30.08.2019 | 
Հասարակություն
ԵՊՀ-Ի ԵՎ ԿՈՆՖՈՒՑԻՈՒՍԻ ԻՆՍՏԻՏՈՒՏԻ ՄԻՋԵՎ ՀԱՄԱԳՈՐԾԱԿՑՈՒԹՅՈՒՆԸ ՆՊԱՍՏԵԼ Է ԵՊՀ-ՈՒՄ ՉԻՆԱՐԵՆԻ ՆԵՐԴՐՄԱՆԸ. ՇՆՈՐՀԱԿԱԼԱԳԻՐ ԻՆՍՏԻՏՈՒՏԻ ՏՆՕՐԵՆ ՅԱՆ ՄԵՅԽՈՒԱՅԻՆ
ԵՊՀ-Ի ԵՎ ԿՈՆՖՈՒՑԻՈՒՍԻ ԻՆՍՏԻՏՈՒՏԻ ՄԻՋԵՎ ՀԱՄԱԳՈՐԾԱԿՑՈՒԹՅՈՒՆԸ ՆՊԱՍՏԵԼ Է ԵՊՀ-ՈՒՄ ՉԻՆԱՐԵՆԻ ՆԵՐԴՐՄԱՆԸ. ՇՆՈՐՀԱԿԱԼԱԳԻՐ ԻՆՍՏԻՏՈՒՏԻ ՏՆՕՐԵՆ ՅԱՆ ՄԵՅԽՈՒԱՅԻՆ
ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանն այսօր ԵՊԼՀ Կոնֆուցիուսի ինստիտուտի չինական կողմի տնօրեն Յան Մեյխուային շնորհակալագիր և հուշամեդալ հանձնեց երկարատև համագործակցության և աջակցության համար:

Հանդիպմանը, որին ներկա էր նաև ԵՊԼՀ Կոնֆուցիուսի ինստիտուտի տնօրեն Գոռ Սարգսյանը,  Արթուր Իսրայելյանը փաստեց, որ երկու կառույցների միջև համագործակցությունն արդյունավետ է եղել՝ նպաստելով ԵՊՀ-ում չինարենի ուսումնական գործընթացի ներդրմանը և չինական մշակութային արժեքների տարածմանը:

 

«Ակնհայտ է, որ ԵՊՀ միջազգային հարաբերությունների ֆակուլտետի և Կոնֆուցիուսի ինստիտուտի միջև համագործակցությունը մեծ զարգացում է ապրել, որի համար շնորհակալություն եմ հայտնում և ուզում եմ ուրախությամբ փաստել, որ այն ոչ միայն բարելավվել է, այլև ընդլայնվել: Ուսումնական նոր տարվա մեկնարկից չինարենն ուսումնասիրվելու է նաև ԵՊՀ արևելագիտության ֆակուլտետում»,- ասաց Արթուր Իսրայելյանը՝ հույս հայտնելով, որ առաջիկայում այլ ֆակուլտետներում ևս կուսուցանվի չինարենը:

 

 

Յան Մեյխուան, որը տեղափոխվելու է ՌԴ-ի Նովոսիբիրսկ քաղաք՝ որպես չինական կողմի տնօրեն՝ ղեկավարելու այնտեղի Կոնֆուցիուսի ինստիտուտը, մեզ հետ զրույցում պատմեց, որ ԵՊՀ-ի հետ համագործակցությունը սկիզբ է դրվել Արթուր Իսրայելյանի շնորհիվ:

 

«Նրա ջանքերով 2015 թվականին ԵՊՀ-ում բացվեց Չինարենի և չինական մշակույթի կենտրոնը, որը դարձավ մեր հուսալի գործընկերը: Համագործակցության ընթացքում համատեղ կազմակերպվել են տարաբնույթ միջոցառումներ: Հուսով եմ՝ համագործակցությունը կշարունակվի, իսկ արդյունքներն ավելի տպավորիչ կդառնան»,- ասաց Յան Մեյխուան:

 

Հանդիպման ավարտին Արթուր Իսրայելյանը ԵՊՀ ռեկտորի ժամանակավոր պաշտոնակատար Գեղամ Գևորգյանի անունից շնորհակալագիր և համալսարանի 100-ամյակի հոբելյանի շրջանակում թողարկված հուշամեդալ հանձնեց Յան Մեյխուային՝ ԵՊՀ-ում չինարենի ներդրմանը և տարածմանը, մշակութային ու ճանաչողական մի շարք միջոցառումների իրականացմանն աջակցելու համար:   

Քնար Միսակյան

Այլ նորություններ
«ԵՊՀ-Ն ԿՐԹՈՒԹՅԱՆ ԵՎ ԳԻՏՈՒԹՅԱՆ ԼՈԿՈՄՈՏԻՎՆ Է». ԿԳՄՍ ՆԱԽԱՐԱՐԸ ՊԱՏԱՍԽԱՆԵԼ Է ՀԱՄԱԼՍԱՐԱՆԱԿԱՆՆԵՐԻ ՀԱՐՑԵՐԻՆ
ՀՀ ԿԳՄՍ նախարար Վահրամ Դումանյանն այսօր այցելել էր ԵՊՀ: Նախարարը հարազատ բուհ էր եկել պրոֆեսոր Արմեն Թռչունյանին հայրենիքին մատուցած ծառայությունների համար հետմահու 1-ին աստիճանի մեդալով պարգևատրելու համար:
ՈՒՍՈՒՄՆԱԿԱՆ ԳՈՐԾԸՆԹԱՑԻ ԿԱԶՄԱԿԵՐՊՄԱՆ ՁԵՎԸ ԿՈՐՈՇԵՆ ՖԱԿՈՒԼՏԵՏՆԵՐԸ. ԵՊՀ ԴԵԿԱՆՆԵՐԸ ՀԱՆԴԻՊԵԼ ԵՆ ԳԵՂԱՄ ԳԵՎՈՐԳՅԱՆԻ ՀԵՏ
ԵՊՀ գիտական խորհրդի նիստերի դահլիճում այսօր տեղի է ունեցել ԵՊՀ ռեկտորի ժ.պ. Գեղամ Գևորգյանի և ֆակուլտետների դեկանների ու կրթական կենտրոնների ղեկավարների հանդիպումը, որի ընթացքում քննարկվել են ուսումնական գործընթացի կազմակերպման ձևի և լսարանների անվանափոխությունների վերաբերյալ հարցեր: