13.06.2019 | 
Կրթություն
ՆՈՐ ԴԱՍԱԳԻՐՔ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ. ՊԱՏՐԱՍՏ Է «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔՐԵԱԿԱՆ ԴԱՏԱՎԱՐՈՒԹՅՈՒՆ» ԴԱՍԱԳՐՔԻ ՀԱՏՈՒԿ ՄԱՍԻ 4-ՐԴ ՀՐԱՏԱՐԱԿՈՒԹՅՈՒՆԸ
ՆՈՐ ԴԱՍԱԳԻՐՔ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ. ՊԱՏՐԱՍՏ Է «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔՐԵԱԿԱՆ ԴԱՏԱՎԱՐՈՒԹՅՈՒՆ» ԴԱՍԱԳՐՔԻ ՀԱՏՈՒԿ ՄԱՍԻ 4-ՐԴ ՀՐԱՏԱՐԱԿՈՒԹՅՈՒՆԸ
Բուհական նոր դասագիրքն իր բովանդակությամբ կօգնի ոչ միայն տեսական, այլև գործնական գիտելիքներ ձեռք բերել:

Դասագրքի հեղինակային խմբի ղեկավարը և խմբագիրն Իրավագիտության ֆակուլտետի դեկան, իրավ. գիտ. դոկտոր, պրոֆեսոր, ՀՀ ԳԱԱ ակադեմիկոս Գագիկ Ղազինյանն է, հեղինակները՝ Քրեական դատավարության և կրիմինալիստիկայի ամբիոնի վարիչ, իրավ. գիտ. դոկտոր, պրոֆեսոր Սամվել Դիլբանդյանը, ամբիոնի դոցենտներ Արմեն Հարությունյանը, Արմեն Հովհաննիսյանը, Հրայր Ղուկասյանը, Սերգեյ Մարաբյանը և Տաթևիկ Սուջյանը:

 

Մեզ հետ զրույցում Սամվել Դիլբանդյանը փաստեց, որ դասագիրքը շարադրված է ՀՀ քրեական դատավարության օրենսգրքի հատուկ մասի կառուցվածքին համապատասխան. «Դասագրքում լուսաբանված են քրեական դատավարության բոլոր փուլերը, ինչպես նաև հատուկ վարույթների առանձնահատկությունները»:

 

Ամբիոնի վարիչի հավաստմամբ, դասագրքում վերլուծության են ենթարկվել նաև ՀՀ քրեական դատավարության օրենսգրքի բացերը և քրեադատավարական օրենսդրության հետագա զարգացման միտումները:

 

«Գրքի չորրորդ հրատարակության ժամանակ կատարվել են բավականաչափ լրացումներ և հաշվի են առնվել մինչև 2019 թ. հունվարի 1-ն օրենսդրական փոփոխությունները, ՀՀ Սահմանադրական, ինչպես նաև Մարդու իրավունքների եվրոպական և ՀՀ Վճռաբեկ դատարանների նախադեպային որոշումները»,- ասաց Սամվել Դիլբանդյանը:

 

Իրավագիտության ֆակուլտետի դեկան Գագիկ Ղազինյանը մեզ հետ զրույցում ասաց, որ ֆակուլտետը զարգացման ռազմավարական ծրագրի շրջանակում որդեգրել է քաղաքականություն, ըստ որի՝ տեսական լավ պատրաստության հենքի վրա ուսանողներին փոխանցում է գործնական հմտություններ և պատրաստում ոլորտի առանձնահատկություններին լավ ծանոթ կադրեր:

 

«Դասագրքի այս հրատարակությունն էլ կազմվել է նշված քաղաքականության համաձայն և շարադրվել նոր մեթոդով: Եթե նախկինում դասագրքերը կազմվում էին միայն տեսական դրույթների հիման վրա, ապա այստեղ ներկայացված են նաև դատական ակտերում արտահայտված իրավական դիրքորոշումներ, որոնց վերլուծության արդյունքում ևս ուսանողները նոր գիտելիք և հմտություններ ձեռք կբերեն»,- ասաց Գագիկ Ղազինյանը:

 

Ֆակուլտետի դեկանի հավաստմամբ, դասագրքի նոր հրատարակությունը տեսական և գործնական գիտելիքի փոխանցման տեսանկյունից լավագույնս կամբողջացնի այս առարկայի ուսուցումը՝ հաշվի առնելով այն հանգամանքը, որ դրա գործնական պարապմունքներն անցկացվում են դատական նիստերի ձևով կամ համապատասխան իրավիճակների վերլուծությամբ:

 

Տեղեկացնենք, որ դասագիրքը նախատեսված է բուհերի իրավաբանական ֆակուլտետների ուսանողների, դասախոսների, ասպիրանտների համար: Այն կարող է օգտակար լինել նաև պրակտիկ իրավաբանների և քրեական դատավարության հարցերով հետաքրքրվող անձանց համար:

 

Քնար Միսակյան

Այլ նորություններ
ՔՆՆԱՐԿԵԼ ՓԱԽՍՏԱԿԱՆՆԵՐԻ ԻՐԱՎՈՒՆՔՆԵՐԸ ԵՎ ԽԹԱՆԵԼ ԴՐԱՆՑ ՊԱՇՏՊԱՆՈՒԹՅԱՆ ՈԼՈՐՏՈՒՄ ԻՐԱՎԱԿԱՆ ԿՐԹՈՒԹՅԱՆ ԶԱՐԳԱՑՈՒՄԸ. ԵՌՕՐՅԱ ԴՊՐՈՑ՝ ԴԻԼԻՋԱՆՈՒՄ
ԵՊՀ իրավագիտության ֆակուլտետի, ՄԱԿ-ի փախստականների գծով գերագույն հանձնակատարի հայաստանյան գրասենյակի և «Առաքելություն Հայաստան» ՀԿ-ի համատեղ նախաձեռնությամբ հոկտեմբերի 11-13-ը Դիլիջան քաղաքում կազմակերպվել է արդեն ավանդական դարձած «Փախստականների իրավունք» խորագրով 9-րդ դպրոցը:
«ՆՊԱՏԱԿԸ ՏԵՍԱԿԱՆ ԳԻՏԵԼԻՔՆԵՐԸ ԳՈՐԾՆԱԿԱՆ ՀՄՏՈՒԹՅՈՒՆՆԵՐԻ ՎԵՐԱԾԵԼՆ Է»․ ՏՆՏԵՍԱԳԻՏՈՒԹՅԱՆ ԵՎ ԿԱՌԱՎԱՐՄԱՆ ՖԱԿՈՒԼՏԵՏԻ ՈՒՍԱՆՈՂՆԵՐԻ ԱՅՑԸ ԵՐԵՎԱՆԻ «ԱՐԱՐԱՏ» ԿՈՆՅԱԿԻ-ԳԻՆՈՒ-ՕՂՈՒ ԿՈՄԲԻՆԱՏ
Արդեն չորրորդ տարին է, ինչ ԵՊՀ տնտեսագիտության և կառավարման ֆակուլտետի կառավարման և գործարարության ամբիոնը նախաձեռնում է արտալսարանային դասեր, որոնք, տեսական գիտելիքներից բացի, նաև գործնական հմտություններ ձեռքբերելու հնարավորություն են տալիս: Տնտեսագիտության և կառավարման ֆակուլտետի 4-րդ կուրսի ուսանողներն այսօր նմանօրինակ դաս են ունեցել Երևանի «Արարատ» կոնյակի-գինու-օղու կոմբինատում: