24.10.2017 | 
Քաղաքականություն
ՇԱՐՈՒՆԱԿՎՈՒՄ ԵՆ ՄԱՐԶԱՅԻՆ ԱՅՑԵԼՈՒԹՅՈՒՆՆԵՐԸ
ՇԱՐՈՒՆԱԿՎՈՒՄ ԵՆ ՄԱՐԶԱՅԻՆ ԱՅՑԵԼՈՒԹՅՈՒՆՆԵՐԸ
ԵՊՀ մինչհամալսարանական կրթության վարչությունը շարունակում է կազմակերպել ԵՊՀ դասախոսների այցելությունները դեպի մարզերի ավագ դպրոցներ:

Ինչպես արդեն տեղեկացրել ենք, ԵՊՀ մինչհամալսարանական կրթության վարչությունը պարբերաբար կազմակերպում է մարզային այցելություններ, որոնց նպատակն է  նպաստել ավարտական դասարանների աշակերտների մասնագիտական կողմնորոշմանը, բարձրացնել իրազեկության մակարդակը և ուղղորդել դեպի ԵՊՀ:

 

Հոկտեմբերի 5-6-ը Գորիսի համար 4 ավագ դպրոց էին այցելել ԵՊՀ հայ բանասիրության, պատմության, կենսաբանության, քիմիայի, ռոմանագերմանական բանասիրության ու մաթեմատիկայի և մեխանիկայի ֆակուլտետների պրոֆեսորադասախոսական կազմի ներկայացուցիչները:

 

Այցելության մասին մեզ հետ զրույցում Մաթեմատիկայի և մեխանիկայի ֆակուլտետի դասախոս Հասմիկ Մկոյանն ասաց, որ շատ լավ ընդունելության են արժանացել դպրոցի թե՛ ուսուցիչների և թե՛ աշակերտների կողմից. «Դասարաններում շատ աշակերտներ էին հավաքվել: Զգացվում էր, որ ուսուցիչները կայացած մասնագետներ են: Շատ ուրախացա և նույնիսկ զարմացա, երբ իմացա, որ դպրոցն ունի քիմիայի շատ լավ լաբորատորիա, իսկ ուսուցչուհին էլ քիմիական գիտությունների դոկտոր է: Իմ դասին ներկա էին և՛10-րդ, և՛ 11-րդ, և՛ 12-րդ դասարանների աշակերտներ, իսկ դասախոսությունս պարամետրական հավասարումների և անհավասարումների մասին էր»:

 

Բացի այդ՝ Հասմիկ Մկոյանն ասաց նաև, որ այցելությունների առաջնային խնդիրն է նաև համալսարանը և ֆակուլտետներն ըստ արժանվույն ներկայացնելը:

 

Հոկտեմբերի 11-ին Վանաձորի մաթեմատիկայի և բնագիտական առարկաների խորացված ուսուցմամբ հատուկ դպրոցում և համար 5 ավագ դպրոցում էլ դասախոսություններով հանդես են եկել ԵՊՀ ռադիոֆիզիկիայի, մաթեմատիկայի և մեխանիկայի, կենսաբանության, քիմիայի և սոցիոլոգիայի ֆակուլտետների պրոֆեսորադասախոսական կազմի ներկայացուցիչները:

 

Հոկտեմբերի 12-ին Աբովյանի համար 4 ավագ դպրոց էին այցելել Մաթեմատիկայի և մեխանիկայի, Ռոմանագերմանական բանասիրության, Պատմության և Կենսաբանության ֆակուլտետների պրոֆեսորադասախոսական կազմի ներկայացուցիչները:

 

Մեզ հետ զրույցում ԵՊՀ ռոմանագերմանական բանասիրության ֆակուլտետի թարգմանության տեսության և պրակտիկայի ամբիոնի ասիստենտ Լուսինե Սարգսյանը պատմեց, որ այցելությունը շատ լավ է անցել. «Ինձ հետ եկել էին նաև մեր ֆակուլտետի ուսանողուհիներ, ովքեր ներկայացրին իրենց փորձը և խորհուրդներ տվեցին ապագա դիմորդներին: Մենք միասին ներկայացրինք Մայր բուհը, ապա խոսեցինք թարգմանական մեր աշխատանքների մասին»:

 

Լուսինե Սարգսյանն ափսոսանք հայտնեց, որ ժամանակը շատ քիչ էր. «Ե՛վ դասախոսության, և՛ Մայր բուհը ներկայացնելու համար 40 րոպեն, կարծում եմ, որ շատ քիչ է: Բացի այդ՝ ծրագիրն ավելի արդյունավետ կլինի, եթե բուհը ներկայացնող ուսանողները շատ լինեն: Այլ բան է, երբ դասախոսն է ներկայացնում, լրիվ այլ բան, երբ գրեթե հասակակիցն է ներկայացնում մասնագիտությունը, խորհուրդներ տալիս և պատասխանում հարցերին»:

 

 

Հոկտեմբերի 13-ին Եղեգնաձորի ավագ դպրոցում դասախոսություններով հանդես են եկել Մաթեմատիկայի և մեխանիկայի, Ռոմանագերմանական բանասիրության, Աշխարհագրության և երկրաբանության, Հայ բանասիրության, Քիմիայի և Արևելագիտության ֆակուլտետների պրոֆեսորադասախոսական կազմի ներկայացուցիչները:

 

ԵՊՀ հայ բանասիրության ֆակուլտետի հայ նորագույն գրականության ամբիոնի դոցենտ Լիլիթ Սեյրանյանը մեզ հետ զրույցում նշեց, որ ԵՊՀ պրոֆեսորադասախոսական կազմը ջերմ ընդունելության է արժանացել. «Շահան Շահնուրի «Նահանջ առանց երգի» վեպի վերաբերյալ դասախոսություն եմ կարդացել 11-րդ և 12-րդ դասարանների աշակերտների համար: Ներկայացրի, թե ինչ մոտեցմամբ պետք է կարդալ վեպը, ինչ հարցերի և ժամանակի որ խնդիրների համատեքստում պետք է դիտարկել այն»:

 

Ըստ Լիլիթ Սեյրանյանի՝ ծրագիրը շատ արդյունավետ է և կարող է արդարացնել իր նպատակները. «Բացի դասախոսությունից՝ ծանոթացա նաև ուսուցիչների, նրանց մեթոդական սկզբունքների հետ: Նրանց հետ պայմանավորվեցինք նաև հետագա համագործակցության համար»:

 

Հոկտեմբերի 17-ին էլ Արտաշատի ավագ դպրոց էին այցելել Աշխարհագրության և երկրաբանության, Մաթեմատիկայի և մեխանիկայի, Ռոմանագերմանական բանասիրության, Կենսաբանության, Քիմիայի, Ռուս բանասիրության և Արևելագիտության ֆակուլտետների պրոֆեսորադասախոսական կազմի ներկայացուցիչները:

 

Մեզ հետ զրույցում Ռուս բանասիրության ֆակուլտետի ռուս գրականության ամբիոնի դոցենտ Աշխեն Աթանեսյանը փաստեց, որ այցելությունը բավականին արդյունավետ է անցել. «Ներկայացրել եմ «Ռուս գրականության արծաթե դարը» թեմայով դասախոսությունը, որն անցավ ինտերակտիվ ձևով: Աշակերտները շատ ակտիվ մասնակցում էին դասին, պատասխանում հարցերին»:

 

Աշխեն Աթանեսյանն ասաց նաև, որ ծանոթացել է դպրոցի ուսուցչական կոլեկտիվի հետ, տնօրենի հետ քննարկել են կրթական հիմնախնդիրներն ու փորձել լուծումներ գտնել. «Հետագայում նույնպես ակտիվորեն կհամագործակցենք և կփոխանակենք մեր հետաքրքիր գաղափարներն ու ծրագրերը»:

 

Հոկտեմբերի 19-ին էլ ԵՊՀ միջազգային հարաբերությունների, աշխարհագրության և երկրաբանության, կենսաբանության, պատմության և արևելագիտության ֆակուլտետների պրոֆեսորադասախոսական կազմի ներկայացուցիչներն այցելել են Հրազդանի համար 13 ավագ դպրոց:

Այլ նորություններ
ՀԱՄԱՊԱՏԱՍԽԱՆ ՔԱՆԱԿԻ ԿՐԵԴԻՏՆԵՐ ՉՀԱՎԱՔԱԾ ԵՎ ՈՒՍՄԱՆ ՎԱՐՁԵՐԸ ՉՎՃԱՐԱԾ ՈՒՍԱՆՈՂՆԵՐԸ ԿՀԵՌԱՑՎԵՆ. ԵՊՀ ՌԵԿՏՈՐԱՏԻ ՆԻՍՏՈՒՄ ԱՄՓՈՓՎԵՑ ՔՆՆԱՇՐՋԱՆԸ
Այսօր ԵՊՀ գիտխորհրդի նիստերի դահլիճում տեղի ունեցավ ռեկտորատի հերթական նիստը, որի ընթացքում ամփոփվեց 2017-2018 ուստարվա երկրորդ կիսամյակի քննաշրջանը:
4 ԴԵԿԱՆՆԵՐԻ ՈՒ 31 ԱՄԲԻՈՆԻ ՎԱՐԻՉՆԵՐԻ ԸՆՏՐՈՒԹՅՈՒՆՆԵՐԻ ՀԱՍՏԱՏՈՒՄ, ՆՈՐ ՊՐՈՖԵՍՈՐՆԵՐ, ԴՈՑԵՆՏՆԵՐ. ԹԵԺ ՔՆՆԱՐԿՈՒՄ՝ ԵՊՀ ԳԻՏԽՈՐՀՐԴՈՒՄ
Այսօր ԵՊՀ գիտխորհրդի նիստերի դահլիճում տեղի ունեցավ գիտխորհրդի հերթական նիստը, որի օրակարգում ընդգրկված էին ութ օրակարգային և մի քանի ընթացիկ հարցեր: