05.04.2019 | 
Հասարակություն
ՆՈՐԱՏՈՒՆԿ ԾԱՌԵՐԸ՝ 100-ԱՄՅԱ ՀԱՄԱԼՍԱՐԱՆԻ ԽՈՐՀՐԴԱՆԻՇՆԵՐ. ԾԱՌԱՏՈՒՆԿ ԱՐՑԱԽՈՒՄ
ՆՈՐԱՏՈՒՆԿ ԾԱՌԵՐԸ՝ 100-ԱՄՅԱ ՀԱՄԱԼՍԱՐԱՆԻ ԽՈՐՀՐԴԱՆԻՇՆԵՐ. ԾԱՌԱՏՈՒՆԿ ԱՐՑԱԽՈՒՄ
Այսօր մեկնարկել է համալսարանականների եռօրյա այցը դեպի Արցախ, որի առաջին օրը նշանավորվեց Քաշաթաղի շրջանի Բերձոր քաղաքում ԵՊՀ 100-ամյակի պուրակի հիմնադրմամբ:

Ավանդական դարձած ծառատունկն ունի երկար տարիների պատմություն։ Ամեն տարի այն նվիրվում է նշանակալի և պատմական որևէ կարևոր իրադարձության: Եվ պատահական չէ, որ այս անգամ, հիմք ընդունելով 100 տարի առաջ տեղի ունեցած պատմական կարևոր իրադարձությունը՝ համալսարանի հիմնադրումը, իրենց ձեռքերով հիմնադրած պուրակը նվիրեցին այդ կարևոր իրադարձությանը:

Բերձորյան նորաստեղծ պուրակի հիմնադրմանը ներկա էին ԵՊՀ ռեկտոր Արամ Սիմոնյանը, Քաշաթաղի շրջանի վարչական ղեկավարը, ԵՊՀ պրոֆեսորադասախոսական կազմի ներկայացուցիչներ, աշխատակիցներ և ուսանողներ:

ԵՊՀ ռեկտոր Արամ Սիմոնյանն ասաց, որ համալսարանականներն այս տարածաշրջանում՝ հայրենիքի այս անգին հատվածում, ավելի քան 9600 ծառ են տնկել: Նրա հավաստմամբ, Բերձորում համալսարանականների նախաձեռնությամբ և մասնակցությամբ տարին երկու անգամ կազմակերպվում է ծառատունկ:



«Սա մի գեղեցիկ ավանդույթ է, որի սկիզբը դրել է Գուրգեն Մելիքյանը: Մենք հպարտ ենք, որ մեր ծառերն ունենք այստեղ՝ մեր ձեռքով տնկած, որոնք զարդարում են այս ճանապարհը և բարիք տալիս Բերձորի մեր հայրենակիցներին: Ծառ տնկելը մեծագույն բարիք է, երջանկություն: Ուզում եմ, որ այսօր բոլորդ մի ծառ տնկեք և դրանով օրհնեք ոչ միայն այս հողը, այս ջուրը, այլև ընդմիշտ կապվեք մեր հայրենիքի այս չքնաղ վայրի հետ»,- ասաց Արամ Սիմոնյանը:

Բարի ավանդույթի համաձայն` ծառատունկը Լևոն-Զավեն Սյուրմելյանի հայտնի բանաստեղծության տողերով օրհնեց ԵՊՀ արևելագիտության ֆակուլտետի իրանագիտության ամբիոնի պրոֆեսոր Գուրգեն Մելիքյանը. «Պատիվ է հայրենի հողը զարդարելը, քոչվորը երբեք չի զարդարում, նա կտրում է ծառը: Ոմանք մեր հայրենիքում քոչվորի նման են ապրում, որովհետև հատում են անտառը, իսկ դուք զարդարում եք հայոց հողը, որը հավիտենական է»:


Համալսարանականներն իրենց ծառը տնկեցին Բերձորում և այդ առաքելությամբ իրենց ներդրումն ունեցան նորաստեղծ պուրակի հիմնադրման գործում: Համալսարանականները եղան նաև Հայոց ցեղասպանության 100-րդ տարելիցին նվիրված պուրակում և նոր ծառեր տնկեցին այնտեղ:

Հիշեցնենք, որ ավանդույթ դարձած ծառատունկին աջակցում է նաև «Գուրգեն Մելիքյան» հիմնադրամը` ի դեմս Գուրգեն Մելիքյանի:

Այլ նորություններ
Ա. ԱԼԻԽԱՆՅԱՆԻ ԱՆՎԱՆ ԱԶԳԱՅԻՆ ԳԻՏԱԿԱՆ ԼԱԲՈՐԱՏՈՐԻԱՅԻ ԵՎ ԵՊՀ-Ի ՄԻՋԵՎ ԿՆՔՎԵՑ ՀԱՄԱԳՈՐԾԱԿՑՈՒԹՅԱՆ ՀԱՄԱՁԱՅՆԱԳԻՐ
ԵՊՀ ռեկտորի ժամանակավոր պաշտոնակատար Գեղամ Գևորգյանն այսօր իր աշխատասենյակում հանդիպել է Ա. Ալիխանյանի անվան ազգային գիտական լաբորատորիայի տնօրեն Անի Ապրահամյանի հետ, որի ընթացքում քննարկվել են կողմերի միջև համագործակցություն հաստատելու ուղղությունները:
«ՄԵԾ ՀԱՅՔԻ ՄԱՅՐԱՔԱՂԱՔ ՏԻԳՐԱՆԱԿԵՐՏԸ ՀԱՅ-ՀՌՈՄԵԱ-ԱՌԱՋԱՎՈՐԱՍԻԱԿԱՆ ՄԻՋՊԵՏԱԿԱՆ ՓՈԽՀԱՐԱԲԵՐՈՒԹՅՈՒՆՆԵՐԻ ԿՈՆՏԵՔՍՏՈՒՄ». ԲԵԼԳՈՐՈԴՈՒՄ ԼՈՒՅՍ Է ՏԵՍԵԼ ԵՊՀ ԴՈՑԵՆՏ ՀԱԿՈԲ ՀԱՐՈՒԹՅՈՒՆՅԱՆԻ ԳԻՐՔԸ
Ռուսաստանի Բելգորոդ քաղաքում օրեր առաջ լույս է տեսել ԵՊՀ պատմության ֆակուլտետի համաշխարհային պատմության ամբիոնի դոցենտ Հակոբ Հարությունյանի հեղինակած «Մեծ Հայքի մայրաքաղաք Տիգրանակերտը հայ-հռոմեա-առաջավորասիական միջպետական փոխհարաբերությունների կոնտեքստում» գիրքը՝ նվիրված ակադեմիկոս Գագիկ Սարգսյանի հիշատակին: