18.12.2017 | 
Քաղաքականություն
ՆԱՏՕ-Ի ԲԱՐՁՐԱՍՏԻՃԱՆ ՊԱՇՏՈՆՅԱՆ ԱՅՑԵԼԵՑ ԵՊՀ
ՆԱՏՕ-Ի ԲԱՐՁՐԱՍՏԻՃԱՆ ՊԱՇՏՈՆՅԱՆ ԱՅՑԵԼԵՑ ԵՊՀ
Այսօր ԵՊՀ գիտխորհրդի նիստերի դահլիճում համալսարանականներին հյուրընկալվել էր ՆԱՏՕ-ի գլխավոր քարտուղարի տեղակալ Ռոզ Գոթեմոլլերը:

«ՆԱՏՕ-ի շաբաթ» միջոցառումների շրջանակում Մայր բուհ այցելած Հյուսիսատլանտյան դաշինքի (ՆԱՏՕ) բարձրաստիճան պաշտոնյային ողջունեց ԵՊՀ ռեկտոր Արամ Սիմոնյանն ու ընդգծեց, որ նմանաբնույթ հանդիպումները կարևոր են համալսարանականների մասնագիտական զարգացման համար:

 

Այնուհետև ռեկտորը որոշ մանրամասներ ներկայացրեց տիկին Գոթեմոլլերի կենսագրությունից, ինչից հետո հյուրն անդրադարձավ ՆԱՏՕ-Հայաստան հարաբերություններին, ինչպես նաև կառույցի պատմական փուլերին ու հետագա զարգացումներին:

 

«Շնորհակալ եմ հանդիպման համար: Ուրախ եմ, որ Հայաստանի Մայր բուհում ելույթ ունենալու, ՆԱՏՕ-ի և Հայաստանի հետ փոխգործակցության ծրագրերն ու ակնկալիքները ներկայացնելու հնարավորություն ունեմ»,- ասաց Ռոզ Գոթեմոլլերը:

 

Կազմակերպության մասին պատմական համառոտ ակնարկ ներկայացնելուց հետո ՆԱՏՕ-ի ներկայացուցիչը նախընտրեց պատասխանել հանդիպման մասնակիցներին հետաքրքրող հարցերին:

 

  

Հարցեր ուղղելու հնարավորություն ստացան նախևառաջ ուսանողները, որոնց շարքում առավել ակտիվ էին ԵՊՀ միջազգային հարաբերությունների ֆակուլտետի ներկայացուցիչները:

 

Բանախոսը ներկայացրեց նաև ՆԱՏՕ-ի՝ միջազգային տարբեր կազմակերպությունների և կոնկրետ երկրների հետ համագործակցության հիմնական ուղղություններն ու նպատակը:

 

«Մեր կազմակերպությունը երկու կարևոր հիմնարար սկզբունք ունի. առաջին՝ մենք բոլոր երկրների համար բաց ենք համագործակցություն ծավալելու առումով և երկրորդ՝ երկրներն ազատ ընտրության հնարավորություն ունեն՝ ում հետ և ինչ ծրագրերի շրջանակում համագործակցություն ծավալել, եթե, իհարկե, դրանք չեն հակասում մեր կազմակերպության որդեգրած քաղաքականությանը:

 

Նշենք նաև, որ ուսանողների հարցերը հիմնականում վերաբերում էին Հյուսիսատլանտյան դաշինքի՝ տարածաշրջանի երկրների հետ փոխգործակցության ծրագրերին ու ներկայումս ծավալվող զարգացումներին, ինչպես նաև աշխարհաքաղական հարթակում տեղի ունեցող կոնֆլիկտների վերաբերյալ ՆԱՏՕ-ի դիրքորոշմանը:

 

Անդրադառնալով Ղարաբաղյան հակամարտության խնդրին՝  ՆԱՏՕ-ի գլխավոր քարտուղարի տեղակալը նշեց, որ խնդրի լուծումը միանշանակ դրական անդրադարձ կունենա ամբողջ տարածաշրջանի վրա:

«Ցավալի է, որ ավելի քան 25 տարի անց դեռևս հակամարտությունը լուծված չէ, ինչը բացասաբար է ազդում Հայաստանի և Ադրբեջանի համատեղ աշխատանքի վրա: Դրական եմ գնահատում այն, որ նախարարների, այնուհետև նախագահների մակարդակով հանդիպումներ են կազմակերպվում: Կարծում եմ, որ սա գերազանց քայլ է: Կարող եմ իմ գոհունակությունը հայտնել, որ ԱՄՆ-ն բարձր մակարդակով ներգրավված է որպես ԵԱՀԿ Մինսկի խմբի համանախագահների շարքում»,- ասաց Ռոզ Գոթեմոլլերը և հույս հայտնեց, որ գործադրվող դիվանագիտական ջանքերը շուտով արդյունք կտան:

 

Հանդիպման վերջում Արամ Սիմոնյանը հյուրին գրքեր և բուկլետներ հանձնեց:

 

Հավելենք, որ Ռոզ Գոթեմոլլերը ՆԱՏՕ-ի պատմության մեջ գլխավոր քարտուղարի առաջին կին տեղակալն է: Նա ԱՄՆ ազգային անվտանգության խորհրդում զբաղեցրել է մի շարք պատասխանատու պաշտոններ: Աշխատել է Միջազգային խաղաղության Քարնեգի հիմնադրամում: Եղել է ԱՄՆ պետքարտուղարի օգնական՝ վերիֆիկացման, համապատասխանեցման, իրականացման, այնուհետև սպառազինությունների վերահսկման և միջազգային անվտանգության հարցերով: 2016 թ.-ի հոկտեմբերից նշանակվել է ՆԱՏՕ-ի գլխավոր քարտուղարի տեղակալի պաշտոնում:

Այլ նորություններ
ԵՊՀ ՀՈԳԱԲԱՐՁՈՒՆԵՐԻ ԽՈՐՀՐԴԻ ՆԻՍՏԸ ՏԵՂԻ ՉԻ ՈՒՆԵՑԵԼ. ՆԵՐԿԱ ԵՆ ԵՂԵԼ ՄԻԱՅՆ ՀԱՄԱԼՍԱՐԱՆԱԿԱՆ ԱՆԴԱՄՆԵՐԸ
ԵՊՀ հոգաբարձուների խորհրդի այսօր հրավիրված նիստը չի կայացել՝ քվեակազմի բացակայության պատճառով. 32 անդամներից ներկա էին 14-ը:
«ՍԵՐՎԻՍԻ ԿԱԶՄԱԿԵՐՊԻՉ/ՄԵՆԵՋՄԵՆՏ» ԽՈՐԱԳՐՈՎ ԴԱՍԱԽՈՍՈՒԹՅՈՒՆ ԵՐԵՎԱՆԻ ԹԻՎ 190 ԱՎԱԳ ԴՊՐՈՑՈՒՄ
ԵՊՀ աշխարհագրության և երկրաբանության ֆակուլտետի սերվիսի ամբիոնի վարիչ Սեյրան Սուվարյանն այսօր «Սերվիսի կազմակերպիչ/մենեջմենտ» խորագրով դասախոսություն է կարդացել Երևանի թիվ 190 ավագ դպրոցում: