19.04.2019 | 
Կրթություն
ԱՆԳԼԵՐԵՆԻ ԲԱՐԵԼԱՎՄԱՆ ՀՆԱՐԱՎՈՐՈՒԹՅՈՒՆ ԻՐԱՎԱԲԱՆՆԵՐԻ ՀԱՄԱՐ. ՄՇԱԿՎԵԼ Է ՆՈՐ ԾՐԱԳԻՐ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԱՆԳԼԵՐԵՆԻ ԲԱՐԵԼԱՎՄԱՆ ՀՆԱՐԱՎՈՐՈՒԹՅՈՒՆ ԻՐԱՎԱԲԱՆՆԵՐԻ ՀԱՄԱՐ. ՄՇԱԿՎԵԼ Է ՆՈՐ ԾՐԱԳԻՐ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ իրավագիտության ֆակուլտետի ուսանողներին իրավաբանական անգլերեն ուսուցանելու նպատակով «Մարդու իրավունքների տուն Երևան» միջազգային իրավապաշտպան կազմակերպությունների ցանցի հետ համատեղ մշակվել է «Իրավաբանական անգլերեն» դասընթացը:

Դասընթացի նպատակն է բարելավել մասնակիցների անգլերեն կարդալու, լսելու և խոսելու կարողությունները, ինչպես նաև հարստացնելու մասնակիցների իրավաբանական անգլերենի բառապաշարը՝ ամերիկյան, եվրոպական և հայաստանյան պետության և իրավունքի վերաբերյալ իրավական և կրթական աղբյուրների (տեքստ, աուդիո) ինտերակտիվ ուսումնասիրման ճանապարհով:

 

Ծրագրի տևողությունը երկու ամիս է: Դասընթացը վարելու է «Դեպի Հայք» (Birthright Armenia) ծրագրի կամավոր Քեթի Շերդանը: Ծրագրի ղեկավարների հավաստմամբ, հաղորդակցումն անմիջապես  լեզվի կրողի հետ և ուսուցման նորարական ու ինտերակտիվ մեթոդի կիրառումը ՝ լեզվի յուրացումը կդարձնեն հնարավորինս հեշտ ու հետաքրքիր։

 

Մեզ հետ զրույցում Իրավագիտության ֆակուլտետի դեկան Գագիկ Ղազինյանը փաստեց, որ ծրագիրը մշակվել է ֆակուլտետի զարգացման ծրագրով նախատեսված միջազգայնացման գործընթացի շրջանակում. «Մեր առջև նպատակ ենք դրել հաստատելու և ամրապնդելու միջազգային կապերը, ինչպես նաև ուսանողներին և պրոֆեսորադասախոսական կազմի ներկայացուցիչներին առավելագույնս ներգրավելու միջազգային ծրագրերում, հրապարակումներում, միջոցառումներում, և այդ գործընթացներն առավել արդյունավետ կազմակերպելու համար անգլերենի ուսուցման այս ծրագիրը հրաշալի միջոց կդառնա»:

 

Գագիկ Ղազինյանը նշեց, որ ուսանողների հետաքրքրվածությունը շատ մեծ է. «Ծրագրի հաջող ավարտից հետո նախատեսում ենք փնտրել հնարավորություններ՝ այն շարունակական դարձնելու համար»: Դեկանը տեղեկացրեց նաև, որ ծրագրի իրականացմանը մեծապես օժանդակել է Պետության և իրավունքի տեսության ու պատմության ամբիոնի դասախոս Վարսեր Կարապետյանը:

 

«Իրավաբանական անգլերեն» դասընթացին մասնակցում են անգլերենի միջին մակարդակի իմացություն ունեցող ուսանողները։ Լեզվի իմացության մակարդակի ստուգման նպատակով ուսանողներն արդեն լրացրել են անգլերենի առցանց թեստ, որի արդյունքներով միջին և բարձր մակարդակ ունեցող ուսանողների հետ անցկացվում է բանավոր հարցազրույց՝ անգլերենով հաղորդակցվելու կարողությունը ստուգելու նպատակով: Հարցազրույցի արդյունքում ընտրվելու են դասընթացի մասնակիցները։

 

Տեղեկացնենք, որ դասընթացի ավարտին տրամադրվելու է մասնակցության վկայական։

 

Քնար Միսակյան

Այլ նորություններ
ՔՆՆԱՐԿԵԼ ՓԱԽՍՏԱԿԱՆՆԵՐԻ ԻՐԱՎՈՒՆՔՆԵՐԸ ԵՎ ԽԹԱՆԵԼ ԴՐԱՆՑ ՊԱՇՏՊԱՆՈՒԹՅԱՆ ՈԼՈՐՏՈՒՄ ԻՐԱՎԱԿԱՆ ԿՐԹՈՒԹՅԱՆ ԶԱՐԳԱՑՈՒՄԸ. ԵՌՕՐՅԱ ԴՊՐՈՑ՝ ԴԻԼԻՋԱՆՈՒՄ
ԵՊՀ իրավագիտության ֆակուլտետի, ՄԱԿ-ի փախստականների գծով գերագույն հանձնակատարի հայաստանյան գրասենյակի և «Առաքելություն Հայաստան» ՀԿ-ի համատեղ նախաձեռնությամբ հոկտեմբերի 11-13-ը Դիլիջան քաղաքում կազմակերպվել է արդեն ավանդական դարձած «Փախստականների իրավունք» խորագրով 9-րդ դպրոցը:
«ՆՊԱՏԱԿԸ ՏԵՍԱԿԱՆ ԳԻՏԵԼԻՔՆԵՐԸ ԳՈՐԾՆԱԿԱՆ ՀՄՏՈՒԹՅՈՒՆՆԵՐԻ ՎԵՐԱԾԵԼՆ Է»․ ՏՆՏԵՍԱԳԻՏՈՒԹՅԱՆ ԵՎ ԿԱՌԱՎԱՐՄԱՆ ՖԱԿՈՒԼՏԵՏԻ ՈՒՍԱՆՈՂՆԵՐԻ ԱՅՑԸ ԵՐԵՎԱՆԻ «ԱՐԱՐԱՏ» ԿՈՆՅԱԿԻ-ԳԻՆՈՒ-ՕՂՈՒ ԿՈՄԲԻՆԱՏ
Արդեն չորրորդ տարին է, ինչ ԵՊՀ տնտեսագիտության և կառավարման ֆակուլտետի կառավարման և գործարարության ամբիոնը նախաձեռնում է արտալսարանային դասեր, որոնք, տեսական գիտելիքներից բացի, նաև գործնական հմտություններ ձեռքբերելու հնարավորություն են տալիս: Տնտեսագիտության և կառավարման ֆակուլտետի 4-րդ կուրսի ուսանողներն այսօր նմանօրինակ դաս են ունեցել Երևանի «Արարատ» կոնյակի-գինու-օղու կոմբինատում: