23.05.2019 | 
Կրթություն
ԵՊՀ ԿԻՐԱՌԱԿԱՆ ԿԵՆՍԱԲԱՆՈՒԹՅԱՆ ԳԵՐԱԶԱՆՑՈՒԹՅԱՆ ԿԵՆՏՐՈՆԻ ԼԱԲՈՐԱՏՈՐԻԱՆ ՀԱՄԱԼՐՎԵԼ Է ԺԱՄԱՆԱԿԱԿԻՑ ՍԱՐՔԱՎՈՐՈՒՄՆԵՐՈՎ
ԵՊՀ ԿԻՐԱՌԱԿԱՆ ԿԵՆՍԱԲԱՆՈՒԹՅԱՆ ԳԵՐԱԶԱՆՑՈՒԹՅԱՆ ԿԵՆՏՐՈՆԻ ԼԱԲՈՐԱՏՈՐԻԱՆ ՀԱՄԱԼՐՎԵԼ Է ԺԱՄԱՆԱԿԱԿԻՑ ՍԱՐՔԱՎՈՐՈՒՄՆԵՐՈՎ
ԵՊՀ կիրառական կենսաբանության գերազանցության կենտրոնի լաբորատորիան «Erasmus+ KA2»-ի «Բիոարտադրանքի գիտության և տեխնոլոգիաների հայկական գերազանցության ցանցի ստեղծում (ABIONET)» ծրագրի շրջանակում hամալրվել է ժամանակակից սարքավորումներով:

Այս մասին մեզ հետ զրույցում ասաց Կիրառական կենսաբանության գերազանցության կենտրոնի գիտաշխատող Սյուզաննա Եսոյանը:

 

Նրա խոսքով, նոր ձեռք բերված սարքավորումները թույլ կտան հետազոտություններ իրականացնել կենսատեխնոլոգիայի և սննդամթերքի անվտանգության ոլորտում: «Նմանօրինակ սարքերի առկայությունն ուսանողներին հնարավորություն է տալիս ծանոթանալու նորագույն տեխնոլոգիաներին և աշխատելու նոր մեթոդներով: ԵՊՀ կենսաբանության ֆակուլտետի մագիստրատուրայի առաջին և երկրորդ կուրսերի ուսանողները կարող են իրենց մագիստրոսական թեզերի հետազոտություններն իրականացնել ձեռք բերված ժամանակակից նոր սարքավորումներով»,- նշեց նա:

 

Սյուզաննա Եսոյանը նաև հայտնեց, որ «Erasmus+ KA2»-ի «Բիոարտադրանքի գիտության և տեխնոլոգիաների հայկական գերազանցության ցանցի ստեղծում (ABIONET)» ծրագիրը մեկնարկելու է 2019-2020 ուստարում, որին կարող են դիմել Կենսաբանության ֆակուլտետի մագիստրատուրայի առաջին և երկրորդ կուրսերի ուսանողները:

 

Նա նշեց, որ վերոնշյալ ծրագիրը ենթադրում է նոր մոդուլների առկայություն արդեն իսկ գործող մագիստրոսական ծրագրում։

Կենսաբանության ֆակուլտետի մագիստրատուրայի առաջին և երկրորդ կուրսերի ուսանողները, որոնց մագիստրոսական թեզի թեմաները կհամապատասխանեն ծրագրի շրջանակում առաջարկվող մոդուլներին, կարող են հետազոտական աշխատանքների մի մասն իրականացնել ծրագրի գործընկեր երկրների (Իտալիա, Գերմանիա, Հունաստան, Պորտուգալիա) բուհերում:

 

Սյուզաննա Եսոյանի խոսքով, այս ծրագիրն ուղղված է գիտություն-կրթություն-ձեռներեցություն կապի ստեղծմանը և ամրապնդմանը. «Ծրագրի նպատակն է նպաստել, որպեսզի մագիստրատուրայի ուսանողները բուհն ավարտելուց հետո կարողանան ստեղծել իրենց փոքրիկ բիզնեսը, ինչպես նաև աշխատանք գտնեն իրենց մասնագիտությանը համապատասխան ոլորտներում»:

 

Ի դեպ, «ABIONET» ծրագրի ավարտին հայաստանյան մասնակից բուհերի կողմից պետք է ներկայացվի 8 ստարտափ ծրագիր:

 

ԵՊՀ կիրառական կենսաբանության գերազանցության կենտրոնի գիտաշխատողի խոսքով, վերոնշյալ ծրագրի մասին իրազեկել են ԵՊՀ կենսաբանության ֆակուլտետի այն ուսանողներին, որոնք ցանկանում են ուսումը շարունակել մագիստրատուրայում:  

  

Վերոնշյալ ծրագրի շրջանակում մայիսի 6-11-ն Իտալիայի Հանրապետության Տերամոյի համալսարանում անցկացվել է հայաստանյան մի շարք բուհերի՝ Երևանի պետական, Հայաստանի ազգային ագրարային, Շիրակի պետական, Գավառի պետական համալսարանների, ինչպես նաև ՀՀ կրթության և գիտության նախարարության մասնագետների վերապատրաստման դասընթաց՝ նոր կարողությունների ձեռքբերման նպատակով:

 

 

Սյուզաննա Եսոյանը, որը մասնակցել է վերապատրաստմանը, ասաց, որ դասընթացն անցկացրել են վերոնշյալ ծրագիրը համակարգող՝ Սալոնիկի Ալեքսանդրի տեխնոլոգիական կրթական ինստիտուտի (Հունաստան), ծրագրի եվրոպական գործընկեր բուհերից՝ Դրեզդենի տեխնոլոգիական համալսարանի (Գերմանիա), Տերամոյի համալսարանի (Իտալիա) և Պորտուգալիայի կաթոլիկե համալսարանի (Պորտուգալիա) մասնագետները:

 

Վերապատրաստման թեմաները վերաբերում էին գիտություն-կրթություն-արտադրություն կապի ստեղծմանը: Դասընթացին անդրադարձ է կատարվել կենսատեխնոլոգիային, կենսաարտադրությանը, ձեռներեցության ոլորտներին, ստարտափ ծրագրեր կազմելու հմտություններին:

 

Հանդիպման վերջում քննարկվել են հաջորդ հանդիպումների ժամկետները և վերապատրաստման ծրագրերը, ինչպես նաև ձեռք է բերվել պայմանավորվածություն հետագա անելիքների մասին:

 

Նադեժդա Տեր-Աբրահամյան

 

 

 

 

Այլ նորություններ
ԱՇԱԿԵՐՏՆԵՐՆ ԱՅՑԵԼԵԼ ԵՆ ԵՊՀ ՄԱԹԵՄԱՏԻԿԱՅԻ ԵՎ ՄԵԽԱՆԻԿԱՅԻ ՖԱԿՈՒԼՏԵՏ
Երևանի պետական համալսարանի մաթեմատիկայի և մեխանիկայի ֆակուլտետն այսօր հյուրընկալել էր Երևանի թիվ 190 և 148 ավագ դպրոցների աշակերտներին։
«ԼՍԵ՛Ք ՁԵԶ, ՃԱՆԱՉԵ՛Ք ՁԵԶ ՈՒ ԸՆՏՐՈՒԹՅՈՒՆԸ ԴՈ՛ՒՔ ԿԱՏԱՐԵՔ»․ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ԴԵԿԱՆՆ ԱՅՑԵԼԵԼ Է ԹԻՎ 198 ԱՎԱԳ ԴՊՐՈՑ
Երևանի պետական համալսարանի հայ բանասիրության ֆակուլտետի դեկան Արծրուն Ավագյանն այսօր մասնագիտական կողմնորոշման նպատակով այցելել է Երևանի թիվ 198 ավագ դպրոց։