24.12.2019 | 
ՀԱՆԴԻՊՈՒՄ-ՔՆՆԱՐԿՈՒՄ «ԳԻՏԱԿԱՆ ԱՐՑԱԽ» ՊԱՐԲԵՐԱԿԱՆԻ 2-ՐԴ ՀԱՄԱՐԻ ԽՄԲԱԳՐԱԿԱՆ ԽՈՐՀՐԴԻ ԱՆԴԱՄՆԵՐԻ ՈՒ ՀՈԴՎԱԾԱԳԻՐՆԵՐԻ ՀԵՏ
ՀԱՆԴԻՊՈՒՄ-ՔՆՆԱՐԿՈՒՄ «ԳԻՏԱԿԱՆ ԱՐՑԱԽ» ՊԱՐԲԵՐԱԿԱՆԻ 2-ՐԴ ՀԱՄԱՐԻ ԽՄԲԱԳՐԱԿԱՆ ԽՈՐՀՐԴԻ ԱՆԴԱՄՆԵՐԻ ՈՒ ՀՈԴՎԱԾԱԳԻՐՆԵՐԻ ՀԵՏ
ԵՊՀ Պալեանների անվան դահլիճում այսօր տեղի է ունեցել «Արցախի երիտասարդ գիտնականների և մասնագետների միավորում» (ԱԵԳՄՄ) հասարակական կազմակերպության «Գիտական Արցախ» պարբերականի 2-րդ համարի խմբագրական խորհրդի անդամների ու հոդվածագիրների հետ հանդիպում-քննարկումը:

Հանդիպում-քննարկմանը ներկա էին ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանը, գիտական քարտուղար Լևոն Հովսեփյանը, «Արցախի երիտասարդ գիտնականների և մասնագետների միավորում» ՀԿ նախագահ Ավետիք Հարությունյանը, պարբերականի խմբագրական խորհրդի անդամներ և հոդվածագիրներ:

 

Քննարկումը սկսելուց առաջ Ավետիք Հարությունյանը ողջունեց ներկաներին և շնորհակալություն հայտնեց հադիպմանը մասնակցելու համար:

 

«Արդեն ավանդույթ է դարձել, որ «Գիտական Արցախ» պարբերականի լույսընծայումից հետո ԵՊՀ-ում կազմակերպվում է հանդիպում-քննարկում՝ հոդվածագիրների և խմբագրական խորհրդի անդամների մասնակցությամբ»,- ասաց Ավետիք Հարությունյանը:

 

Նրա խոսքով, այս համարը շահեկանորեն տարբերվում է մյուսներից, քանի որ այն նվիրված է ԵՊՀ հիմնադրման 100-ամյակին, բացի դրանից՝ ներկաներից շատերը մասնակցել են նաև Ստեփանակերտում կազմակերպված «Հայոց պետականության անցյալը, ներկան ու ապագան» միջազգային երիտասարդական գիտաժողովին, որը նույնպես նվիրված էր համալսարանի հիմնադրման 100-ամյակին:

 

«Մենք բոլոր հարթակներից հնչեցրել ենք, որ «Արցախի երիտասարդ գիտնականների և մասնագետների միավորում» ՀԿ-ի առաջին և ամենաակտիվ գործընկերը ԵՊՀ-ն է,- փաստեց Ավետիք Հարությունյանը,- այդ համագործակցության արդյունքն է նաև «Գիտական Արցախ» պարբերականը, որի հիմնադիրը ԵՊՀ-ն է, իսկ հրատարակիչը՝ «Արցախի երիտասարդ գիտնականների և մասնագետների միավորում»-ը»:

 

Ներկաներին ողջունեց նաև Լևոն Հովսեփյանը՝ նշելով, որ «Գիտական Արցախ» պարբերականի հրատարակությունը քննարկումների յուրօրինակ հարթակ է դառնում ԵՊՀ-ում, և յուրաքանչյուր համարի շնորհանդես ուղեկցվում է գիտական քննարկումներով, գաղափարների փոխանակմամբ, ինչը շատ կարևոր է գիտական միջավայրի ստեղծման համար:

 

«Առանձնահատուկ կարևոր է, որ պարբերականը միտված է Արցախում գիտական միջավայրի և բանավեճի ձևավորմանը,- շեշտեց Լևոն Հովսեփյանը,- և ես շատ ուրախ եմ, որ համալսարանականները ներգրավվում են այդ գործընթացում»:

 

 

Նա, շնորհակալություն հայտնելով ծավալած աշխատանքի, արդյունավետ համագործակցության համար, Ավետիք Հարությունյանին հանձնեց շնորհակալագիր:

 

Ողջույնի խոսքով հանդես եկավ նաև պրոռեկտոր Արթուր Իսրայելյանը՝ բարձր գնահատելով «Արցախի երիտասարդ գիտնականների և մասնագետների միավորման» ու ԵՊՀ-ի գիտական համագործակցության արդյունավետությունը:

 

Այնուհետև «Գիտական Արցախ» պարբերականի խմբագրական խորհրդի անդամները հանդես եկան առաջարկներով՝ պարբերականն ավելի կատարելագործելու և ճանաչելի դարձնելու համար:

Մասնավորապես հնչեցին առաջարկություններ հոդվածներն ավելի մասնագիտական դարձնելու, գիտական հոդվածներից ամենակիրառականներն ու արդիականները ռուսերեն և անգլերեն թարգմանելու վերաբերյալ և այլն:

 

Ավետիք Հարությունյանն այդ առաջարկություններն ընդունեց ի գիտություն և ասաց, որ ամեն ինչ կանեն՝ առաջարկություններն իրագործելու համար: