18.10.2007 | 
Գիտություն
ԸՆԴԴԵՄ ՋՐԱՅԻՆ ԱՂԵՏՆԵՐԻ
ԸՆԴԴԵՄ ՋՐԱՅԻՆ ԱՂԵՏՆԵՐԻ
Այսօր «Հրազդան» հյուրանոցում մեկնարկեց միջազգային գիտական սեմինարը:

Աշխարհի 23 երկրների ավելի քան 60 գիտնականների մասնակցությամբ «Բնական աղետները եւ ջրի անվտանգությունը. ռիսկի գնահատումը, արագ արձագանքումը եւ շրջակա միջավայրի կառավարումը» թեմայով գիտաժողովը կազմակերպել են Երեւանի պետական համալսարանը, Միջազգային աշխարհագրական միության ջրաբանական հանձնաժողովը, «Ջրային, կլիմայական եւ ռեկրեացիոն ռեսուրսների միջազգային գիտահետազոտական կենտրոն» ՀԿ-ն` ՆԱՏՕ-ի անմիջական նախաձեռնությամբ եւ աջակցությամբ:

«Խնդիրն իրոք հրատապ է, բավական է հիշել ամռանը աշխարհի մի շարք երկրներում տեղի ունեցած ջրհեղեղները: Այստեղ հավաքված գիտնականների նպատակն է, իրենց պետությունների փորձն օգտագործելով, համատեղ քննարկել եւ առաջարկել նման խնդիրների լուծման կոնկրետ եղանակներ»,- ասաց գիտաժողովի համանախագահ Ուելսի համալսարանի պրոֆեսոր, Միջազգային աշխարհագրական միության ջրաբանական հանձնաժողովի նախագահ Էնթոնի Ջոնսը:

Միջազգային սեմինարը ունի գիտական, քաղաքական եւ տնտեսական կարեւոր նշանակություն ինչպես Հայաստանի, այնպես էլ տարածաշրջանի երկրների համար: Այն նպատակ ունի տվյալ բնագավառի աշխարհահռչակ հայտնի գիտնականների եւ նման փորձ ունեցող երկրների ջրային աղետների կառավարման համակարգի ներկայացուցիչների համատեղ ջանքերով Հայաստանի եւ հարակից տարածաշրջանների համար մշակել մեթոդներ, որոնք կնպաստեն ջրային աղետների կանխատեսմանը, ջրի անվտանգությանը, ռիսկի գնահատմանը, արագ արձագանքմանը եւ շրջակա միջավայրի կառավարմանը

Գիտաժողովի համանախագահ, ԵՊՀ դոցենտ, «Ջրային, կլիմայական եւ ռեկրեացիոն ռեսուրսների միջազգային գիտահետազոտական կենտրոն» ՀԿ-ի նախագահ, Միջազգային աշխարհագրական միության ջրաբանական հանձնաժողովի գործադիր կոմիտեի անդամ Թրահել Վարդանյանը նշեց, որ առաջարկված առավել արդյունավետ մեթոդները կտեղայնացվեն, ինչը թույլ կտա եթե ոչ վերացնել, ապա զգալի նվազեցնել ջրային աղետների թիվն ու դրանց բացասական հետեւանքները տարածաշրջանում:

«Համոզված ենք, որ արդյունքն զգալի կլինի, քանի որ այստեղ հավաքվել են բնագավառի լավագույն գիտնականները »,- ասաց Թրահել Վարդանյանը:

Միջազգային գիտաժողովը կշարունակվի մինչեւ հոկտեմբերի 22-ը: Սեմինարի ընթացքում մասնակիցները նաեւ կայցելեն Հայաստանի սելավաբեր եւ սողանքային շրջաններ եւ անձամբ կծանոթանան տեղանքին:

Այլ նորություններ
«ԳԵՐՄԱՆԱԳԻՏԱԿԱՆ ԱՄԲԻՈՆՈՒՄ ԱՄՐԱՊՆԴՎԵԼՈՒՑ ՀԵՏՈ ԻՄ ՆՊԱՏԱԿԸ ՄԻՇՏ ԵՂԵԼ Է ՕՏԱՐԱԽՈՍ ԱՇԽԱՐՀԻՆ ՆԵՐԿԱՅԱՑՆԵԼ ՀԱՅՈՑ ԼԵԶՈՒՆ, ՀԱՅՈՑ ԲԱՆԱՀՅՈՒՍՈՒԹՅՈՒՆԸ, ՊԱՏՄՈՒԹՅՈՒՆԸ ԵՎ ՀԱՅՈՑ ՑԵՂԱՍՊԱՆՈՒԹՅՈՒՆԸ». ԴՈՐԱ ՍԱՔԱՅԱՆ
Կանադայի Մոնրեալ քաղաքի ՄակԳիլ համալսարանի գերմանագիտական ամբիոնի ցկյանս պրոֆեսոր, ԵՊՀ պատվավոր դոկտոր, գերմանագետ և հայագետ Դորա Սաքայանը, ԵՊՀ 100-ամյակի կապակցությամբ հրավիրվելով Հայաստան, առիթը բաց չի թողել մեկնելուց առաջ լինելու Մայր բուհում ու իր հրատարակած վերջին գիրքը՝ «2500 proverbes arméniens traduits en français» («2.500 հայկական առածներ՝ ֆրանսերեն թարգմանությամբ»), ինչպես նաև այդ գրքի նախապես լույս տեսած անգլերեն տարբերակը նվիրելու Սարգիս և Մարի Իզմիրլյանների անվան գրադարանին:
ԱՐՏԵՄ ՕԳԱՆՈՎԸ ԵՎ ԱՌՆԱԿ ԴԱԼԱԼՅԱՆԸ ԵՊՀ-ՈՒՄ ՀԱՆԴԵՍ ԵՆ ԵԿԵԼ ԴԱՍԱԽՈՍՈՒԹՅՈՒՆՆԵՐՈՎ
Հայաստանի գիտության և տեխնոլոգիաների հիմնադրամի («Fast») կողմից կազմակերպված Գլոբալ նորարական ֆորումի («GIF») շրջանակում ԵՊՀ-ում այսօր դասախոսություններով հանդես են եկել ՌԴ Սկոլկովոյի գիտության և տեխնիկայի ինստիտուտի պրոֆեսոր Արտեմ Օգանովն ու Փարիզի վիճակագրության և տնտեսագիտության կառավարման ազգային դպրոցի պրոֆեսոր Առնակ Դալալյանը: