08.10.2019 | 
Կրթություն
ԲԵՌԼԻՆԻ ՏԵԽՆԻԿԱԿԱՆ ՀԱՄԱԼՍԱՐԱՆԻ ԴՈԿՏՈՐ ՕԼԻՎԵՐ ԼԵՆՑԸ ԴԱՍԱԽՈՍՈՒԹՅՈՒՆ Է ԿԱՐԴԱՑԵԼ ԵՊՀ-ՈՒՄ
ԲԵՌԼԻՆԻ ՏԵԽՆԻԿԱԿԱՆ ՀԱՄԱԼՍԱՐԱՆԻ ԴՈԿՏՈՐ ՕԼԻՎԵՐ ԼԵՆՑԸ ԴԱՍԱԽՈՍՈՒԹՅՈՒՆ Է ԿԱՐԴԱՑԵԼ ԵՊՀ-ՈՒՄ
ԵՊՀ կենսաքիմիայի, մանրէաբանության և կենսատեխնոլոգիայի ամբիոնի նախաձեռնությամբ հոկտեմբերի 7-ին Բեռլինի տեխնիկական համալսարանի դոկտոր Օլիվեր Լենցը հանդես է եկել «Ջրածինը ձևափոխող կենսակատալիզատորների կենսատեխնոլոգիական ներուժը» խորագրով դասախոսությամբ:

Դասախոսությունը կազմակերպվել էր ԵՊՀ կենսաքիմիայի, մանրէաբանության և կենսատեխնոլոգիայի ամբիոնի դոցենտ Աննա Փոլադյանի շնորհիվ, որը Գերմանիայի ակադեմիական փոխանակության ծրագրի (DAAD) շրջանակում համագործակցություն է հաստատել Բեռլինի տեխնիկական համալսարանի «Գազ-ձևափոխող կենսակատալիզատորների կենսաքիմիայի» հետազոտական խմբի հետ, և դրա ղեկավար, դոկտոր Օլիվեր Լենցին հրավիրել ԵՊՀ՝ ներկայացնելու հետազոտության վերջին արդյունքները:

 

Դասախոսության սկզբում ԵՊՀ կենսաքիմիայի, մանրէաբանության և կենսատեխնոլոգիայի ամբիոնի վարիչ Արմեն Թռչունյանը, ներկայացնելով Օլիվեր Լենցի անցած գիտական ուղին, ասաց, որ դոկտորը դասախոսությամբ հանդես կգա նաև վաղը՝ ներկայացնելով թթվածին-կայուն հիդրոգենազները և դրանց դերը բնության մեջ:

 

«Գերմանիայի ակադեմիական փոխանակության ծրագրի (DAAD) կողմից մեր ամբիոնը ստացել է մի քանի դրամաշնորհներ, որոնց շրջանակում մեր դասախոսներից շատերը եղել են Գերմանիայի տարբեր համալսարաններում: Ամբիոնը համագործակցում է գերմանական տարբեր բուհերի հետ, և հուսով եմ՝ այս դասախոսությունը ոչ միայն հետաքրքիր և օգտակար կլինի, այլև կնպաստի նոր համագործակցության հաստատմանը և հետագա համատեղ միջոցառումների իրականացմանը»,- ասաց Արմեն Թռչունյանը:

 

 

Դասախոսության ընթացքում Օլիվեր Լենցը խոսեց մատչելի և մաքուր էներգիայի ստացման այլընտրանքային եղանակների ու կենսակատալիզատորների դերի մասին: Նա խոսեց հիդրոգենազ ֆերմենտների կիրառման տարբեր ոլորտների և այդ ուղղությամբ արված փորձերի արդյունքում ստացված արդյունքների մասին:

 

Օլիվեր Լենցը դասախոսության ընթացքում ներկայացրեց փորձեր, որոնց ժամանակ,  օրինակ, համատեղելով լույսը ձևափոխող մեխանիզմը և հիդրոգենազի գործունեությունը՝ ջրածնի արտադրության նոր ուղիներ են փնտրում, ինչը էկոլոգիապես մաքուր էներգիայի այլընտրանքային աղբյուր է: Դասախոսության ընթացքում խոսվեց նաև էլեկտրաէներգիայի ստացման ժամանակ հիդրոգենազ ֆերմենտների՝ որպես կատալիզատորների դերի մասին:

 

Մեզ հետ զրույցում ԵՊՀ կենսաքիմիայի, մանրէաբանության և կենսատեխնոլոգիայի ամբիոնի դոցենտ Աննա Փոլադյանը, որը  Գերմանիայի ակադեմիական փոխանակության ծրագրի շրջանակում Գերմանիայում աշխատել է Օլիվեր Լենցի հետ, պատմեց, որ դոկտորի հետ համագործակցությունը սկսվել է դեռևս երկու տարի առաջ. «Այն ժամանակ դիմել էինք նրանց՝ մեզ անհրաժեշտ բակտերիա ստանալու համար: Նրանք էլ, մեզ չճանաչելով, նամակ էին գրել և ուղարկել այն: Հետո արդեն համագործակցությունն ամրապնդվել է DAAD-ի միջոցով»:

 

Օլիվեր Լենցը, որն առաջին օրն է համալսարանում, մեզ հետ զրույցում ասաց, որ արդեն հրաշալի տպավորություններ ունի այստեղից. «Նախևառաջ ինձ շատ ջերմ դիմավորեցին ԵՊՀ-ում՝ թե՛ ուսանողները, թե՛ դասախոսները: Բացի դրանից՝ մեծապես տպավորված եմ ուսանողների հետաքրքրասիրությամբ, նոր գիտելիք ստանալու ցանկությամբ: Հուսով եմ՝ մեր համագործակցությունը շարունակական կլինի»:

 

Քնար Միսակյան

Այլ նորություններ
ՔՆՆԱՐԿԵԼ ՓԱԽՍՏԱԿԱՆՆԵՐԻ ԻՐԱՎՈՒՆՔՆԵՐԸ ԵՎ ԽԹԱՆԵԼ ԴՐԱՆՑ ՊԱՇՏՊԱՆՈՒԹՅԱՆ ՈԼՈՐՏՈՒՄ ԻՐԱՎԱԿԱՆ ԿՐԹՈՒԹՅԱՆ ԶԱՐԳԱՑՈՒՄԸ. ԵՌՕՐՅԱ ԴՊՐՈՑ՝ ԴԻԼԻՋԱՆՈՒՄ
ԵՊՀ իրավագիտության ֆակուլտետի, ՄԱԿ-ի փախստականների գծով գերագույն հանձնակատարի հայաստանյան գրասենյակի և «Առաքելություն Հայաստան» ՀԿ-ի համատեղ նախաձեռնությամբ հոկտեմբերի 11-13-ը Դիլիջան քաղաքում կազմակերպվել է արդեն ավանդական դարձած «Փախստականների իրավունք» խորագրով 9-րդ դպրոցը:
«ՆՊԱՏԱԿԸ ՏԵՍԱԿԱՆ ԳԻՏԵԼԻՔՆԵՐԸ ԳՈՐԾՆԱԿԱՆ ՀՄՏՈՒԹՅՈՒՆՆԵՐԻ ՎԵՐԱԾԵԼՆ Է»․ ՏՆՏԵՍԱԳԻՏՈՒԹՅԱՆ ԵՎ ԿԱՌԱՎԱՐՄԱՆ ՖԱԿՈՒԼՏԵՏԻ ՈՒՍԱՆՈՂՆԵՐԻ ԱՅՑԸ ԵՐԵՎԱՆԻ «ԱՐԱՐԱՏ» ԿՈՆՅԱԿԻ-ԳԻՆՈՒ-ՕՂՈՒ ԿՈՄԲԻՆԱՏ
Արդեն չորրորդ տարին է, ինչ ԵՊՀ տնտեսագիտության և կառավարման ֆակուլտետի կառավարման և գործարարության ամբիոնը նախաձեռնում է արտալսարանային դասեր, որոնք, տեսական գիտելիքներից բացի, նաև գործնական հմտություններ ձեռքբերելու հնարավորություն են տալիս: Տնտեսագիտության և կառավարման ֆակուլտետի 4-րդ կուրսի ուսանողներն այսօր նմանօրինակ դաս են ունեցել Երևանի «Արարատ» կոնյակի-գինու-օղու կոմբինատում: