01.06.2020 | 
Հասարակություն
«#ԱՐԻ՛ PR». «ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐ» ՄԱԳԻՍՏՐՈՍԱԿԱՆ ԾՐԱԳԻՐՆ ԱՅՍ ՏԱՐԻ ՆԵՐԿԱՅԱՑՎԵԼ Է «ZOOM» ՀԱՐԹԱԿՈՒՄ
«#ԱՐԻ՛ PR». «ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐ» ՄԱԳԻՍՏՐՈՍԱԿԱՆ ԾՐԱԳԻՐՆ ԱՅՍ ՏԱՐԻ ՆԵՐԿԱՅԱՑՎԵԼ Է «ZOOM» ՀԱՐԹԱԿՈՒՄ
Տեղի է ունեցել «#Արի՛ PR». «Հասարակայնության հետ կապեր (PR)» մագիստրոսական ծրագիրը ներկայացնելու նպատակով կազմակերպված ամենամյա հանդիպումը: Այս տարի «արտակարգ» հանդիպման շրջանակում «Zoom» հարթակում հավաքվել են ծրագրի դասախոսները, շրջանավարտները, ուսանողներն ու ծրագրով հետաքրքրվող ապագա դիմորդներն ինչպես ԵՊՀ սոցիոլոգիայի, այնպես էլ այլ ֆակուլտետներից և բուհերից:

«#Արի՛ PR». «Zoom-Boom» միջոցառման հյուրերը՝ դասախոսներն ու ուսանողները, ծանոթացել և խոսել են PR-ից, քննարկել մասնագիտության առանձնահատկությունները։

 

Հանդիպման բանախոսներն են եղել Սոցիոլոգիայի ֆակուլտետի «Հասարակայնության հետ կապեր (PR)» մագիստրոսական ծրագրի ղեկավար Ն. Մելքոնյանը, փոխդեկան Ա. Սահակյանը, դասախոսներ Յ. Մելքումյանը, Լ. Շաքարյանը, Ա. Կժդրյանը և «Հասարակայնության հետ կապեր (PR)» մագիստրոսական ծրագրի շրջանավարտներ, «BREAVIS» ընկերության մարքեթինգային հաղորդակցությունների մասնագետ Ռ. Մկրյանը և «SPRING PR» ընկերության PR-տնօրեն Մ. Սաֆարյանը:

 

 

Սոցիոլոգիայի ֆակուլտետի դոցենտ, «SPRING PR» ընկերության համահիմնադիր Նվարդ Մելքոնյանը միջոցառման ընթացքում ներկայացրել է ծրագրի նպատակները, վերջնարդյունքները, առավելությունները, դասավանդվող առարկաներն ու դասախոսներին, խոսել է մասնագիտական տեսական ու գործնական հմտություններ ձեռք բերելու և ոլորտի առաջատար ու հեղինակավոր մասնագետների հետ պարբերաբար հանդիպում-քննարկումներ կազմակերպելու հնարավորություններից:

 

«Ռազմավարությամբ առաջնորդվելը, ռազմավարական հաղորդակցություն իրականացնելը ցանկացած կազմակերպության հաջողության հիմքում են, և մեր ծրագրի էությունն այն է, որ ուսանողը ձեռք բերի ռազմավարական մտածողություն, սովորի հաղորդակցվել գրագետ և արդյունավետ՝ պահպանելով հաղորդակցման էթիկան»,- իր խոսքում նշել է Ն. Մելքոնյանը:

 

«PR-ը մասնագիտություն է, որին չես կարող չսիրահարվել, որը չի կարող չդառնալ ապրելակերպ ու կենսաոճ»,- փաստել է նա:

 

 

Ծրագրով հետաքրքրվածներն «արտակարգ» հանդիպմանը հնչեցրել են իրենց հուզող բազմաթիվ հարցեր:

 

Տարբեր տարիների շրջանավարտներն ու PR ծրագրի 1-ին և 2-րդ կուրսի ուսանողները նշել են, որ նշանակություն չունի, թե դիմորդը մասնագիտական ինչ հենքով է ընդունվում այս բաժին: Հագեցած ծրագրի և արհեստավարժ դասախոսական կազմի շնորհիվ ուսանողը ձեռք է բերում տեսական գիտելիքի մեծ պաշար, բայց որ ամենակարևորն է՝ նաև հնարավորություն գործնական դաշտում այն իրացնելու համար:

Այլ նորություններ
«ԱՐՑԱԽՅԱՆ ՀԻՄՆԱՀԱՐՑԸ ՏԱՐԱԾԱՇՐՋԱՆԱՅԻՆ ԶԱՐԳԱՑՈՒՄՆԵՐԻ ԱՌԱՆՑՔՈՒՄ». ԴԱՍԱԽՈՍՈՒԹՅՈՒՆ ԵՊՀ-ՈՒՄ
ԵՊՀ միջազգային հարաբերությունների ֆակուլտետի ՈՒԳԸ-ի նախաձեռնությամբ գիտական խորհրդի նիստերի դահլիճում այսօր «Արցախյան հիմնահարցը ռեգիոնալ զարգացումների առանցքում» խորագրով բանախոսությամբ է հանդես եկել Քաղաքական ինստիտուտների և գործընթացների ամբիոնի դոցենտ Ալեն Ղևոնդյանը:
ԿԵՆՍԱԲԱՆՈՒԹՅԱՆ ՖԱԿՈՒԼՏԵՏԻ ԹԻՄԻ «ԹԱՓՈՆՆԵՐԻՑ` ԿԵՆՍԱՋՐԱԾԻՆ» ՍՏԱՐՏԱՓ ՆԱԽԱԳԻԾՆ ԱՐԺԱՆԱՑԵԼ Է ՄՐՑԱՆԱԿԻ
ԵՊՀ կենսաբանության ֆակուլտետի թիմը մասնակցել է «UNDP Armenia’s ImpactAIM»-ի, Ձեռնարկությունների ինկուբատոր հիմնադրամի (EIF) և «ISTC - Innovative Solutions and Technologies Center Foundation»-ի կողմից կազմակերպված «Climate Change Tech Accelerator (CCTA)» աքսելերացիոն ծրագրին, ներկայացրել «Թափոններից`կենսաջրածին» ստարտափ նախագիծը և դարձել մրցանակակիր: