20.09.2017 | 
Քաղաքականություն
ՌՈՍԱՐԻՈՅԻ ԱԶԳԱՅԻՆ ՀԱՄԱԼՍԱՐԱՆԻ ՆԵՐԿԱՅԱՑՈՒՑԻՉՆԵՐՆ ԱՅՑԵԼԵՑԻՆ ԵՊՀ
ՌՈՍԱՐԻՈՅԻ ԱԶԳԱՅԻՆ ՀԱՄԱԼՍԱՐԱՆԻ ՆԵՐԿԱՅԱՑՈՒՑԻՉՆԵՐՆ ԱՅՑԵԼԵՑԻՆ ԵՊՀ
Այսօր արգենտինական Ռոսարիոյի ազգային համալսարանի հայագիտության ամբիոնի պատվիրակության անդամները հանդիպեցին ԵՊՀ ղեկավարության հետ:

Հանդիպմանը, բացի ԵՊՀ ռեկտոր Արամ Սիմոնյանից, ներկա էին նաև Գիտական քաղաքականության և միջազգային համագործակցության գծով պրոռեկտոր Գեղամ Գևորգյանը, Միջազգային համագործակցության վարչության պետ Ալեքսանդր Մարգարովը և Հայագիտական հետազոտությունների ինստիտուտի փոխտնօրեն Մհեր Հովհաննիսյանը:

 

Արամ Սիմոնյանը բուհի ստեղծման, զարգացման և գիտահետազոտական ուղղությունների վերաբերյալ համառոտ տեղեկատվություն ներկայացրեց հյուրերին: Այնուհետև պատվիրակության անդամները, ովքեր հայկական արմատներ ունեն, պատմեցին Ռոսարիոյի ազգային համալսարանի հայագիտական ամբիոնի գործունեության ու հետագա ծրագրերի մասին:

 

«Մեր հիմնական նպատակն է շրջանակային համաձայնագիր կնքել Մայր բուհի հետ: Փաստաթուղթը լրացուցիչ արձանագրությունների կամ ծրագրերի ստորագրմամբ բազմաբնույթ համագործակցություն ծավալելու հնարավորություն կտա»,- ասաց Ռոսարիոյի ազգային համալսարանի ներկայացուցիչ Դելֆինա Դեմիրջյանը:

 

Հայագիտության ամբիոնի համակարգող, կինոռեժիսոր Ֆլորենսիա Դեմիրջյանն էլ պատմեց ամբիոնում տարվող աշխատանքների հիմնական ուղղությունների, ինչպես նաև համալսարանում գործող հայ-արգենտինական թանգարանի առաքելության մասին:

 

«Թանգարանում ներկայացված է Հայաստանը՝մինչև ժամանակակից Թուրքիայի կազմավորման տարիները: Ուստի մենք ակնկալում ենք ձեր աջակցությունը մեր ուսանողներին և այցելուներին պատմական նյութեր ներկայացնելու կամ դասախոսություններ կազմակերպելու գործում»,- ասաց Ֆլորենսիա Դեմիրջյանը:

 

Արամ Սիմոնյանը պատրաստակամություն հայտնեց արգենտինահայ գործընկերներին տրամադրել հարուստ տեղեկատվություն՝ գրքեր, տեսասկավառակներ և առցանց գրականություն:

 

Համաձայնագրի ստորագրումից և հուշանվերների փոխանակումից հետո պատվիրակության անդամներն այցելեցին նաև Հայագիտական հետազոտությունների ինստիտուտ:

 

Հավելենք, որ Ռոսարիոյի ազգային համալսարանի պատվիրակությունը Հայաստան է այցելել Հայաստան-Սփյուռք 6-րդ համաժողովին մասնակցելու նպատակով:

Այլ նորություններ
ԵՊՀ ՀՈԳԱԲԱՐՁՈՒՆԵՐԻ ԽՈՐՀՐԴԻ ՆԻՍՏԸ ՏԵՂԻ ՉԻ ՈՒՆԵՑԵԼ. ՆԵՐԿԱ ԵՆ ԵՂԵԼ ՄԻԱՅՆ ՀԱՄԱԼՍԱՐԱՆԱԿԱՆ ԱՆԴԱՄՆԵՐԸ
ԵՊՀ հոգաբարձուների խորհրդի այսօր հրավիրված նիստը չի կայացել՝ քվեակազմի բացակայության պատճառով. 32 անդամներից ներկա էին 14-ը:
«ՍԵՐՎԻՍԻ ԿԱԶՄԱԿԵՐՊԻՉ/ՄԵՆԵՋՄԵՆՏ» ԽՈՐԱԳՐՈՎ ԴԱՍԱԽՈՍՈՒԹՅՈՒՆ ԵՐԵՎԱՆԻ ԹԻՎ 190 ԱՎԱԳ ԴՊՐՈՑՈՒՄ
ԵՊՀ աշխարհագրության և երկրաբանության ֆակուլտետի սերվիսի ամբիոնի վարիչ Սեյրան Սուվարյանն այսօր «Սերվիսի կազմակերպիչ/մենեջմենտ» խորագրով դասախոսություն է կարդացել Երևանի թիվ 190 ավագ դպրոցում: