01.10.2019 | 
Քաղաքականություն
ՊԱՐԳԵՎԱՏՐՄԱՆ ԱՐԱՐՈՂՈՒԹՅՈՒՆ ԵՎ ՔՆՆԱՇՐՋԱՆԻ ԱՄՓՈՓՈՒՄ. ՏԵՂԻ Է ՈՒՆԵՑԵԼ ՌԵԿՏՈՐԱՏԻ ՆԻՍՏ
ՊԱՐԳԵՎԱՏՐՄԱՆ ԱՐԱՐՈՂՈՒԹՅՈՒՆ ԵՎ ՔՆՆԱՇՐՋԱՆԻ ԱՄՓՈՓՈՒՄ. ՏԵՂԻ Է ՈՒՆԵՑԵԼ ՌԵԿՏՈՐԱՏԻ ՆԻՍՏ
ԵՊՀ գիտխորհրդի նիստերի դահլիճում այսօր տեղի է ունեցել ռեկտորատի նիստ՝ օրակարգային երկու հարցով:

Օրակարգային առաջին հարցի շրջանակում տեղի ունեցավ ԵՊՀ 100-ամյակի կապակցությամբ ոսկե մեդալով պարգևատրված վարչական մասի աշխատակիցների և արծաթե մեդալի արժանացած համալսարանականների պարգևատրման արարողությունը:

 

ԵՊՀ ռեկտորի ժամանակավոր պաշտոնակատար Գեղամ Գևորգյանն ասաց, որ բոլորն արժանի են պարգևատրման. «Կարևորն այն էր, որ բոլորս տոն ստացանք: Համալսարանում այս օրերին թևածում էր տոնական տրամադրությունը»:

 

Գեղամ Գևորգյանը, բոլոր պարգևատրվողներին հանձնելով մեդալները և շնորհավորելով, ասաց, որ ԵՊՀ 100-ամյակին նվիրված միջոցառումների կազմակերպման գործում անփոխարինելի դերի համար ԵՊՀ մշակույթի կենտրոնի տնօրեն Կարինե Դավթյանն արժանանում է ոչ միայն ոսկե մեդալի, այլև որպես պարգևատրում՝ ստանում է գորգ, որի վրա գրված է «ԵՊՀ 100»:

 

 

«Կրկին շնորհավորում եմ բոլորին: Սա թող լինի արդեն փակված էջ, և այսօրվանից սկսենք մի նոր՝ երկրորդ հարյուրամյակի փուլ՝ նոր նվաճումներով և հաջողություններով»,- ասաց Գեղամ Գևորգյանը:

 

Ռեկտորատի նիստի օրակարգային հաջորդ հարցը վերաբերում էր քննաշրջանի ամփոփմանը: Գեղամ Գևորգյանն ասաց, որ 2018-19 ուստարվա երկրորդ կիսամյակի 2-րդ լուծարքի ամփոփագրի համաձայն՝ բակալավրիատի առկա ուսուցման համակարգի 136 և հեռակա ուսուցման համակարգի 90 ուսանող չի հավաքել անհրաժեշտ կրեդիտները, այսինքն՝ ունի ակադեմիական անբավարար առաջադիմություն:

 

«Մագիստրատուրայի առկա և հեռակա ուսուցման 2018-19 ուստարվա երկրորդ կիսամյակի 2-րդ լուծարքի ամփոփագրի համաձայն էլ՝ 24 մագիստրոս չի հավաքել կրեդիտների պահանջվող չափը: Եվ հետևաբար, առկա ուսուցման համակարգի 14 և հեռակա ուսուցման համակարգի 10 մագիստրոս ևս ունի ակադեմիական անբավարար առաջադիմություն»,- պարզաբանեց Գեղամ Գևորգյանը:

 

Նա ասաց, որ որոշվել է, ըստ կարգի, հեռացնել բոլորին:

 

 

Ռեկտորատի նիստի ընթացքում ԵՊՀ ուսումնական գործընթացի վերահսկման բաժնի վարիչ Արմեն Սարգսյանը հայտնեց, որ սեպտեմբերի 9-ին ԿԳՄՍՆ-ին է ներկայացվել հաջորդ տարվա ընդունելության մասնագիտությունների ցանկը՝ համապատասխան քննություններով:

 

«Գերատեսչական բոլոր մարմիններում անցկացվել է քննարկում: Երեկ երեկոյան էլեկտրոնային փոստով ինձ ուղարկել են որոշակի փոփոխություններով փաստաթուղթ, որոնք բավականին լուրջ հարված են հասցնելու համալսարանին: Հարցը պետք է քննարկել և միասնական լուծում առաջադրել»,- ասաց Արմեն Սարգսյանը:

 

Նրա փոխանցմամբ, օրինակ, Ռուս բանասիրության ֆակուլտետում անցած տարվանից ներդրվել է «Միջմշակութային հաղորդակցություն և թարգմանություն» կրթական ծրագիրը՝ ռուսերեն գրավոր և ռուսերեն բանավոր կամ անգլերեն գրավոր քննություններով և հայոց լեզու՝ դպրոցի գնահատականով. «Նախարարությունից պնդում են, թե եթե կա թարգմանություն հասկացությունը, ապա հայոց լեզվի պարագայում մենք իրավունք չունենք դպրոցի գնահատական ընդունել»:

 

«Բացի դրանից, օրինակ, Մաթեմատիկայի և մեխանիկայի և Ինֆորմատիկայի և կիրառական մաթեմատիկայի ֆակուլտետներում մենք ընդունելությունը կազմակերպում էինք այսպես. մաթեմատիկայի միասնական քննություն, ֆիզիկա (գրավոր) կամ անգլերեն (գրավոր): Նախարարությունից ասում են, որ պետք է հանել անգլերենը, իսկ այսօր գիտենք, որ դիմորդների մեծ մասը պարապում է մաթեմատիկա և անգլերեն, քանի որ այդ առարկաների իմացության դեպքում բուհերի ընտրության շրջանակը մեծանում է, այդ թվում՝ արտասահմանյան»:

 

Արմեն Սարգսյանի հավաստմամբ, այդ քայլով ԵՊՀ-ն դուրս կմնա մրցակցությունից, իսկ այն պատճառաբանությունը, թե ֆիզիկայի դերը կմեծանա, սխալ է, քանի որ դրա համար պետք է աշխատանք իրականացնել դպրոցներում:

 

Գեղամ Գևորգյանն էլ ասաց, որ բացի այդ խնդրից՝ այսօր դժվար է պատկերացնել մասնագետ, որը չի տիրապետում օտար լեզվի, մասնավորապես՝ անգլերենին:

 

Ներկայացնելով նմանօրինակ խնդիրներ՝ Արմեն Սարգսյանն ասաց, որ ինքն արդեն հայտնել է իր դիրքորոշումը՝ պարզաբանելով, որ փոփոխությունները կվնասեն համալսարանին:

 

Ռեկտորատի նիստի ընթացքում բաձրաձայնված հարցի վերաբերյալ ծավալվեց քննարկում, որի ժամանակ Իրավագիտության ֆակուլտետի դեկան Գագիկ Ղազինյանն առաջարկեց հարցը քննարկել գիտխորհրդում և համալսարանի անունից միասնական դիրքորոշում ներկայացնել:

 

Քնար Միսակյան

Այլ նորություններ
ԵՊՀ-Ն ՌԱԶՄԱՎԱՐԱԿԱՆ ԳՈՐԾԸՆԿԵՐՈՒԹՅԱՆ ԵՎ ԵՐԿԱՐԱԺԱՄԿԵՏ ՀԱՄԱԳՈՐԾԱԿՑՈՒԹՅԱՆ ՆՈՐ ՀՈՒՇԱԳԻՐ Է ԿՆՔԵԼ
ԵՊՀ հումանիտար և հասարակագիտական մասնագիտությունների գծով պրոռեկտոր Էլինա Ասրիյանը և ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի տնօրեն Հովհաննես Մովսիսյանը նոյեմբերի 29-ին ստորագրել են երկու կառույցների միջև համագործակցության հաստատման հուշագիր:
ՆՈՐ ՄՐՑՈՒՅԹ ԵՊՀ ԴԱՍԱԽՈՍՆԵՐԻ ՀԱՄԱՐ. ՀԱՂԹՈՂՆԵՐԻՆ ՊԱՐԳԵՎԱՏՐԵԼՈՒՑ ՀԵՏՈ ԵՊՀ-Ն ՆԵՐԿԱՅԱՆԱԼՈՒ Է ՆՐԱՆՑ ԴԱՍԱԽՈՍՈՒԹՅՈՒՆՆԵՐՈՎ
ԵՊՀ-ում նախատեսվում է կազմակերպել և անցկացնել «ԵՊՀ-ում դասավանդման գերազանցության մրցանակ» խորագրով ամենամյա մրցույթ, որի նպատակի, ինչպես նաև կազմակերպման և անցկացման կարգի վերաբերյալ զրուցել ենք ԵՊՀ բնական և ճշգրիտ մասնագիտությունների գծով պրոռեկտոր Ռաֆայել Բարխուդարյանի հետ: