդիպելու են մեկ հարթակում՝ քննարկելու տնտեսական ինտեգրման և բիզնես համագործակցության հարցերը, որին հեռակա կարգով կարող են մասնակցել նաև ԵՊՀ տարբեր ֆակուլտետների դասախոսներ, երիտասարդ գիտնականներ, ասպիրանտներ և փորձագետներ:
ԼՈՒՅՍ ԵՆ ՏԵՍԵԼ «ԵՊՀ ՈՒԳԸ ԳԻՏԱԿԱՆ ՀՈԴՎԱԾՆԵՐԻ ԺՈՂՈՎԱԾՈՒ» ԵՐԻՏԱՍԱՐԴԱԿԱՆ ԳԻՏԱԿԱՆ ՊԱՐԲԵՐԱԿԱՆԻ 2019 ԹՎԱԿԱՆԻ ԱՌԱՋԻՆ ՀԱՄԱՐՆԵՐԸ
ԵՊՀ գիտխորհրդի նիստերի դահլիճում այսօր տեղի ունեցավ «ԵՊՀ ՈՒԳԸ գիտական հոդվածների ժողովածու» երիտասարդական գիտական պարբերականի Բնական և ֆիզիկամաթեմատիկական գիտությունների 1.1 (27), Հումանիտար և հասարակական գիտությունների 1.2 (28) համարների շնորհանդեսը: