10.11.2014 | 
Հասարակություն
«ԾԱԳՈՒՄԸ: ԲԱՑԱՀԱՅՏՈՒՄ». ԱՅԼԸՆՏՐԱՆՔԱՅԻՆ ՊԱՏՄՈՒԹՅՈՒՆ
«ԾԱԳՈՒՄԸ: ԲԱՑԱՀԱՅՏՈՒՄ». ԱՅԼԸՆՏՐԱՆՔԱՅԻՆ ՊԱՏՄՈՒԹՅՈՒՆ
Նոր Զելանդացի գրող Լեն Ուիքսը, ոգեշնչվելով իր հայ կնոջ ժողովրդի պատմությունից և տոկունությունից, պատմական հայտնի իրադարձությունները շարադրել է այլ կերպ:

«Ծագումը: Բացահայտում» վեպի իրադարձությունները ծավալվում են համաշխարհային պատմության մեծագույն հակամարտության ժամանակաշրջանում: Այն սկսվում է 1930 թ-ին՝ խորհրդային ժամանակաշրջանում, Հայաստանի Արենի գյուղում կյանքի մարտահրավերների ուսումնասիրությունից: Գյուղացիներից մեկը չէր գիտակցում, որ ինքը մեծ նշանակություն ունեցող գաղտնիքի կրող է:

 

1937 թ-ին կայացրած մի որոշում փոխում է այն անցյալը, որ մենք գիտենք այսօր: Երբ 1941 թ-ին Ճապոնիան Առանցքի երկրների իր դաշնակիցների հետ որոշում է հարձակվել Խորհրդային միության վրա, դա բերում է կոմունիստական պետության անկմանը: Միացյալ Նահանգները չի ներքաշվում պատերազմի մեջ, ինչպես իրականում տեղի է ունեցել, իսկ Առանցքի երկրներն իրենց ազդեցությունը տարածում են ողջ Հյուսիսային Աֆրիկայի, Եվրոպայի և Ասիայի վրա:

 

Գրքի հերոսները հասարակ մարդիկ են: Փոքր ազգերը կամ համայնքները ներկայացնող հինգ անհատներից յուրաքանչյուրն իր առանցքային դերակատարությունն է ունենում պատմության հանգուցալուծման մեջ, չնայած նրանցից մեկը զոհաբերում է իր կյանքը:  

 

Պատմության մեջ երկու թեմաներ միահյուսվում են: Թեմաներից մեկը ներառում է բուն հակամարտությունը և առաջադեմ տեխնոլոգիաների զարգացումը, ինչպիսին է միջուկային զենքը: Երկրորդ թեման բացահայտում է մարդկության մասին մի մեծ գաղտնիք: Դա հայելի է հանդիսանում մարդկային գիտակցության համար, որը, ի վերջո, բեկումնային դեր է խաղում Առանցքի երկրների անկման գործում:

 

Գիրքը բաղկացած է երեք մասից՝ «Առանցքի երկրների վերելքը», «Ազատ աշխարհի պաշտպանությունը» և «Մարդկային էության բացահայտումը»:

 

Քանի որ հիմնական կերպարներն աշխարհի տարբեր երկրներից են, իրադարձություններն աշխարհագրական մի վայրից տեղափոխվում է մյուսը,  մինչդեռ ավելի ուշ վեպում նրանք սկսում են հանդիպել իրար: Տարբեր վայրերի ընտրությամբ նախատեսվում է ընթերցողին փոխանցել մի ուղերձ, ըստ որի՝ լավագույն արդյունքների հասնելու նպատակով աշխարհի բոլոր մարդիկ պետք է համագործակցեն իրար հետ: Այն թույլ է տալիս նաև պատկերացում կազմել զանազան հետաքրքիր մշակույթների մասին:

 

Որպես այլընտրանքային պատմություն՝  վեպը փորձում է պատմական իրադարձությունները ներկայացնել որքան հնարավոր է իրականությանը մոտ: Մասամբ հիմնված պատմական իրադարձությունների վրա՝ որոշ դեպքեր և կերպարներ թեթևակի փոփոխվել են ստեղծագործության բովանդակությանը համապատասխանացնելու նպատակով:

 

Հավելենք, որ Նոր Զելանդիայի նախկին վարչապետ Ֆիլ Գոֆն իր՝ հեղինակին հղած նամակում նշել է, որ Հայոց ցեղասպանությունը մարդկության պատմության ամենասահմռկեցուցիչ էջերից է, և այն չպետք է մոռացվի:  Պարոն Գոֆը նաև նամակ է ուղարկել Նոր Զելանդիայի արտաքին գործերի նախարարին՝ կոչ անելով ճանաչել Հայոց ցեղասպանության փաստը:

 

Գրքի բովանդակությանն առավել մանրամասն կարելի է ծանոթանալ http://originsdiscovery.com կայքէջից:

Այլ նորություններ
«ՀԱՐԳԵԼՈՎ ԶՈՀԵՐԻ ՀԻՇԱՏԱԿԸ՝ ԹՈՒՅԼ ՉԵՆՔ ՏԱԼԻՍ ՈՂԲԵՐԳՈՒԹՅԱՆ ԿՐԿՆՈՒԹՅՈՒՆ»․ ՀԱՄԱԼՍԱՐԱՆԱԿԱՆՆԵՐԻ ՀԱՐԳԱՆՔԻ ՏՈՒՐՔԸ ՄԵԾ ԵՂԵՌՆԻ ԶՈՀԵՐԻ ՀԻՇԱՏԱԿԻՆ
Երևանի պետական համալսարանի ուսանողներն ու պրոֆեսորադասախոսական կազմի ներկայացուցիչներն այսօր բարձրացան Ծիծեռնակաբերդ ու անմար կրակի մոտ իրենց հարգանքի տուրքը մատուցեցին Մեծ եղեռնի զոհերի հիշատակին։
ՑԵՂԱՍՊԱՆՈՒԹՅՈՒՆ ՎԵՐԱՊՐԱԾՆԵՐԸ. ԴՈԼՈՐԵՆՍ ԶՈՀՐԱՊ-ԼԻԲՄԱՆ, ԳԱՌՆԻԿ ՍՏԵՓԱՆՅԱՆ, ԱՇԽԵՆ ՏԻԳՐԱՆՅԱՆ
Որքան էլ Հայոց ցեղասպանության թեման բազմիցս արծարծված լինի, միևնույն է, այն շարունակում է մնալ արդիական: Ցեղասպանության մնացորդները սպիի նման խրված են մնում վերապրածների և հաջորդող սերունդների հիշողության ծալքերում: